Cera Conocí cu e Wolfshond Irlandes

DJE CORESPONSAL DI SPIERTA! NA IRLANDA

“E gigante amabel aki dje mundu di cachó.”

Esei ta un descripcion dje wolfshond irlandes. Bo a yega di topa un? Ta berdad cu awor no tin wolf na Irlanda. Pero ántes sí tabatin. Antes tabatin tambe porco salbahe i eland gigantesco. Ta ser bisá cu nan a mata e último wolf na Irlanda rond di doshen aña pasá. Promé cu esei, wolfshond tabata renombrá como yagdó di wolf i otro bestia grandi. Tin un cuenta un poco mas recien tocante un wolfshond cu nan a manda Rocky Mountains na Merca. Segun e relato, na 1892 el “a mata cuarenta wolf su so durante un winter.” Pero no wori. Wolfshond no ta yag riba hende ni mata nan!

SEGUN algun historiadó, pa aña 500 P.E.C., e wolfshond kisas tabata bon establecé na Irlanda. E pueblo céltico despues a usa e wolfshond pa mas cu yag so. Segun leyenda i historia, tambe e cachónan tabata bai guera huntu cu rey i guereronan irlandes.

E reputacion dje wolfshond como un rasa di cachó masha special, a plama rond mundu. Nan a asta hiba wolfshond Roma pa show nan den arena. Registronan tocante un cònsul romano cu yama Quinto Aurelio Symaco, ta conta nos cu na aña 393 E.C. el a skirbi un carta pa gradicí su ruman homber p’e shete wolfshondnan irlandes cu el a manda Roma. Parce cu e cachónan a ègt excitá e romanonan. Symaco a skirbi cu “henter Roma a wak nan cu asombro, i a imaginá cu mester a trece nan aki den kouchi di heru.”

Podisé ta e tamaño grandi dje cachónan a duna e hendenan e idea cu lo mester a transportá nan den kouchi di heru. E machu ta rond di 86 centimeter haltu te na scouder, pero tin ta hopi mas haltu. E wolfshond di mas haltu cu nan a registrá tabata mas cu un meter te na scouder. E hembra por lo general ta un par di centimeter mas corticu cu e machu. Como cu nan ta haltu ta mas fácil pa nan haña extra cuminda. E escritor escoses, Sir Walter Scott, a spierta un di su amigunan pa tene cuidou ora di come na mesa. Sino su wolfshond, kende tabata “rond di dos meter largu di su punta di nanishi te na su rabu,” lo a “come e amigu su cuminda for di su tayó sin cu e tin cu molestiá pone un pata riba mesa of riba stul.”

E cachónan aki ta cuminsá bida basta chikitu. Ora nan nace nan ta pisa rond di 700 gram so, pero nan ta crece lihé. Un señora cu tin nan i stima nan mashá, a bisa cu ora nan ta puppy nan ta “criaturanan chikitu fasinante” pero cu nan ta cambia “cu rapides asombroso for di bolanan gordo i chikitu pa sernan delegá i suave, cu ta pia largu so.”

Nan no ta blaf hopi. Nan ta mas e tipo fuerte i silencioso. Pero ora nan blaf, esei ta un zonido cu bo ta keda corda. Hende ta conta di un homber cu ora el a tende un wolfshond blaf, el a bisa cu esei tabata “e blaf mas bas i melancólico” cu hamas el a tende.

Nan a describí e wolfshond irlandes como un bestia cu “ta parce brabu, cu wowonan penetrante, wenkbrou bushi i lana grof color shinishi scur,” esta e tipo di cachó cu ora bo mir’é pa promé bes, bo kier keda leu. Pero tambe hende a bisa cu nan ta “asina amabel cu un mucha por hunga cu nan.” Manera un doño di nan cu por sa a bisa, nan ta eigenlijk, “sumamente cariñoso.” I no ta color shinishi so tin. Algun di nan tin lana blancu, geel, corá of pretu.

E famoso escritor irlandes Oliver Goldsmith a elogiá nan mashá. E di: “E gran wolfshond irlandes ta sumamente bunita i mahestuoso . . . , esun mas magnífico dje famia di cachó na mundu.” Ta bisto cu el a keda impresioná cu e wolfshond su bon tipo tur na lana, incluso su wenkbrou, cabei di wowo i barbanan cu ta dun’é loke a ser yamá “e berdadero aspecto irlandes.”

Pero di con anto e rasa di wolfshond casi a caba? Un motibu tabata nan popularidad. Admiradónan a considerá cu nan ta e clase di regalo cu nan por a manda pa hendenan importante manera rey. Pues, hende tabata “busca nan sin fin i manda nan na tur skina di mundu.” Como resultado, nan a plama den cantidadnan chikitu na tur parti. Ademas di esei, una bes no tabata usa nan pa yag wolf mas, hende na Irlanda no a preocupá pa mantené e rasa mas.

Na 1839, un amante di wolfshond a describí nan situacion tristu asina aki: “Ta duele cu e rasa noble aki di cachó ta muriendo rápidamente, i den un par di aña inevitablemente lo bai den extincion a ménos cu hende haci algun esfuerso vigoroso extraordinario.” Tabatin asina tiki wolfshond cu no tabata straño pa hende pretendé cu esun cu nan tin tabata “e último di nan rasa.” Pero nan a sobrebibí.

“Esfuerso vigoroso extraordinario” di hendenan manera George A. Graham, a scapa nan. Na 1862 el a mira nan situacion deplorabel. Dje wolfshondnan cu a resta, el a reuní tur esnan cu e por a haña. Dor di rasa nan cuidadosamente, el a percurá e base necesario pa restorá nan te caminda nan ta awe. Na 1893 un historiadó a bisa cu si no tabata pa Graham, “e relikia canino aki di un rasa poderoso lo por ta awor den extincion.”

Un di nan admiradónan, un rasadó respetá di wolfshond irlandes, Phyllis Gardner, a skirbi: “Den e mundu aki nada no ta sigur, pero, cu excepcion di un catástrofe, ta parce como si fuera e rasa noble aki a scapa di extincion, i ainda ta ganando mas i mas popularidad.”

[Plachi na página 17]

Puppy di wolfshond, rond di cuater siman bieu

[Plachi na página 17]

E wolfshond di bon genio, na Newtownards, Nort Irlanda