Difikultat den David Su Kas

DESPUES ku David a kuminsá reina na Yerusalèm, Yehova a duna su ehérsito hopi viktoria riba nan enemigunan. Yehova a primintí di duna e tera di Kánaan na e israelitanan. I awor, ku ayudo di Yehova, tur e tera ku a ser primintí na nan finalmente a bira di nan.

David tabata un bon gobernante. El a stima Yehova. P’esei, un di e promé kosnan ku el a hasi despues di a kapturá Yerusalèm tabata di hiba e arka di pakto di Yehova einan. Tambe e tabata ke traha un tèmpel pa pon’é aden.

Ora David a bira mas bieu, el a kometé un eror grave. E tabata sa ku ta malu pa tuma kos di otro hende. Pero un atardi, den balkon riba dak di su palasio, el a wak abou i a mira un dama mashá bunita. Su nòmber ta Bètsabé, i su kasá ta un sòldá di David yamá Urias.

David a deseá Bètsabé asina tantu ku el a laga tres’é na su palasio. Su esposo tabata leu den guera. Wèl, David a drumi kuné i despues el a sali na estado. David a keda masha preokupá i a manda rospondi pa Joab, hefe di su ehérsito, p’e pone Urias te dilanti den e bataya pa e wòrdu matá. Despues di morto di Urias, David a kasa ku Bètsabé.

Yehova a rabia mashá ku David. P’esei el a manda su sirbidó Natan pa bis’é di su pikánan. Bo por mira Natan ei papiando ku David. David a sinti masha duele di loke el a hasi i p’esei Yehova no a dun’é kastigu di morto. Pero Yehova a bisa: ‘Dor ku bo a hasi e mal kosnan ei, lo tin hopi difikultat den bo kas.’ I ki difikultat David tabatin!

Promé e yu di Bètsabé a muri. Despues Amnon, e yu mayó di David, a obligá su ruman muhé Tamar pa drumi kuné. Absalon, yu di David, a bira asina rabiá ku el a mata Amnon. Mas despues, Absalon a gana fabor di hopi hende, i a hasi su mes rei. Finalmente, David a gana e guera kontra Absalon, kende a ser matá. Sí, David tabatin hopi difikultat.

Durante tur esei, Bètsabé a duna lus na un yu yamá Salomon. Despues ora David tabata bieu i malu, su yu Adonías a purba hasi su mes rei. P’esei David a laga e saserdote ku yama Sadok basha zeta riba kabes di Salomon pa mustra ku ta Salomon lo bira rei. Pronto despues David a muri na edat di 70 aña. El a reina pa 40 aña, pero awor Salomon a bira rei di Israel.