David i Saul

Despues ku David a mata Góliat, Rei Saul a pone David na kabes di su ehérsito. David a gana hopi guera, i el a bira famoso. Kada biaha ku David a bini for di guera e hende muhénan tabata sali bailando i kanta: “Saul a mata míles di enemigu, pero David a mata míles i míles di enemigu!” Saul a bira yalurs riba David, i e tabata kier a mat’é.

David tabata toka arpa masha bon. Un dia, miéntras David tabata toka arpa pa Saul, e rei a tira sper riba dje. David a skapa nèt na tempu, i e sper a dal kontra muraya. Despues di esei, Saul a purba di mata David vários biaha. Al final, David a hui i skonde den desierto.

Saul a bai buska David ku 3.000 sòldá. Pa kasualidat, Saul a drenta den e mesun kueba kaminda David i e hòmbernan ku tabata kuné a skonde. E hòmbernan ku tabata huntu ku David tabata flùister: ‘Awe ta e dia pa mata Saul.’ Ketu ketu, David a kana bai kaminda Saul tabata, i el a kòrta pida di rei su mantel. Saul no a ripará esei. Despues, David a sintié hopi malu, pasobra e no a mustra rèspèt pa e rei ku Yehova a ungi. E no a laga e hòmbernan ku tabata huntu kuné ataká Saul. El a asta yama Saul na bos haltu i bis’é ku e por a mat’é ora e tabatin chèns pa hasi esei. Saul lo a stòp di buska pa mata David?

Nò. Saul a sigui persiguí David. Un anochi, David i su subrino Abisai a drenta kuchikuchi e kampamentu di Saul. Asta e wardaespalda di Saul, Abner, tabata na soño. Abisai a bisa: ‘Esaki ta nos chèns! Laga mi mat’é.’ David a bisa: ‘Yehova mes lo atendé ku Saul. Pero, kohe su sper i su poron di awa, i laga nos ban.’

Despues, David a subi un seru ku tabata serka. For di einan, e por a mira e kampamentu di Saul. David a grita: ‘Abner, dikon bo no a protehá bo rei? Unda rei su sper i su poron di awa ta?’ Saul a rekonosé stèm di David i el a bisa: ‘Bo por a mata mi, pero bo no a hasié. Mi sa ku abo lo ta e siguiente rei di Israel.’ Saul a bai su palasio bèk. Pero, no ta tur hende den e famia di Saul tabata odia David.