BIBLIOTEKA ONLINE Watchtower
Watchtower
BIBLIOTEKA ONLINE
Papiamentu (Kòrsou)
  • BEIBEL
  • PUBLIKASHON
  • REUNION
  • w98 15/10 pág. 13-19
  • Jerusalem—E Ta ‘Mas Haltu Cu Bo Causa Principal di Alegria’?

No tin vidio disponibel pa esaki.

Despensa, tin un problema pa habri e vidio.

  • Jerusalem—E Ta ‘Mas Haltu Cu Bo Causa Principal di Alegria’?
  • E Toren di Vigilansia Anunsiando e Reino di Yehova Dios—1998
  • Suptema
  • Informashon Similar
  • Bendicion i Responsabilidad
  • Oposicion di Parti di Bisiñanan Envidioso
  • Problemanan Interno
  • E Muraya di Jerusalem A Bini Cla
  • Puntonan Sobresaliente di e Buki di Nehemias
    E Toren di Vigilansia Anunsiando e Reino di Yehova Dios—2006
  • Sigui “Vense Malu ku Bon”
    E Toren di Vigilansia Anunsiando e Reino di Yehova Dios—2007
  • Un Jerusalem Consistente cu Su Nomber
    E Toren di Vigilansia Anunsiando e Reino di Yehova Dios—1998
  • E Muraya di Yerusalèm
    Mi Buki di Relato Bíbliko
Mas Artíkulo
E Toren di Vigilansia Anunsiando e Reino di Yehova Dios—1998
w98 15/10 pág. 13-19

Jerusalem—E Ta ‘Mas Haltu Cu Bo Causa Principal di Alegria’?

“Laga mi lenga pega na mi shel’i boca, . . . si mi no laga Jerusalem subi mas haltu cu mi causa principal di alegria.”—SALMO 137:6.

1. Ki actitud hopi exiliado hudiu tabatin pa cu e stad scogí di Dios?

CASI shete década a pasa desde cu e promé exiliadonan hudiu a regresá Jerusalem na 537 P.E.C. E tempel di Dios a ser reconstruí, pero ainda e stad tabata den ruina. Miéntras tantu, un generacion nobo a lanta den exilio. Sin duda, hopi di nan a sinti manera e salmista cu a canta: “Si mi lubidá bo, O Jerusalem, laga mi man drechi ser lubidadó.” (Salmo 137:5) Algun a haci mas cu djis recordá Jerusalem; nan a proba cu nan accionnan cu el a subi “mas haltu cu [nan] causa principal di alegria.”—Salmo 137:6.

2. Ken Esdras tabata, i con el a ser bendicioná?

2 Tuma por ehempel e sacerdote Esdras. Asta promé cu el a regresá su patria, el a promové celosamente e interesnan di adoracion puru den Jerusalem. (Esdras 7:6, 10) Esdras a ser bendicioná ricamente pa esei. Jehova Dios a move curason dje rey di Persia p’e otorgá Esdras e privilegio di dirigí un otro grupo di exiliado cu a regresá Jerusalem. Ademas, e rey a duna nan un contribucion grandi di oro i plata “pa haci e cas di Jehova bunita.”—Esdras 7:21-27.

3. Con Nehemías a mustra cu Jerusalem tabata su preocupacion principal?

3 Rond di 12 aña despues, tabatin un otro hudiu cu a tuma accion decisivo—Nehemías. El a sirbi den e palacio perso na Susa. E tabatin un posicion prestigioso como copero di Rey Artahérhes, pero esei no tabata Nehemías su “causa principal di alegria.” Mas bien, el a deseá pa bai i reconstruí Jerusalem. Pa lunanan Nehemías a haci oracion tocante esaki, i Jehova Dios a bendicion’é pa esei. Ora e rey di Persia a haña sa di Nehemías su preocupacion, el a dun’é un forsa militar i cartanan cu a autoris’é pa reconstruí Jerusalem.—Nehemías 1:1–2:9.

4. Con nos por mustra cu e adoracion di Jehova ta mas haltu cu cualkier otro causa di alegria cu nos por tin?

4 Sin duda, Esdras, Nehemías i hopi hudiu cu tabata cooperá cu nan a duna prueba cu e centro di Jehova su adoracion den Jerusalem tabata mas importante cu cualkier otro cos—cu e tabata ‘mas haltu cu nan causa principal di alegria,’ esta, mas haltu cu cualkier otro cos cu por a haci nan alegrá. E individuonan ei ta un gran animacion pa tur hende awe cu ta mira Jehova, su adoracion i su organisacion dirigí pa spiritu den e mésun manera! Esei ta e caso cu bo? Abo ta mustra mediante bo awante den obranan piadoso cu bo mayor causa di alegria ta e privilegio di adorá Jehova huntu cu su pueblo dedicá? (2 Pedro 3:11) Como animacion adicional den esaki, laga nos considerá e bon resultadonan di Esdras su biahe pa Jerusalem.

Bendicion i Responsabilidad

5. Ki bendicionnan ricu a bini p’e habitantenan di Huda den tempu di Esdras?

5 E grupo di rond di 6.000 exiliado cu a bolbe bek bou dje guia di Esdras a trece contribucionnan di oro cu plata p’e tempel di Jehova. Esakinan a yega na rond di 63 miyon florin na tarifanan actual. Esaki tabata mas o ménos shete biaha mas tantu oro i plata cu e promé exiliadonan a logra trece. E habitantenan di Jerusalem i Huda mester a keda sumamente gradicidu na Jehova ora nan a ricibí tur e apoyo humano i material aki! Pero bendicion ricu di parti di Dios ta trece responsabilidad tambe.—Lucas 12:48.

6. Kico Esdras a descubrí den su patria, i con el a reaccioná?

6 Un poco tempu despues Esdras a descubrí cu hopi hudiu, incluyendo algun sacerdote i anciano, a violá e Ley di Dios dor di casa cu muhernan pagano. (Deuteronomio 7:3, 4) Cu bon motibu, e tabata masha afligí tocante e violacion aki dje pacto dje Ley di Dios. “Manera mi a tende di e cos aki mi a sker mi paña i mi mantel sin manga, . . . i mi a keda sintá turdí.” (Esdras 9:3) Anto, cu israelitanan ansioso presente, Esdras a habri su curason den oracion na Jehova. Esdras a repasá pa tur por a tende Israel su pasado desobediente i e spiertamentu di Dios di loke lo a sosodé si nan casa cu e habitantenan pagano dje pais. El a concluí: “O Jehova e Dios di Israel, bo ta hustu, pasobra nos a keda manera un pueblo cu a scapa, manera riba e dia aki. Aki nos ta dilanti bo den nos culpabilidad, pasobra ta imposibel pa para dilanti bo pa causa di esaki.”—Esdras 9:14, 15.

7. (a) Ki ehempel excelente Esdras a pone den trata cu malecho? (b) Con esnan culpabel a reaccioná den tempu di Esdras?

7 Esdras a usa e expresion “nos.” Sí, el a incluí su mes, aunke e no tabata personalmente culpabel. Esdras su afliccion profundo huntu cu su oracion humilde a conmové curason dje pueblo i a motivá nan na obra cu ta pas cu repentimentu. Boluntariamente nan a ofrecé un solucion doloroso—tur cu a violá e Ley di Dios lo a manda nan esposa stranhero bek pa nan patria, huntu cu e yunan cu nan a haña cu nan. Esdras a bai di acuerdo cu e medida aki i a animá esnan culpabel pa actua conforme cuné. Cu e autoridad cu e rey di Persia a otorgá Esdras, e tabatin e derecho di ehecutá tur kibradó di ley of core cu nan for di Jerusalem i Huda. (Esdras 7:12, 26) Pero ta parce cu e no tabatin nodi tuma tal accion. “Henter e congregacion” a bisa: “Exactamente conforme cu bo palabra ta bini riba nos pa haci.” Ademas, nan a confesá: “Nos a rebelá na un grado extenso den e asuntu aki.” (Esdras 10:11-13) Esdras capítulo 10 ta mencioná nomber di 111 homber cu a obedecé e decision i a manda nan esposanan stranhero i e yunan cu nan a haña cu nan bai.

8. Pakico e accion drástico di manda esposanan stranhero bai tabata na interes di henter humanidad?

8 E accion aki no tabata na interes di Israel so, sino tambe di henter humanidad. Si no a haci nada pa corigí e asuntu, e israelitanan lo por a mescla i perde den e nacionnan rond di nan. Den e caso ei, e liña di desendencia cu mester a hiba n’e Simia Primintí pa bendicioná henter humanidad lo a ser contaminá. (Génesis 3:15; 22:18) Lo tabata difícil pa establecé e identidad dje Simia Primintí como desendiente di Rey David dje tribu di Huda. Rond di 12 aña despues, e asuntu vital aki a haña atencion atrobe ora “e simia di Israel a pasa na separá nan mes for di tur e stranheronan.”—Nehemías 9:1, 2; 10:29, 30.

9. Ki bon conseho Bijbel ta duna cristiannan cu ta casá cu hende no-creyente?

9 Kico Jehova su sirbidónan di tempu actual por siña for dje relato aki? Wel, cristiannan no ta bou dje pacto di Ley. (2 Corintionan 3:14) Mas bien, nan ta obedecé “e ley di Cristo.” (Galationan 6:2) Pues, un cristian casá cu un incrédulo ta cumpli cu e conseho di Pablo: “Si un ruman homber tin un esposa incrédulo, i tog e esposa cumbiní pa biba cuné, laga e esposo no bandon’é.” (1 Corintionan 7:12) Ademas, cristiannan casá cu incrédulo ta bíblicamente obligá na traha pa haci nan matrimonio un éxito. (1 Pedro 3:1, 2) Hopi bes, obedencia n’e conseho excelente aki a resultá den e bendicion cu curason di casánan incrédulo a cambia pa cu adoracion berdadero. Algun a asta bira fiel cristiannan bautisá.—1 Corintionan 7:16.

10. Ki les cristiannan por siña for dje 111 hombernan israelita cu a manda nan esposanan stranhero bai?

10 Pero, e caso dje israelitanan cu a manda nan esposanan stranhero bai en realidad ta percurá un bon les pa cristiannan soltero. Nan no mester cuminsá frei personanan dje sexo opuesto cu no ta creyente. Kisas ta difícil, asta doloroso, pa evitá un relacion asina, pero esei ta e mihó curso pa un hende por sigui ricibí e bendicion di Dios. Bijbel ta manda cristiannan: “No bira uní bou di yugo desigual cu incrédulonan.” (2 Corintionan 6:14) Cualkier cristian soltero cu ta deseá di casa mester planea pa casa cu un berdadero compañero creyente.—1 Corintionan 7:39.

11. Mescos cu e hombernan israelita, con nos por ser probá en cuanto nos causa di alegria?

11 Den hopi otro manera tambe, cristiannan a haci ahuste ora a hala nan atencion cu nan ta bayendo den un direccion no-bíblico. (Galationan 6:1) Tempu-tempu, e revista aki a mustra riba conducta no-bíblico cu lo a descualificá un persona di sigui forma parti dje organisacion di Dios. Na 1973, por ehempel, e pueblo di Jehova a bin comprendé plenamente cu uso di droga i tabaco ta picá serio. Pa sigui un curso piadoso, nos tin cu “limpia nos mes di tur contaminacion di carni i di spiritu.” (2 Corintionan 7:1) Basta persona a tuma tal conseho di Bijbel na pechu; nan tabata dispuesto pa sufri dje síntomanan inicial di abstinencia pa por a keda forma parti dje pueblo limpi di Dios. Tambe a duna instruccion bíblico cla relacioná cu asuntunan sexual, bistí, areglo personal i e forma sabí di scoge empleo, recreo i música. Sea cual sea e principionan bíblico riba cua a hala nos atencion, laga nos proba di ta cla pa ser “reahustá,” manera e 111 hombernan israelita. (2 Corintionan 13:11) Esaki lo mustra cu e privilegio di adorá Jehova den asociacion cu su pueblo santu ta ‘subi mas haltu cu nos causa principal di alegria.’

12. Kico a sosodé na 455 P.E.C.?

12 Despues cu Bijbel a informá dje episodio cu a enbolbé esposanan stranhero, e no ta bisa nos kico a sosodé den Jerusalem p’e siguiente 12 añanan. Sin duda, Israel su bisiñanan a bira mas hostil debí n’e cancelacion di hopi aliansa matrimonial. Na 455 P.E.C., Nehemías a yega Jerusalem cu un escolta militar. El a ser nombrá gobernadó di Huda i a bini cu cartanan dje rey di Persia cu a autoris’é pa reconstruí e stad.—Nehemías 2:9, 10; 5:14.

Oposicion di Parti di Bisiñanan Envidioso

13. Ki actitud e bisiñanan idólatra dje hudiunan a desplegá, i con Nehemías a reaccioná?

13 Bisiñanan idólatra a oponé e propósito dje binida di Nehemías. Nan lidernan a menas’é, puntrando: “Ta contra e rey boso ta rebelando?” Mustrando fe den Jehova, Nehemías a contestá: “E Dios di shelu ta Esun cu lo duna nos éxito, i nos mes, su sirbidónan, lo lanta, i nos tin cu construí; pero boso, boso no tin participacion, ni derecho hustu, ni memoria den Jerusalem.” (Nehemías 2:19, 20) Ora a cuminsá drecha e muraya, e mésun enemigunan a haci cherche: ‘Kico e hudiunan débil ta haciendo? Nan por duna bida n’e piedranan for dje montonnan di ruina yen di stof? Si un zoro bula contra dje, sigur lo e basha nan muraya di piedra abou.’ En bes di contestá e remarkenan aki, Nehemías a pidi den oracion: “Tende, O nos Dios, pasobra nos a bira obheto di desprecio; i laga nan reproche bolbe riba nan propio cabes.” (Nehemías 4:2-4) Continuamente, Nehemías a pone e ehempel excelente aki di dependé riba Jehova!—Nehemías 6:14; 13:14.

14, 15. (a) Con Nehemías a trata cu e menasa di violencia dje enemigunan? (b) Den ki manera Testigonan di Jehova por a sigui cu nan obra di edificacion spiritual apesar di oposicion feros?

14 Pa Testigonan di Jehova cumpli cu nan asignacion importante di predicá, awe nan tambe ta dependé di Dios. Opositornan ta purba stroba e trabou aki dor di haci cherche. Tin bes interes di hende den e mensahe di Reino ta fria pasobra nan no por soportá bofon. Si mofa no duna resultado, opositornan por rabia i recurí na menasa di violencia. Esaki ta loke e constructornan dje muraya di Jerusalem a haña nan cuné. Pero Nehemías a nenga di ser intimidá. Mas bien, el a arma e constructornan contra atake di enemigu i a fortalecé nan fe, bisando: “No tene miedu pa causa di nan. Tene Jehova, Esun grandi i inspirador di temor, na mente; i bringa pa boso rumannan, boso yu hombernan i boso yu muhernan, boso esposanan i boso casnan.”—Nehemías 4:13, 14.

15 Mescos cu den e dianan di Nehemías, Testigonan di Jehova ta bon ekipá pa sigui cu nan obra di edificacion spiritual apesar di oposicion feros. “E esclabo fiel i discreto” a percurá alimento spiritual fortalecedor di fe, cu ta permití e pueblo di Dios ser productivo asta caminda e trabou ta prohibí. (Mateo 24:45) Como resultado, Jehova a sigui bendicioná su pueblo cu aumento rond mundu.—Isaías 60:22.

Problemanan Interno

16. Ki problemanan interno a menasá e spiritu dje constructornan dje muraya di Jerusalem?

16 Segun cu e reconstruccion dje muraya di Jerusalem tabata progresá i e muraya a bira mas haltu, e trabou a bira mas difícil. Tabata e ora ei cu un problema a sali na cla cu a menasá e spiritu dje constructornan cu tabata luchando. Debí na scarcedad di cuminda, algun hudiu a pasa trabou pa percurá cuminda pa nan famia i pa paga nan belasting n’e gobiernu perso. E hudiunan mas ricu a fia nan cuminda i placa. Sin embargo, contrario n’e Ley di Dios, e israelitanan mas pober tabatin cu pone nan tera i yunan como borg cu nan lo paga e placa bek cu interes. (Exodo 22:25; Levítico 25:35-37; Nehemías 4:6, 10; 5:1-5) Awor e creditornan tabata menasá cu nan lo tuma nan tera i forsa nan bende nan yunan como catibu. E actitud materialista aki cu a falta bondad, a indigná Nehemías. El a actua lihé pa garantisá cu Jehova lo sigui bendicioná e trabou di reconstruí e muraya di Jerusalem.

17. Kico Nehemías a haci pa garantisá Jehova su bendicion continuo riba e trabou di construccion, i cu ki resultado?

17 “Un asamblea grandi” a ser organisá, i Nehemías a mustra e israelitanan mas ricu claramente cu loke nan a haci a desagradá Jehova. Anto el a suplicá esnan culpabel, incluso algun dje sacerdotenan, pa restituí tur e interes cu nan a tuma i debolbé e teranan cu nan a tuma ilegalmente for di esnan cu no por a paga interes. Tabata algu encomendabel cu e culpabelnan a bisa: “Nos lo haci restitucion, i for di nan nos lo no pidi nada bek. Nos lo haci precis manera bo ta bisando.” Esakinan no tabata palabranan bashí, pasobra Bijbel ta informá cu “e pueblo a pasa na haci segun e palabra [di Nehemías].” I henter e congregacion a alabá Jehova.—Nehemías 5:7-13.

18. Testigonan di Jehova a bira conocí pa ki actitud?

18 Kico di nos tempu? En bes di ta probechadó, Testigonan di Jehova ta ampliamente conocí pa nan actitud generoso pa cu compañeronan creyente i otronan afectá pa adversidad. Mescos cu den e tempu di Nehemías, esaki a resultá den hopi expresion di gratitud i alabansa na Jehova. Sin embargo, na mésun tempu, “e esclabo fiel i discreto” a haña ta necesario pa duna conseho bíblico riba asuntunan di negoshi i riba e necesidad di evitá di probechá di un manera golos di otro hende. Den cierto pais ta comun pa pidi un bruidsprijs exorbitante, pero Bijbel ta spierta masha cla cu hende golos i practicante di extorcion lo no heredá e Reino di Dios. (1 Corintionan 6:9, 10) E bon reaccion di mayoria cristian na conseho asina ta pone nos corda con e hudiunan ei a mira con malu tabata pa probechá di nan rumannan mas pober.

E Muraya di Jerusalem A Bini Cla

19, 20. (a) Con e opositornan religioso a reaccioná ora nan a mira cu e muraya di Jerusalem a bini cla? (b) Ki victoria Testigonan di Jehova a experenciá den hopi pais?

19 Apesar di tur e oposicion, e muraya di Jerusalem a bini cla den 52 dia. Ki efecto esaki tabatin riba e opositornan? Nehemías a bisa: “Asina cu tur nos enemigunan a tende di dje i tur e nacionnan cu tabata rond di nos a mir’é, mesora nan a cai masha hopi den nan mes bista, i nan a haña sa cu tabata di parti di nos Dios cu e trabou aki a ser hací.”—Nehemías 6:16.

20 Awe, oposicion di enemigu contra e obra di Dios ta sigui den vários manera i lugá. Sin embargo, miyones di hende a mira cu ta banidad pa oponé Testigonan di Jehova. Por ehempel, considerá intentonan di pasado pa pone fin n’e trabou di predicá na Alemania nazi, Oost Europa i hopi pais di Africa. Tur e intentonan ei a fracasá, i awor hopi hende ta reconocé cu ‘ta di parti di Dios nos trabou ta ser hací.’ Ki un recompensa esaki ta pa rumannan cu a keda fiel pa hopi aña i cu a haci e adoracion di Jehova ‘subi mas haltu cu nan causa principal di alegria’ den e paisnan ei!

21. Ki sucesonan significativo nos lo considerá den e siguiente artículo?

21 Den e siguiente artículo nos lo repasá sucesonan importante cu a hiba n’e inauguracion gososo di Jerusalem su muraya reconstruí. Nos lo considerá tambe con e realisacion di un stad muchu mas magnífico p’e beneficio di henter humanidad ta acercando.

Bo Ta Corda?

◻ Con Esdras i otronan a alegrá riba Jerusalem?

◻ Ki erornan Esdras i Nehemías a yuda hopi hudiu corigí?

◻ Ki lesnan bo por saca for dje relatonan cu a enbolbé Esdras i Nehemías?

[Plachi na página 15]

Nehemías su preocupacion principal tabata Jerusalem, i no su trabou prestigioso na Susa

[Plachinan na página 16, 17]

Mescos cu Nehemías, nos tin cu pidi den oracion pa Jehova su guia i fortalesa pa sigui den nos asignacion importantísimo di predicá

    Publikashonnan na Papiamentu (Curaçao) (1986-2025)
    Log Out
    Log In
    • Papiamentu (Kòrsou)
    • Kompartí
    • Preferensia
    • Copyright © 2025 Watch Tower Bible and Tract Society of Pennsylvania
    • Kondishonnan di Uso
    • Maneho di Privasidat
    • Konfigurashon di Privasidat
    • JW.ORG
    • Log In
    Kompartí