Dios, Estado, i Abo

“Iglesia i Estado Ta Topa Otro den Referéndum Riba Divorcio na Irlanda”

ETITULAR aki den The New York Times ta ilustrá con hende awe por ser confrontá cu un situacion den cua nan tin cu scoge entre loke e Estado kier i loke nan iglesia ta siña.

E artículo a declará: “Cu ménos di un luna promé cu un referéndum riba si mester abolí su prohibicion constitucional riba divorcio, Irlanda, caminda e gran mayoria di hende ta católico romano, ta presenciando un choke poco frecuente entre e lidernan di su Gobiernu i esnan di su iglesia.” Estado a proponé pa kita e prohibicion riba divorcio, miéntras cu Iglesia Católico ta oponé divorcio i casamentu di nobo fuertemente. Católiconan irlandes tabatin cu scoge entre Iglesia i Estado. E resultado tabata cu e Estado a gana cu un márgen masha chikitu.

Mas dramáticamente, pa hopi aña hende na Nort Irlanda a ser confrontá cu un conflicto amargo en cuanto soberania nacional. Hopi a ser matá. Católiconan romano i protestantnan tabatin opinionnan

contrario tocante na cua Estado nan mester tabata sumiso: mando británico continuo na Nort Irlanda of un gobiernu centralisá pa henter Irlanda.

Di manera similar, na loke tabata Yugoslavia, e autoridadnan na mando a rekerí pa miembronan di diferente fe, incluyendo católiconan i ortodoxnan, bringa cu otro den un bataya pa teritorio. Pa ciudadanonan averahe, kico tabata nan promé obligacion moral? Nan mester a sigui esnan cu a pretendé di representá Estado, of nan mester a obedecé Dios, kende ta bisa: “Bo no mag mata . . . Bo tin cu stima bo próhimo mescos cu bo mes”?—Romanonan 13:9.

Kisas bo ta pensa cu e tipo di situacion aki nunca por afectá bo. Pero e por. En realidad, e por tocá bo asta awor. Den su buki The State in the New Testament, teólogo Oscar Cullmann ta papia di “decisionnan di bida-i-morto cu cristiannan moderno mester tuma of ta ser exigí di nan pa tuma den situacionnan di desesperacion ora nan ser menasá dor di gobiernunan totalitario.” Sin embargo, e ta papia tambe di “e responsabilidad igualmente real i importante di cada cristian—tambe e cristian cu ta biba bou di asina yamá condicionnan ‘normal,’ ‘di tur dia’—pa enfrentá i contestá un problema serio cu ta confront’é simplemente pasobra e ta un cristian.”

Pues e relacion entre religion i Estado mester interesá cristiannan awe? Esei siguramente mester ta e caso. For dje tempunan di mas antiguo, cristiannan a purba cultivá un punto di bista balansá di autoridadnan seglar. Nan Lider, Jesucristo, a ser husgá, condená i ehecutá dor di Estado romano. Su disipelnan tabatin cu reconciliá nan obligacionnan cristian cu nan debernan pa cu e Imperio Romano. P’esei, un repaso di nan relacion cu e autoridadnan lo percurá guia pa cristiannan awe.

[Plachi na página 3]

Tom Haley/Sipa Press