E Piká Ku Rei David A Hasi

Ora Saul a muri, David a bira rei. E tabatin 30 aña. David tabatin vários aña komo rei, i riba un anochi, for di dak di su palasio, el a mira un hende muhé mashá bunita. David a haña sa ku e yama Batseba i ku e tabata kasá ku un sòldá ku yama Urías. David a manda buska Batseba i tres’é na su palasio. David a tene relashon seksual ku Batseba i Batseba a sali na estado. David a purba di skonde loke el a hasi. El a bisa su komandante pa pone Urías te dilanti den e bataya i bai lag’é su so. Despues ku nan a mata Urías den bataya, David a kasa ku Batseba.

Pero, Yehova a mira tur e kosnan malu ku a sosodé. P’esei, Yehova a manda Profeta Nátan serka David. Nátan a bisa: ‘Un hòmber riku tabatin hopi karné, i un hòmber pober tabatin un karné so ku e tabata stima mashá. E hòmber riku a bai ku e úniko karné di e hòmber pober.’ David a rabia i el a bisa: ‘E hòmber riku ei mester muri!’ E ora ei, Nátan a bisa David: “Ta abo ta e hòmber ei!” David tabata hopi tristu, i el a bisa Nátan: “Mi a peka kontra Yehova.” E piká ei a kousa hopi problema pa David i pa David su famia. Yehova a kastigá David, pero el a laga David na bida pasobra David tabata onesto i humilde.

David tabata ke traha un tèmpel pa Yehova, pero Yehova a skohe David su yu hòmber, Sálomon, pa traha e tèmpel. David a kuminsá prepará tur kos pa Sálomon i el a bisa: ‘Yehova su tèmpel mester ta impreshonante. Sálomon ta yòn ainda, pero lo mi yud’é prepará tur kos.’ David a duna hopi di su mes plaka pa e trabou di konstrukshon. El a buska hopi trahadó eksperto. El a trese oro, plata i palu di seda for di Tiro i Sídòn. Kasi na final di David su bida, el a duna Sálomon e plan di konstrukshon pa traha e tèmpel. El a bisa: ‘Yehova a bisa mi pa traha un plan di konstrukshon i pa skirbi tur kos pa bo. Yehova lo yuda bo. No tene miedu. Sea fuerte i kuminsá traha.’