Bo Estilo di Bida—Kico Ta e Rísiconan?

DEN hopi sentido, awor tin mas i mihó provision pa salú cu nunca. Un informe di Organisacion Mundial di Salú (OMS) di 1998 ta bisa: “Awor mas hende cu nunca tin acceso na por lo ménos e mínimo cuido médico, awa limpi i riolering.” Ta cierto cu ainda un gran parti dje poblacion mundial ta biba den pobresa, pero manera British Broadcasting Corporation a informá, “a reducí pobresa rond mundu den e último 50 añanan mas cu den e 500 añanan anterior.”

Dor cu e sistemanan di cuido médico na mundu a mehorá, e promedio mundial di expectacion di bida na nacementu a subi. Na 1955 e promedio tabata 48 aña. Pa 1995 el a aumentá te na 65 aña. Un motibu pa e aumento aki ta e progreso cu a haci riba tereno di enfermedad infantil.

Un tiki mas cu 40 aña pasá, 40 porciento di tur morto tabata mucha bou di cincu aña. Pero pa 1998, hopi mucha na mundu a haña vacuna contra e enfermedadnan infantil principal. Pues, e cifra di morto di mucha bou di cincu aña a baha te na 21 porciento di tur morto. Segun OMS, tabatin “un tendencia masha bisto den direccion di un bida mas salú i mas largu.”

Claro cu un bida mas largu sin masha mehoracion den su calidad, ta un victoria bashí. Hopi hende cu ta en busca di mihó condicionnan di bida, ta pone hopi énfasis riba placernan material. Sin embargo, un estilo di bida asina por tin su mes rísiconan pa salú.

Un Mihó Estilo di Bida?

Desaroyonan socioeconómico recien a introducí cambionan masha grandi den hende su estilo di bida. Pa hopi hende den paisnan desaroyá, ta posibel awor pa obtené producto i servicionan cu ántes hende mas ricu so por a permití nan mes. Algun dje progresonan aki a mehorá e prospecto di un bida mas largu, pero hopi hende a cai den e tentacion di hiba un estilo di bida cu ta caba cu nan.

Por ehempel, miyones di hende a usa nan situacion económico mas faborabel pa cumpra cosnan innecesario manera droga adictivo, alcohol i tabaco. Lamentablemente, e consecuencianan tabata masha predicibel. E revista World Watch ta bisa: “E menasa pa e salubridad público mundial cu ta creciendo mas rápido no ta un malesa, sino un producto.” E revista ta sigui bisa: “Nos ta verwagt cu den ménos cu 25 aña, malesanan causá pa tabaco, lo bini na lugá di malesanan contagioso como e menasa principal pa salú di hende mundialmente.” Ademas, Scientific American ta bisa: “Por atribuí un asombroso 30 porciento di tur cancer fatal primeramente na humamentu, i un cifra igual na hende su estilo di bida, foral nan custumber di come i falta di ehercicio.”

No tin duda cu e estilo di bida cu nos scoge tin un impacto masha grandi riba nos salú. Con anto nos por mantené of mehorá nos salú? Dieta i ehercicio ta suficiente? Ademas di esei, ki rol factornan mental i spiritual ta hunga den un estilo di bida saludabel?