E Konflikto Entre Siensia i Religion
“Akaso e mihó manera pa komprendé religion ta di kompar’é ku un malesa mental kontagioso?”—Biólogo Richard Dawkins.
HENDE sa mira religion i siensia komo enemigu mortal di otro. Pa algun, e lucha ta mustra asina tenas ku ta un di nan lo tin ku stòp di eksistí pa e otro triunfá.
Na un banda tin algun sientífiko, manera e kímiko Peter Atkins, ku ta kere ku religion ku siensia simplemente no ta bai ku otro. Atkins ta bisa ku e kreensia ku ta Dios a krea algu (pió ainda, tur kos) ta un ofensa kontra inteligensia.
Na otro banda tin hende religioso ku ta kulpa siensia di a kaba ku fe religioso. Hendenan asina ta di opinion ku e siensia di awendia ta un falsedat; su echonan kisas ta korekto, pero e malinterpretashon di e echonan ei ta debilitá e kreensianan di fielnan. Por ehèmpel, biólogo William Provine ta bisa ku darwinismo (e teoria di evolushon biológiko) ta nifiká ku no tin “ningun fundeshi básiko pa étika; ningun nifikashon básiko pa bida.”
Sin embargo, parti di e konflikto a desaroyá debí ku ámbos banda a bini ku afirmashonnan falsu òf ku no por ser komprobá. Pa siglonan, lidernan religioso a siña leyendanan i doktrinanan eróneo ku ta na konflikto ku deskubrimentunan sientífiko moderno i ku no ta basá riba e Skritura inspirá. Por ehèmpel, Iglesia Katóliko Romano a kondená Galileo pasobra el a konkluí—anto korektamente—ku tera ta drei rònt di solo. Niun ora so e punto di bista di Galileo no a kontradisí Beibel, pero sí e tabata kontrali na loke iglesia a siña hende e tempu ei. Di otro banda, sientífikonan tambe ta faya ora nan aseptá e teoria sin base ku bida a evolushoná sin yudansa di Dios for di materia sin bida. Nan ta redikulisá fe komo algu ku no ta sientífiko.
Pues anto, ta posibel pa kere tantu den siensia komo den religion? Sí, por. De echo, siensia komprobá i religion berdadero ta komplementá otro en bes di kontradisí otro.
[Plachi na página 2, 3]
Galileo a siña un bèrdat sientífiko pa kua iglesia a sensur’é