E Famia Grandi di Jakòb

WAK e famia grandi ei. Eseinan ta e 12 yu hòmbernan di Jakòb. Pero e tabatin yu muhé tambe. Bo sa nòmber di e yunan? Ban siña algun di nan.

Lea a duna lus na Ruben, Simeon, Leví i Huda. Ora Raquel a mira ku e no ta haña yu, el a bira masha tristu. P’esei el a duna Jakòb su kriá Bilha, i Bilha a haña dos yu, Dan i Nèftalí. Anto Lea tambe a duna su kriá Zilpa na Jakòb, i Zilpa a duna lus na Gad i Aser. Finalmente Lea a haña dos yu mas, Isakar i Zabulon.

Por fin Raquel por a haña un yu. El a yam’é Hosé. Despues nos lo siña hopi mas tokante Hosé, pasobra el a bira un persona masha importante. Eseinan tabata e 11 yunan di Jakòb ku a nase ora e tabata biba serka Laban, tata di Raquel.

Jakòb tabatin algun yu muhé tambe, pero Beibel ta menshoná e nòmber di un di nan so. Su nòmber tabata Dina.

E tempu a yega ora Jakòb a disidí di bandoná Laban i regresá Kánaan. P’esei el a reuní su famia grandi i su tou grandi di karné i di baka, i el a kuminsá e biahe largu.

Despues ku Jakòb i su famia a establesé nan mes na Kánaan pa un tempu, Raquel a duna lus na un otro yu hòmber. Esei a sosodé miéntras ku nan tabata di biahe. Raquel tabatin problema pa haña yu, i finalmente a muri hañando yu. Pero e beibi a nase bon. Jakòb a dun’é e nòmber Benjamin.

Nos ke kòrda nòmber di e 12 yunan di Jakòb pasobra tur e nashon di Israel a bini di nan. De echo, e 12 tribunan di Israel ta karga nòmber di 10 yu di Jakòb i dos yu di Hosé. Isaak a keda biba hopi aña despues ku tur e muchanan ei a nase, i e mester a keda masha kontentu pa haña asina tantu nietu. Pero, laga nos mira kiko a sosodé ku su nieta, Dina.