4. Dios A Krea Nos Pa Nos sufri?

Dikon Ta Importante pa Sa e Kontesta?

E kontesta riba e pregunta akí tin efekto riba e manera ku nos ta mira bida.

Pensa Riba Esaki

Ta lógiko ku Dios a krea tera asina bunita i na mes momento krea hende pa sufri?

Ora hende pensa riba tur e sufrimentunan ku tin, hopi di nan ta kuminsá duda den Dios. Nan ta pensa ku sea (1) Dios no tin poder pa kaba ku sufrimentu, (2) Dios no ta interesá den kaba ku sufrimentu òf (3) Dios no ta eksistí.

Pero e pensamentunan akí ta korekto?

Loke Beibel Ta Bisa

Dios no a krea nos pa nos sufri.

E ke pa nos disfrutá di bida.

“No tin nada mihó pa hende, ku regosihá i hasi bon den su bida, i tambe ku tur hende por kome i bebe i mira e bon ku tin den tur su trabou—esaki ta e regalo di Dios.”​—EKLESIÁSTES 3:12, 13.

Ora Dios a krea e promé pareha, el a duna nan tur loke nan tabatin mester pa nan por ta felis.

E no tabata ke pa nan ni nan desendientenan sufri.

“Dios a bisa nan: ‘Sea fruktífero i multipliká, i yena e tera i hasi esaki someté na bo.’”​—GÉNESIS 1:28.

E promé pareha a disidí di desobedesé Dios.

Komo resultado, nan a kousa hopi sufrimentu tantu pa nan mes komo pa nan desendientenan.

“Pa medio di un hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.”​—ROMANONAN 5:12.a

Dios no a krea nos pa biba sin su guia.

Meskos ku ta imposibel pa hende biba bou di awa, asina tambe ta imposibel pa hende goberná nan mes.

“No ta keda na hende pa dirigí su pasonan.”​—YEREMÍAS 10:23.

Dios no ke pa nos sufri.

E ta duna nos konseho ku por yuda nos evitá hopi problema.

“Mara bo a pone atenshon na mi mandamentunan! E ora ei bo pas lo tabata manera un riu.”​—ISAÍAS 48:18.