Gídeòn A Derotá e Madianitanan

Despues di un tempu, Israel a bolbe kuminsá hasi loke ta malu den bista di Yehova, i nan a kuminsá adorá dios falsu. P’esei, shete aña largu Yehova a laga e madianitanan hòrta nan bestianan i destruí loke nan tabata planta. Pa e israelitanan skapa di e madianitanan, nan a bai skonde den kueba i den seru. E israelitanan a pidi Yehova pa por fabor yuda nan. P’esei, Yehova a manda un angel pa bai serka un mucha hòmber ku yama Gídeòn. E angel a bisa Gídeòn: ‘Yehova a skohe abo pa salba Israel.’ Gídeòn a puntr’é: ‘Kon ami por salba Israel? Ami no ta importante.’

Gídeòn kier a haña sa sigur ku Yehova a skoh’é pa salba Israel. P’esei, el a pone un pida lana di karné abou i el a bisa Yehova: ‘Si mañan mainta e pida lana ta muhá pero e flur rònt di dje keda seku, e ora ei mi sa ku Yehova ke pa mi salba Israel.’ E siguiente mainta, e lana tabata papa muhá pero e flur rònt di e lana tabata seku seku! Pero Gídeòn kier a hasi un tèst mas, p’esei, el a pidi Yehova pa e biaha akí e laga e pida lana keda seku i e flur bira muhá. I esei ta nèt loke a pasa. Awor sí Gídeòn tabatin sigur ku Yehova a skoh’é. Despues di esei, el a yama su sòldánan pa bai bringa kontra e madianitanan.

Yehova a bisa Gídeòn: ‘Mi ta bai yuda e israelitanan gana e bataya. Pero Yehova no tabata ke pa nan pensa ku nan a gana e bataya sin su yudansa. P’esei, el a bisa Gídeòn ku e tin muchu sòldá i pa e manda e sòldánan ku tin miedu kas bèk.’ Anto 22.000 sòldá a bai kas i 10.000 sòldá a keda. Pero Yehova a bisa: ‘Ainda tin muchu hopi sòldá. Mi ke hasi un tèst mas. Laga e sòldánan bai bebe awa na un riu. I keda ku solamente e sòldánan ku ta wak rònt si e enemigunan ta bin ora nan ta bebe awa.’ Anto 300 sòldá so a keda alerta miéntras nan tabata bebe awa. Yehova a primintí ku e grupo chikitu akí lo gana e bataya kontra e 135.000 sòldánan madianita.

E anochi ei, Yehova a bisa Gídeòn: ‘Ta ora pa bai ataká e madianitanan!’ Gídeòn a duna kada un di su sòldánan un kachu i un poron grandi ku un flambeu skondí den dje. El a bisa nan: ‘Wak kiko mi ta hasi, i hasi meskos ku mi.’ Gídeòn a supla su kachu, dal su poron kibra na pida pida, zuai su flambeu i grita: ‘E spada di Yehova i di Gídeòn!’ Tur 300 sòldá a hasi loke Gídeòn a hasi. E madianitanan tabata morto spantá, i nan a kuminsá kore pa loko den tur direkshon. Nan a pèrdè kabes i kuminsá ataká otro. Un biaha mas, Yehova a yuda e israelitanan gana e bataya kontra nan enemigunan.