Jakòb Ta Bai Haran

BO SA ken e hòmbernan ku ta papia ku Jakòb ta? Despues di a kana hopi dia, Jakòb a topa ku nan banda di un pos. Nan tabata kuida nan karnénan. Jakòb a puntra nan: ‘Di unda boso ta?’

Nan a bisa: ‘Di Haran.’

Jakòb a puntra nan: ‘Boso konosé Laban?’

Nan a kontestá: ‘Sí. Mira, su yu muhé Raquel ta bini ku su tou di karné.’ Bo ta mira Raquel ei biniendo djaleu?

Ora Jakòb a mira Raquel ku e karnénan di su tio Laban, Jakòb a bai i a hala e piedra for di e pos pa e karnénan por a bebe. Anto Jakòb a duna Raquel un sunchi i a bis’é ken e ta. Raquel a alegrá mashá i a bai kas i a konta su tata Laban.

Laban a keda masha kontentu pa laga Jakòb keda serka dje. I ora Jakòb a pidi pa Raquel komo su esposa, Laban a keda kontentu. Sin embargo, el a pidi Jakòb pa traha den su kunuku shete aña komo pago pa Raquel. Dor ku Jakòb a stima Raquel asina tantu, el a hasi esei. Pero, ora e tempu a yega pa e kasamentu, bo sa kiko a sosodé?

Laban a duna Jakòb su yu muhé mayó, Lea, en bes di Raquel. Ora Jakòb a kumbiní pa traha pa Laban shete aña mas, Laban a dun’é Raquel tambe komo su esposa. N’e tempu ei Dios a permití hòmber tin mas ku un esposa. Pero awor, segun Beibel, un hòmber mester tin un esposa so.