E Muraya di Yerusalèm

MIRA tur e trabou ku nan ta hasi ei. E israelitanan ta okupá lantando e muraya di Yerusalèm. Ora Rei Nabukodonosor a destruí Yerusalèm 152 aña pasá, el a tumba e muraya i a kima porta di e stat. E israelitanan no a reedifiká e muraya ora nan a bolbe for di Babilonia.

Kon bo ta kere ku e pueblo a sinti nan bibando ei tantu aña sin muraya rònt di nan stat? Nan no a sinti nan sigur. Nan enemigunan por a ataká nan fásilmente. Pero awor e hòmber ei, Nehemias, por fin ta yuda e pueblo reedifiká e muraya. Bo sa ken Nehemias ta?

Nehemias ta un israelita ku a bin di e stat Susa, unda Mardokeo i Ester ta biba. Nehemias tabata traha den palasio di e rei, pues kisas e tabata un bon amigu di Mardokeo i Reina Ester. Pero Beibel no ta bisa ku Nehemias a traha pa Rei Asuero, esposo di Ester. El a traha p’e siguiente rei, Rei Artaherhes.

Lo bo kòrda ku Artaherhes tabata e bon rei ku a duna Esdras tantu plaka pa e hiba Yerusalèm pa drecha e tèmpel di Yehova. Pero Esdras no a lanta e muraya kibrá di e stat. Laga nos mira kon bin Nehemias a hasi e trabou aki.

Diestres aña a pasa desde ku Artaherhes a duna Esdras e plaka pa drecha e tèmpel. Awor Nehemias ta e kopero prinsipal di Rei Artaherhes. Esei ke men ku e tabata sirbi biña pa e rei, i hasi sigur pa ningun hende no venená e rei. Su trabou tabata masha importante.

Wèl, un dia Hanani, ruman hòmber di Nehemias, i otro hende di e tera di Israel a bin pa bishitá Nehemias. Nan a kont’é di e problemanan ku e israelitanan tabatin, i ku e muraya di Yerusalèm tabata kibrá ainda. Esei a hasi Nehemias masha tristu, i el a hasi orashon na Yehova tokante dje.

Un dia e rei a ripará ku Nehemias ta tristu, i el a puntr’é: ‘Pakiko bo ta tristu?’ Nehemias a bis’é ku esei ta debí na e mal estado di Yerusalèm i ku su muraya ta kibrá. E rei a puntra: ‘Kiko bo ke?’

Nehemias a kontestá: ‘Laga mi bai Yerusalèm pa reedifiká e muraya.’ Rei Artaherhes tabata masha bondadoso. El a bisa ku Nehemias por bai, i e rei a yud’é haña palu pa konstruí algun kos. Pronto despues ku Nehemias a yega Yerusalèm, el a bisa e pueblo di su plan. Nan a gusta e idea, i a bisa: ‘Ban kuminsá traha.’

Ora e enemigunan di e israelitanan a mira nan ta lanta e muraya, nan a bisa: ‘Ban mata nan i pone fin na e trabou.’ Pero Nehemias a tende esei, i el a duna e trahadónan spada i lansa. I el a bisa: ‘No tene miedu di nos enemigunan. Bringa pa boso rumannan, boso yunan, boso esposa i pa boso kas.’

E pueblo tabatin hopi kurashi. Nan a keda ku nan arma na man di dia i anochi, i a sigui traha. P’esei den 52 dia so nan a kaba e muraya. Awor e pueblo a sinti nan sigur den e stat. Nehemias i Esdras a siña e pueblo e lei di Dios, i e pueblo a keda kontentu.

Pero ainda kosnan no tabata meskos ku promé ku nan a hiba e israelitanan prezu na Babilonia. E pueblo tabata bou di dominio di e rei di Persia i nan tabatin ku sirbié. Pero Yehova a primintí ku lo e manda un rei nobo, i ku e rei ei lo trese pas pa e pueblo. Ken e rei ei ta? Kon e lo trese pas na tera? Rònt di 450 aña a pasa promé ku nan a siña mas tokante esei. E ora ei un beibi sumamente importante a nase. Pero esei ta un otro kuenta.