Gideon i Su 300 Hòmbernan

BO TA mira kiko ta sosodé ei? Tur e hendenan ei ta hòmbernan di guera di Israel. E hòmbernan ku ta bùk abou ta bebiendo awa. E hòmber ku ta pará serka nan ta Hues Gideon. E ta wak kon nan ta bebe awa.

Wak bon e diferente maneranan ku e hòmbernan ta bebe awa. Algun ta baha ku nan kara te serka di e awa. Pero un di nan ta kohe e awa den su man i hib’é su boka, di manera ku e por wak kiko ta sosodé rònt di dje. Esei ta importante, pasobra Yehova a bisa Gideon pa skohe solamente hòmbernan ku ta sigui vigilá miéntras ku nan ta bebe awa. Dios a bisa ku e mester manda e otronan kas. Ban mira pakiko.

E israelitanan tabata den hopi difikultat atrobe. E motibu ta ku nan no a obedesé Yehova. E hendenan di Madian tabata dominá nan i hasi nan daño. P’esei e israelitanan a sklama na Yehova pa yudansa, i Yehova a tende nan sklamashon.

Yehova a bisa Gideon pa forma un ehérsito, i p’esei Gideon a reuní 32.000 hòmber di guera. Pero tabatin un ehérsito di 135.000 hòmber kontra Israel. I tòg Yehova a bisa Gideon: ‘Bo tin muchu hende.’ Pakiko Yehova a bisa esei?

Pasobra si Israel gana e guera, nan por a pensa ku ta nan mes a gan’é. Nan por a pensa ku nan no tabatin mester di yudansa di Yehova pa nan a gana. P’esei Yehova a bisa Gideon: ‘Bisa tur hende ku tin miedu, bai kas numa.’ Ora Gideon a hasi esei, 22.000 hòmber di guera a bai kas. Esei a lag’é ku 10.000 hòmber so pa bringa kontra tur e 135.000 sòldánan.

Pero, skucha! Yehova a bisa: ‘Ainda bo tin muchu hende.’ P’esei el a bisa Gideon laga e hòmbernan bebe awa na e riu, anto tur hende ku baha ku nan kara te den awa pa bebe, e mester a manda kas. ‘Mi ta duna bo e viktoria ku e 300 hòmbernan ku ta sigui vigilá miéntras ku nan ta bebe,’ Yehova a primintí.

Tempu a yega pa e bataya. Gideon a parti su 300 hòmbernan den tres grupo. El a duna kada hòmber un kachu i un poron ku un flambeu den dje. Ora ku a bira rònt di mei anochi, nan tur a reuní rònt di e kampamentu di sòldá enemigu. Anto na mesun momento nan tur a supla nan kachu, a kibra nan poron i a grita: ‘E spada di Yehova i di Gideon!’ Ora e sòldánan enemigu a lanta, nan tabata konfundí i yen di miedu. Nan tur a kuminsá kore, i e israelitanan a gana e bataya.