Dikon David Mester A Hui

DESPUES ku David a mata Goliat, Abner, hefe di ehérsito di Israel a hib’é serka Saul. Saul a keda masha kontentu ku David. El a hasié hefe di su ehérsito i a hib’é pa biba den kas di rei.

Despues, ora e ehérsito a regresá di un bataya kontra e filisteonan, e hende muhénan a kanta: ‘Saul a mata míles, pero David a mata desénas di míles.’ Esei a hasi Saul yalurs, pasobra nan a duna mas onor na David ku na Saul. Pero Jonatan, yu di Saul, no tabata yalurs. E tabata stima David masha hopi, i David tambe tabata stima Jonatan. P’esei nan dos a primintí otro ku semper nan lo keda amigu.

David tabata un bon tokadó di arpa, i Saul tabata gusta e músika ku e tabata toka. Pero un dia e envidia di Saul a pon’é hasi un kos teribel. Ora David tabata toka arpa, Saul a kohe su lansa i a tir’é, bisando: ‘Mi ta bai klaba David den muraya!’ Pero David a hala, i e lansa a hera. Despues Saul a hera David atrobe ku su lansa. Asina David tabata sa ku e mester a tene masha kuidou.

Bo ta kòrda e promesa ku Saul a hasi? El a bisa ku e lo duna su yu muhé komo esposa na esun ku mata Goliat. Porfin Saul a bisa David ku e por haña su yu muhé Mikal, pero promé e mester a mata 100 filisteo enemigu. Imaginá bo! Loke Saul tabata spera ta ku e filisteonan lo a mata David. Pero nan no a mat’é, i p’esei el a duna su yu muhé komo esposa na David.

Un dia Saul a bisa Jonatan i tur su sirbidónan ku e ke mata David. Pero Jonatan a bisa su tata: ‘No hasi daño na David. E no a hasi bo nada malu nunka. Mas bien, tur loke el a hasi a yuda bo hopi. El a riska su bida ora el a mata Goliat, i ora bo a mira esei bo a keda kontentu.’

Saul a skucha su yu, i a primintí di no hasi David daño. Nan a trese David bèk, i el a sirbi Saul den su kas atrobe meskos ku promé. Sin embargo, un dia ora David tabata toka músika, Saul a tira su lansa atrobe riba David. David a hala, i e lansa a dal den muraya. Esei tabata di tres bes! Awor David a haña sa ku e mester hui!

E anochi ei David a bai su mes kas. Pero Saul a manda algun hòmber pa mat’é. Mikal tabata sa kiko su tata tabatin planiá pa hasi. P’esei el a bisa David: ‘Si bo no hui awe nochi, lo bo manesé morto.’ E anochi ei Mikal a yuda David hui dor di un bentana. Pa kasi shete aña David tabatin ku skonde den un lugá tras di otro pa Saul no hañ’é.