Ki Speranza Tin pa Stimánan Cu A Fayece?

“Si hende muri, acaso e por bolbe biba?” ta e pregunta di Job leu atrás. (Job 14:14, Version Moderna) Kizás, abo també, a puntra esei. Con bo ta sintíbo si bo tabata sa cu reunimento cu bo stimánan ta posibel aki mes riba tera den e mihor circunstancia?

Wel, e Bijbel ta haci e sigiente promesa: “Bo mortonan lo biba. . . . Nan lo lanta.” I e Bijbel ta bisa també: “E hustonan mes lo tene e tera den nan poder, i nan lo biba riba dje pa semper.”—Isaías 26:19; Salmo 37:29.

Pa nos tene berdadero confianza den promesa asina, nos tin cu contesta algun pregunta básico: Pakico hende ta muri? Unda e mortonan tá? I con nos por keda sigur cu nan por bolbe biba?

Morto, i loke ta sosode ora nos ta muri

E Bijbel ta haci claro cu e intencion primordial di Dios no tabata pa hende muri. El a crea e promé pareha humano, Adam i Eva, a pónenan den un paradijs terrenal yamá Eden, i a instruínan pa haya yiu i extende nan habitacion paradísico mundialmente. Nan por a muri solamente si nan a desobedece su instruccion.—Génesis 1:28; 2:15-17.

Faltando aprecio pe bondad di Dios, Adam i Eva a desobedece i tabatin cu recibi e castigo stipulá. Dios a bisa Adam: “Bo ta bolbe ne tera, pasobra bo tabata tumá for di dje. Pasobra bo ta stof i lo bolbe na stof.” (Génesis 3:19) Promé cu su creacion, Adam no a existi; e tabata stof. I pa su desobedencia, of picá, Adam tabata sentenciá pa bolbe na stof, un estado sin existencia.

Morto, pues, ta e ausencia di bida. E Bijbel ta haci un contraste: “E pago cu picá ta paga ta morto, ma e don cu Dios ta duna ta bida eterna.” (Romano 6:23) Mustrando cu morto ta un estado completamente inconsiente, e Bijbel ta bisa: “Pasobra hende bibo sa cu nan tin cu muri; pero hende morto no sa nada mes.” (Eclesiastés 9:5) Segun e Bijbel, ora hende ta muri: “Su spiritu ta sali, e ta bolbe na su tera; den e dia ei su pensamento sí ta perece.”—Salmo 146:3, 4.

Sin embargo, siendo cu Adam i Eva so a desobedece e mandamento den Eden, pakico nos tur tin cu muri? Pasobra nos tur a nace despues cu Adam a desobedece, i p’sei, nos tur a hereda picá i morto foi dje. Manera e Bijbel ta splica: “Pa medio di un solo homber [Adam] picá a drenta den mundo i morto mediante picá, i asina morto a plama na tur hende.”—Romano 5:12; Job 14:4.

Pero, hende sa puntra: ‘No ta curpa so ta muri, ma alma ta spiritu cu no ta muri nunca?’ Hopi religion ta siña esei, asta yamando morto e porta pa un otro bida. Pero tal idea no ta bini dje Bijbel. Mas bien, e Palabra di Dios ta siña cu hende mes ta alma, cu bo alma ta bo mes, cu tur bo facultad fisical i mental. (Génesis 2:7; Jeremías 2:34; Proverbio 2:10) Además, e Bijbel ta bisa: “Alma cu ta peca—esei mes ta muri.” (Ezekiel 18:4) E Bijbel no ta siña den ningun texto cu hende tin alma cu ta spiritu cu no ta muri nunca i cu ta sigi biba despues di morto di curpa.

Con hende por bolbe biba

Despues cu picá i morto a drenta den mundo, Dios a revela cu su propósito ta pa usa e resureccion pa restora hende morto na bida. P’sei e Bijbel ta splica: “Abraham . . . a calcula cu Dios por lanta [su yiu Isaac] asta for di morto.” (Hebreo 11:17-19) Abraham no a pone su confianza den un falsedad, pasobra e Bijbel ta bisa dje Todopoderoso: “E ta Dios, no di hende morto, sino di hende bibo, pasobra pe tur ta bibo.”—Lucas 20:37, 38.

Sí, Dios Todopoderoso no solamente tin e poder sino també e deseo pa resusita ken cu e kier. Jesucristo mes a bisa: “No straña riba esei, pasobra e ora ta bini den cua tur esnan cu ta den graf memorial lo tende su boz i lo sali.”—Juan 5:28, 29; Echo 24:15.

Poco tempo despues di a bisa esei, Jesús a contra cu un procesion funeraria saliendo for dje stad israelita di Naín. E hoven morto tabata e único yiu di un biuda. Ora Jesús a mira e desconsuelo extremo di dje, Jesús a sinti duele. Pues, el a bisa e cadáver: “Hoven, mi ta bisábo, Lanta!” I e hoven a lanta sinta, i Jesús a duné na su mama.—Lucas 7:11-17.

Mescos cu den e caso dje biuda, tabatin gran alegría ora Jesús a bishita e cas di Jairo, presidente dje sinagoga hudío. Su yiu muher di 12 aña di edad a muri. Pero, ora Jesús a yega ne cas di Jairo, el a bai cerca e mucha morto i a bisa: “Mucha, lantábo!” I el a lanta!—Lucas 8:40-56.

Despues, Lázaro, amigo di Jesús a muri. Ora Jesús a yega na su cas, Lázaro a haci cuater dia morto caba. Aunque su ruman Marta e keda profundamente desconsolá, el a expresa su speranza, bisando: “Mi sa cu lo e lanta den e resureccion dje último dia.” Pero Jesús a bai cerca e graf, a manda pa nan kita e piedra, i a yama: “Lázaro, sali!” I el a sali!—Juan 11:11-44.

Awor, pensa riba esei: Lázaro tabata den ki estado durante e cuater dia cu e tabata morto? Lázaro no a bisa nada tocante di a bai cielo di alegría ni di fiernu di tormento, locual e siguramente lo a mencioná si el a bai ei. No, Lázaro tabata completamente inconsiente den morto i lo a keda asina te ne “resureccion dje último dia” si Jesús no a restora su bida.

Ta cierto cu tal milagro di Jesús tabata solamente di beneficio temporario, ya cu esnan cu el a resusita a bolbe muri. Sin embargo, Jesús a duna prueba 1.900 aña pasá cu, mediante e poder di Dios, hende morto realmente por bolbe biba! Pues, cu su milagro, Jesús a mustra na un escala chikito loke lo sosode riba tera bao di Reino di Dios.

Ora un stimá ta muri

Ora e enemigo morto ta hiba un stimá, bo desconsuelo por ta grandi, aunque bo tin e speranza dje resureccion. Abraham tabatin e fe cu su esposa lo bolbe biba, sin embargo, nos ta leza cu “Abraham a drenta pa lamenta Sara i pa yora riba dje.” (Génesis 23:2) I kico di Jesús? Ora Lázaro a muri, Jesús a “afligi den su spiritu i a bira molestiá,” i poco tempo despues “el a entrega na lágrima.” (Juan 11:33, 35) Pues, ora un hende cu bo ta stima ta muri, bo no ta parce swak si bo ta yora.

Ora yiu ta muri, esei ta specialmente dificultoso pe mama. P’sei, e Bijbel ta reconoce e desconsuelo severo cu mama por sinti. (2 Rey 4:27) Naturalmente, ta dificultoso pa tata desconsolá també. “Ai, ami mester a muri, mi mes, en bez di abo,” ta e lamentacion di rey David ora su yiu Absalom a muri.—2 Samuel 18:33.

Pero, ya cu bo tin confianza den e resureccion, bo duele no ta sigi sin fin. Manera e Bijbel ta bisa, bo no ta “yora manera e otronan també cu no tin speranza.” (1 Tesalonicense 4:13) Mas bien, bo ta hala cerca Dios den oracion, i e Bijbel ta priminti cu “e mes lo sostenébo.”—Salmo 55:22.

Amenos cu tin otro indicacion, tur texto bíblico ta dje Traduccion di Mundo Nobo di Scritura Santo.