Miónes di Hende Lo Bai Abo Lo T’ei?
NA UNDA? Na un di e Kongresonan di Distrito “Duna Gloria na Dios” ku lo ser tené na sentenáres di sitio rònt mundu. E programa di tres dia, organisá dor di Testigunan di Yehova, a ser prepará spesialmente pa yuda tur hende ku stima Dios pa biba di tal manera ku nan ta onra nan Kreadó manera e meresé.
E promé dia di e kongreso lo enfoká riba e tema “Digno Bo Ta Yehova, pa Risibí Gloria.” (Revelashon 4:11) “Kreashon Ta Deklará e Gloria di Dios” ta título di un diskurso ku lo yuda nos mira kon e kualidatnan di Yehova ta “wòrdu mirá klaramente” òf ser “komprendí dor di loke a wòrdu trahá.” (Romanonan 1:20) E diskurso klave animador, “Vishonnan Profétiko Glorioso Ta Stimulá Nos!,” lo urgi tur presente pa tene mashá na mente e susesonan sumamente signifikante ku e Palabra di Dios ta profetisá pa nos tempu. “E Profesia di Amos—Su Mensahe pa Nos Tempu” ta título di e simposio di tres parti ku lo enfatisá kon e spièrtamentunan di e profeta di pasado aki ta apliká na nos tempu. “‘E Tera Bunita’—Un Bista Delantá di Paradeis” lo oumentá nos apresio pa e region ku Yehova a duna na su pueblo di pasado.
E di dos dia di kongreso lo karga e tema “Konta di Su Gloria Meimei di e Nashonnan,” basá riba Salmo 96:3. Entre e puntonan sobresaliente lo tin un simposio titulá “Reflehá Manera Spil e Gloria di Yehova.” E presentashon aki di tres parti lo deskribí kon nos por efektuá nos sirbishi mas efikasmente. Despues di e diskurso “Odiá sin Motibu,” lo tin e diskurso di dedikashon i e boutismo, ku ta parti di tur kongreso di Testigunan di Yehova. E diskurso di atardi “Tene Kuidou ku ‘Bos di Hende Straño’” lo duna spièrtamentu oportuno relashoná ku “siñadónan falsu” ku ta purba gaña e pueblo di Dios ku “palabranan di engaño.” (2 Pedro 2:1, 3) “Nos Yunan—Un Herensia Presioso” lo ta e último parti riba programa pa e dia ei. Lo e ta un dushi okashon pa mayornan i tambe pa e chikitinnan.
E último dia di kongreso lo desaroyá e tema “Hasi Tur Kos pa e Gloria di Dios.” (1 Korintionan 10:31) Un seri di entrevista lo kompañá e diskurso titulá “Kon Hóbennan Ta Alabando Yehova.” E seshon di mainta lo tin tambe un drama di 45 minüt titulá “Nan A Duna Testimonio ku Kurashi Apesar di Oposishon.” Komo ku religion ta konstantemente den notisia, e diskurso públiko lo trata e pregunta: “Ken Awe Ta Duna Gloria na Dios?” E diskurso “Sigui ‘Duna Hopi Fruta’ pa e Gloria di Yehova” lo hiba e kongreso na un final emoshonante.
Esakinan ta djis algun di e presentashonnan motivador ku lo bo por skucha na e Kongreso di Distrito “Duna Gloria na Dios” di Testigunan di Yehova. Sigur lo bo kier ta presente tur e tres dianan. Si bo ke sa kua ta e kongreso mas serka di bo, tuma kontakto ku e Salòn di Reino lokal di Testigunan di Yehova òf skirbi e publikadónan di e revista aki.