Un Buki Malrepresenta

“E doctrina dje tera su rotacion tantu rond di su as como rond di solo ta falsu, i completamente contrario cu Scritura Santu.” Asina e Congregacion di Index di Iglesia Católico Romano a declará den un decreto na 1616.1 Di berdad Bijbel ta bai en contra di echonan científico? Of el a ser malrepresentá?

DEN winter di 1609/10, Galileo Galilei a dirigí su telescop recien diseñá n’e firmamento i a descubrí cuater luna ta drei rond dje planeta Jupiter. Loke el a mira a desbaratá e creencia dje tempu ei cu tur cuerpo celestial mester ta drei rond dje tera. Anteriormente, na 1543, e astrónomo polaco Nicolaus Copérnicus a lansa e teoria cu e planetanan ta drei rond di solo. Galileo a verificá cu esaki tabata científicamente exacto.

Sin embargo, pa teólogonan católico, esaki tabata herehia. Pa hopi tempu e iglesia a bisa cu e tera tabata e centro dje universo.² E punto di bista aki tabata basá riba un interpretacion literal di textonan bíblico cu a describí e tera como establecí “riba su fundeshinan, pa asina e no move for di su lugá nunka.” (Salmo 104:5, Editorial Evangélica) Yamá na Roma, Galileo a presentá dilanti e Inkisicion. Sometí na examinacion riguroso, el a ser forsá pa hala aden su descubrimentunan, i a pasa e resto di su bida bou di aresto di cas.

Na 1992, un 350 aña despues di Galileo su morto, Iglesia Católico a reconocé finalmente cu tog e tabatin rason.³ Pero si Galileo tabatin rason, ta Bijbel tabata ekibocá anto?

Captando e Berdadero Nificacion di Pasashinan Bíblico

Galileo a kere cu Bijbel ta berdad. Ora su descubrimentunan científico a contradicí e interpretacion cu a duna na cierto versículonan bíblico e tempu ei, el a razoná cu ta teólogonan no a capta e berdadero nificacion dje pasashinan. After all, “dos berdad nunca por contradicí otro,” el a skirbi.⁴ El a mustra cu e términonan exacto di ciencia no ta contradicí e palabranan comun i coriente di Bijbel. Pero teólogonan a para riba nan punto. Nan a insistí cu tur declaracion bíblico tocante e tera mester ser tumá literalmente. Como resultado, no solamente nan a rechasá Galileo su descubrimentunan, sino tambe a keda sin capta e berdadero nificacion di expresionnan bíblico asina.

Di berdad, sentido comun mester bisa nos cu ora Bijbel ta referí na “e cuater skinanan dje tera,” e no kier men cu e escritornan bíblico a comprendé cu e tera ta literalmente cuadrá. (Revelacion 7:1) Bijbel ta skirbí den e lenguahe di hende comun, i hopi bes ta usa comparacionnan gráfico. Pues ora e ta bisa cu e tera tin “cuater skina,” un “fundeshi” duradero, “pedestalnan” i un “piedra di skina,” Bijbel no ta dunando un descripcion científico dje tera; ta obvio cu e ta usando metafora, mescos cu nos ta haci hopi biaha den nos abla diario.a​—Isaías 51:13; Job 38:6.

Den su buki Galileo Galilei, biógrafo L. Geymonat a comentá: “Teólogonan mente cerá cu kier a limitá ciencia a base di razonamentu bíblico no tabata haci nada mas cu desacreditá Bijbel mes.”⁵ I esei ta net loke nan a haci. En realidad, tabata e teólogonan su interpretacion di Bijbel​—no Bijbel mes​—cu a pone restriccionnan irazonabel riba ciencia.

Mescos tambe, awe fundamentalistanan religioso ta malrepresentá Bijbel ora nan ta insistí cu e tera a ser creá den seis dia di 24 ora. (Génesis 1:​3-31) Un punto di bista asina no ta klop ni cu ciencia ni cu Bijbel. Den Bijbel, mescos cu den abla diario, e palabra “dia” ta un término flexibel, cu ta denotá unidadnan di tempu di largura distinto. Génesis 2:4 ta referí na tur seis dia di creacion como un solo “dia” cu ta acapará henter e periodo ei. E palabra hebreo traducí como “dia” den Bijbel por nificá simplemente “un tempu largu.”⁶ Pues, no tin ningun motibu bíblico pa insistí cu e dianan di creacion a dura 24 ora cada un. Siñando lo contrario, fundamentalistanan ta malrepresentá Bijbel.​—Mira tambe 2 Pedro 3:8.

Atrabes di historia, hopi bes teólogonan a troce e Bijbel. Considerá algun otro manera den cua e religionnan di cristiandad a malrepresentá loke Bijbel ta bisa.

Malrepresentá dor di Religion

Esnan cu ta bisa cu nan ta sigui Bijbel, hopi bes ta daña e reputacion dje buki cu nan ta afirmá di ta venerá dor dje cosnan cu nan ta haci. Asina yamá cristiannan a drama sanger un di otro den e nomber di Dios. Sin embargo, Bijbel ta amonestá e siguidónan di Cristo pa “stima otro.”​—Juan 13:​34, 35; Mateo 26:52.

Algun miembro di clero ta pluma nan tou, usando palabra dushi pa kita e placa cu e tou a traha duru p’e; esei no ta parce niun tiki e instruccion bíblico: “Boso a ricibí grátis, duna grátis.”​—Mateo 10:8; 1 Pedro 5:2, 3.

Ta masha cla anto cu no por husga Bijbel segun e palabra i accionnan di esnan cu simplemente ta cit’é of ta afirmá di ta biba na armonia cuné. P’esei, un persona liber di prehuicio mente habrí? lo por kier descubrí pa su mes di kico Bijbel ta trata i pakico e ta un buki asina remarcabel.

[Nota]

[Plachi na página 4]

Dos di Galileo su telescopnan

[Plachi na página 5]

Galileo confrontando su inkisitornan