Famianan sin Tata—Un Indicacion dje Tempu Actual
KICO segun bo ta e problema social mas importante djawe? Casi 80 porciento di esnan entrevistá den un encuesta di Gallup na Merca, ta kere cu esei ta e echo cu “físicamente e tata no ta na cas.” Segun Gallup, mas cu 27 miyon mucha na Merca ta biba separá for di nan tata biológico, i e cantidad ei ta aumentando rápidamente. Un informe dje Fondo di Mucha di Nacionnan Uní ta declará cu rond di 50 porciento di mucha blancu cu a nace na Merca desde 1980 “lo pasa un parti di nan infancia den un famia di un solo mayor. Pa mucha di color e proporcion ta rond di 80%.” P’esei USA Today a designá Merca como “e lider mundial den famianan sin tata.”
Sin embargo, un artículo den The Atlantic Monthly ta remarcá: “E aumento den famianan kibrá no ta sosodé únicamente den e sociedad mericano. E ta bisto den casi tur nacion avansá, incluso Hapon.” I aunke ta difícil pa haña cifranan specífico, ta parce cu hopi pais den desaroyo ta confrontá un crísis similar. Segun e revista World Watch “hopi bes hombernan [den paisnan pober] ta bandoná nan casá i yunan debí na creciente preshon económico.” Sí, un encuesta den un pais caribense a revelá cu solamente 22 porciento di tata cu tin yu di ocho aña a biba realmente huntu cu nan yunan.
Yunan sin tata tabata comun asta den tempu bíblico. (Deuteronomio 27:19; Salmo 94:6) Sin embargo, den e tempu ei ta morto dje tata tabata e motibu principal pakico muchanan a bira yu sin tata. Segun e escritor David Blankenhorn, “awe e causa principal cu no tin tata ta pasobra e tata ta scoge pa bai.” En berdad, manera nos lo bai mira, e cantidad creciente di yunan sin tata ta duna prueba cu hopi hende awe ta sin “cariño natural.” Segun Bijbel, esaki ta djis un prueba mas cu nos ta bibando den “e último dianan.”—2 Timoteo 3:1-3.
Sin embargo, pa un mucha, ora su tata disparcé for di su bida, esei ta bira un tragedia personal. Esei ta iniciá un ciclo di dolor i devastacion cu por tin consecuencianan di largu plaso. P’esei, den e seri di artículo aki nos lo considerá e ciclo ei, no pa desanimá lectornan, sino pa percurá informacion cu por yuda famianan pone un paro na e tendencia destructivo aki.