Capitulo 9

Kico Ta Sosodé cu Nos Stimánan Morto?

1. Con hende ta sinti ora un persona stimá muri?

“UN HENDE ta sufri ora un persona stimá muri pasobra morto ta nificá cu un persona stimá ta disparcé den lo desconocí.” Esei ta loke un yu homber a bisa ora su tata i djis despues su mama a muri. Su dolor i sentido di pérdida profundo a lagu’é sinti como si fuera e tabata “hogando emocionalmente.” Kisas bo a sufri den un manera similar. Kisas bo a puntra bo mes na unda bo hendenan stimá ta i si un dia lo bo por mira nan atrobe.

2. Cua preguntanan confundidor ta lanta en cuanto morto?

² A ser bisá na algun mayor tristu, “Dios ta piki e flornan di mas bunita pa tuma pa su mes den cielu.” Esei ta realmente asina? Nos stimánan morto a bai na un region spiritual? Esei ta loke algun hende ta yama Nirvana, describí como un estado yen di goso di ta liber di tur dolor i deseo? Esnan cu nos ta stima a pasa dor di un porta pa bida inmortal den paradijs? Of manera otronan ta afirmá, morto ta un caimentu den un tormento eterno pa esnan cu a ofendé Dios? E mortonan por afectá nos bida? Pa haña contestanan exacto na tal preguntanan, nos mester consultá e Palabra di Dios, e Bijbel.

KICO TA E “SPIRITU” CU TIN DEN HENDE?

3. Ki opinion Sócrates i Plato tabatin en cuanto e mortonan, i con esaki ta afectá hende awe?

³ Filósofonan griego di antigua, Sócrates i Plato, a opiná cu mester tin algu inmortal natural den homber i muher—un alma cu ta sigui biba despues di morto i cu realmente nunca ta muri. Mundialmente, miyones di hende ta kere esaki awe. E creencia aki hopi biaha ta crea mes tantu miedu pa e mortonan cu e ta crea preocupacion pa nan bienestar. E Bijbel ta siña nos algu masha diferente tocante e mortonan.

4. (a) Kico Génesis ta conta nos tocante e alma? (b) Kico Dios a pone den Adam pa haci’é bibu?

⁴ Considerando e condicion di e mortonan, nos mester corda cu nos tata original, Adam, no tabatin un alma. E tabata un alma. Den un acto di creacion inspirador di temor, Dios a traha hende—e alma—for di elementonan básico di e tera i despues a supla den dje “e rosea di bida.” Génesis 2:7 ta bisa nos: “Jehova Dios a pasa na forma e homber for di stof di suela i di supla den su nanishi e rosea di bida, i e homber a yega di ser un alma bibiente.” Adam su bida a ser sostené dor di hala rosea. Sin embargo, mas cu suplamentu di aire den e pulmon di hende tabata enbolbí ora Dios a pone e rosea di bida den Adam. E Bijbel ta papia di “e forsa di bida” cu ta activo den criaturanan terenal bibiente—Génesis 7:22.

5, 6. (a) Kico ta “e forsa di bida”? (b) Kico ta sosodé ora e “spiritu” mencioná na Salmo 146:4 stop di duna bida na e curpa?

⁵ Kico “e forsa di bida” ta? E ta e chispa vital di bida cu Dios a pone den e curpa sin bida di Adam. Anto e forsa aki a ser sostené dor di e proceso di hala rosea. Pero kico ta e “spiritu” cu Salmo 146:4 ta referí na dje? E versículo ei ta bisa di un hende cu muri: “Su spiritu ta sali, e ta bolbe bek na su suela; den e dia ei su pensamentunan en berdad ta perecé.” Ora e escritornan di Bijbel a usa e palabra “spiritu” den e manera aki, nan no tabatin na mente un alma separá for di curpa cu ta sigui biba despues cu e curpa muri.

⁶ E “spiritu” cu ta sali for di hende ora nan muri ta e forsa di bida cu a originá cu nos Creador. (Salmo 36:9; Echonan 17:28) E forsa di bida aki no tin ningun di e característicanan di e criatura cu e ta duna bida, mescos cu coriente no ta tuma over e característicanan di e aparato cu e ta duna coriente. Ora un persona muri, e spiritu (forsa di bida) ta stop di duna bida na e celnan di e curpa, casi mescos cu lus ta paga ora cu e coriente ser kitá. Ora e forsa di bida stop di sostené e curpa humano, hende—e alma—ta muri.—Salmo 104:29; Eclesiástes 12:1, 7.

“NA STOF LO BO BOLBE”

7. Kico lo a sosodé cu Adam si el a desobedecé Dios?

⁷ Jehova a splica claramente loke morto lo nificá pa e pecador Adam. Dios a bisa: “Cu sodor di bo cara lo bo come pan te cu bo bolbe n’e suela, pasobra for di dje bo tabata tumá. Pasobra stof bo ta i na stof lo bo bolbe.” (Génesis 3:19) Adam lo a bolbe na unda? Na e suela, na e stof for di cua el a ser creá. Ora e muri Adam simplemente lo a stop di existí!

8. Como alma, den ki manera hende no ta superior cu bestia?

⁸ Den e sentido aki, morto di hende no ta diferenciá for di esun di bestia. Nan tambe ta alma, i e mésun spiritu, of forsa di bida, ta duna nan energia. (Génesis 1:24) Na Eclesiástes 3:19, 20, e homber sabí Sálomon ta bisa nos: “Manera esun ta muri, asina e otro ta muri; i nan tur tin un spiritu so, di manera cu [den morto] no tin superioridad di hende riba bestia . . . Nan tur a bini di stof, i nan tur ta bolbe na stof.” Hende tabata superior cu bestia den e sentido cu el a ser creá den e imágen di Dios, reflehando e cualidadnan di Jehova. (Génesis 1:26, 27) Sin embargo, ora hende i bestia muri tur dos ta bolbe na stof.

9. Kico ta e condicion dje mortonan i unda nan ta bai?

⁹ Sálomon a duna mas splicacion di loke morto ta nificá, bisando: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” Sí, e mortonan no sa absolutamente nada. En bista di esaki, Sálomon a insta: “Tur loke bo man ta haña pa haci, haci’é cu bo mes forsa, pasobra no tin trabou ni formacion di proyecto ni conocimentu ni sabiduria den Sheol, e lugá na unda bo ta bai.” (Eclesiástes 9:5, 10) Na unda e mortonan ta bai? Na Sheol (na hebreo, sheʼohlʹ), e graf comun di humanidad. Nos stimánan morto no ta conciente di nada. Nan no ta sufriendo i nan no por afectá nos den ningun manera.

10. Pakico nos por bisa cu morto no mester ta e fin?

¹⁰ Nos tur i nos stimánan mester biba solamente un par di aña i despues stop di existí pa semper? No segun e Bijbel. Na e tempu di e rebelion di Adam, Jehova Dios inmediatamente a instituí areglonan pa eliminá e teribel consecuencianan di picá humano. Morto no tabata parti di Dios su propósito pa humanidad. (Ezekiel 33:11; 2 Pedro 3:9) P’esei, morto no mester ta e fin pa nos ni pa nos stimánan.

EL “A BAI SOSEGA”

11. Con Jesus a describí e condicion di su amigu morto, Lázaro?

¹¹ Ta Jehova su propósito pa rescatá nos i nos stimánan defuntu for di morto Adámico. P’esei, Dios su Palabra ta referí n’e mortonan como na soño. Por ehempel, ora Jesucristo a haña sa cu su amigu Lázaro a muri, el a bisa Su disipelnan: “Lázaro nos amigu a bai sosegá, pero mi ta biahando pa einan pa lant’é for di soño.” Siendo cu e disipelnan no a comprendé inmediatamente e nificacion dje declaracion aki, Jesus a bisa francamente: “Lázaro a muri.” (Juan 11:11, 14) E ora ei Jesus a bai na e stad di Betania, caminda Lázaro su ruman muhernan Marta i Maria tabata yorando e morto di nan ruman homber. Ora Jesus a bisa Marta, “Bo ruman lo lanta,” Marta a expresá su fe den e propósito di Dios pa eliminá e efectonan di morto riba e famia humano. El a bisa: “Mi sa cu lo e lanta den e resureccion rib’e último dia.”—Juan 11:23, 24.

12. Ki speransa Marta, kende a perde su ruman homber, tabatin en cuanto morto?

¹² Marta no a expresá nada tocante un alma inmortal bibando na un otro parti despues di morto. E no a kere cu Lázaro ya caba a bai na un region spiritual pa sigui existí. Marta tabatin fe den e speransa maraviyoso di un resureccion for di morto. El a comprendé, no cu un alma inmortal a sali for di e curpa di Lázaro, sino cu su ruman homber morto a stop di existí. E solucion lo tabata e resureccion di su ruman homber.

13. Ki poder duná dor di Dios Jesus tin i con el a demostrá e poder aki?

¹³ Jesucristo ta esun cu Jehova a autorisá pa rescatá humanidad. (Oséas 13:14) P’esei, contestando Marta su declaracion, Jesus a bisa: “Ami ta e resureccion i e bida. Esun cu ehercé fe den mi, aunke e muri, lo bolbe biba.” (Juan 11:25) Jesus a demostrá su poder duná dor di Dios den e asuntu aki ora el a bai na e graf di Lázaro, kende tabata morto pa cuater dia, i a restor’é na bida. (Juan 11:38-44) Djis imaginá e goso di esnan cu a mira e resureccion aki of otronan cu Jesucristo a ehecutá!—Marco 5: 35-42; Lucas 7:12-16.

14. Pakico e resureccion i e idea di un alma inmortal ta contrario cu otro?

¹⁴ Para un ratu pa considerá esaki: Ningun hende lo tin mester di ser resucitá, of trec’é bek na bida, si un alma inmortal a sigui biba despues di morto. En realidad, lo no tabata un acto di bondad pa resucitá un hende manera Lázaro bek na un bida imperfecto riba tera si el a pasa caba pa un recompensa celestial maraviyoso. Realmente, e Bijbel nunca ta usa e expresion “alma inmortal.” En bes di esei, e Scritura ta bisa cu e alma humano pecador ta muri. (Ezekiel 18:4, 20) Pues e Bijbel ta señalá na e percuracion di un resureccion como e berdadero solucion pa morto.

“TUR ESNAN CU TA DEN GRAF MEMORIAL”

15. (a) Kico e palabra “resureccion” ta nificá? (b) Pakico e resureccion di individuonan lo no presentá ningun problema pa Jehova Dios?

¹⁵ E palabra cu e disipelnan di Jesus a usa pa “resureccion” literalmente ta nificá “lantamentu” of “lanta para.” Esaki ta un lantamentu for di e condicion sin bida di morto—como si fuera, lanta para for di e graf comun di humanidad. Jehova Dios fácilmente por resucitá un persona. Pakico? Pasobra Jehova ta e Originador di bida. Awe, hende por graba e bos i imágennan di homber i muhernan riba cinta di video i por bolbe pasa esakinan despues cu e individuo muri. Siguramente, anto, nos Creador todopoderoso por graba e detayenan di cualkier individuo i resucitá e mésun persona, dunando e persona un curpa formá nobo.

16. (a) Ki promesa Jesus a haci tocante tur esnan den graf memorial? (b) Kico lo determiná con un persona su resureccion lo resultá?

¹⁶ Jesucristo a bisa: “E ora ta bini den cua tur esnan cu ta den graf memorial lo tende su [Jesus] bos i sali, esnan cu a haci cosnan bon pa un resureccion di bida, esnan cu a practicá cosnan malu pa un resureccion di huicio.” (Juan 5:28, 29) Tur esnan den Jehova su memoria lo ser resucitá i instruí den su camindanan. Pa esnan cu actua na armonia cu e conocimentu di Dios, esaki lo resultá di ta un resureccion di bida. Sin embargo, lo e resultá di ta un resureccion di huicio di condenacion pa esnan cu rechasá e siñansanan di Dios i su gobernacion.

17. Ken lo ser resucitá?

¹⁷ Naturalmente, esnan cu a sigui tras di un curso di bida hustu como sirbidornan di Jehova lo ser resucitá. En realidad, e speransa di resureccion a fortalecé hopi sirbidor di Dios pa enfrentá morto, asta den casonan di persecucion violento. Nan tabata sa cu Dios lo por restorá nan na bida. (Mateo 10:28) Pero miyones di hende a muri sin mustra cu nan lo cumpli cu Dios su normanan hustu of no. Nan tambe lo ser resucitá. Cu confiansa den e propósito di Jehova relacioná cu esaki, apostel Pablo a bisa: “Mi tin speransa en cuanto Dios . . . cu lo bai tin un resureccion di tantu e hustunan como e inhustunan.”—Echonan 24:15.

18. (a) Apostel Juan a ricibí cua vision di e resureccion? (b) Kico ta ser destruí den “e lago di candela,” i kico e “lago” aki ta simbolisá?

¹⁸ Apostel Juan a ricibí un vision emocionante di esnan resucitá pará dilanti e trono di Dios. Anto Juan a skirbi: “Laman a entregá esnan morto den dje, i morto i Hádes a entregá esnan morto den nan i nan a ser husgá individualmente segun nan echonan. I morto i Hádes a ser tirá den e lago di candela. Esaki ta nificá e segundo morto, e lago di candela.” (Revelacion 20:12-14) Pensa riba esei! Tur e mortonan cu ta den memoria di Dios tin e prospecto di ser librá for di Hádes (na griego, haiʹdes), of Sheol, e graf comun di humanidad. (Salmo 16:10; Echonan 2:31) Nan lo tin un oportunidad pa demostrá pa medio di nan echonan si nan lo sirbi Dios of no. Anto “morto i Hádes” lo ser tirá den loke ta ser yamá “e lago di candela,” simbolisando destruccion completo, mescos cu e palabra “Gehena.” (Lucas 12:5) E graf comun di humanidad mes lo a ser hací bashí i lo stop di existí ora e resureccion ta completá. Ki consolador e ta pa siña for di Bijbel cu Dios no ta tormentá ningun hende!—Jeremías 7:30, 31.

RESURECCION PA BAI UNDA?

19. Pakico algun persona di humanidad lo ser resucitá pa bai cielu i ki sorto di curpa Dios lo duna nan?

¹⁹ Un cantidad limitá di homber i muher lo ser resucitá pa bida den cielu. Como rey i sacerdotenan huntu cu Jesus, nan lo tin parti den deshací di tur e efectonan di morto cu humanidad a heredá for di e promé homber, Adam. (Romanonan 5:12; Revelacion 5:9, 10) Cuantu hende Dios lo hiba cielu pa goberná cu Cristo? Segun e Bijbel, solamente 144.000. (Revelacion 7:14; 14:1) Jehova lo duna cada un di esnan resucitá aki un curpa spiritual di manera cu nan por biba den cielu.—1 Corintionan 15:35, 38, 42-45; 1 Pedro 3:18.

20. Kico humanidad obediente, incluyendo esnan resucitá, lo experenciá?

²⁰ E gran mayoria di esnan cu a muri lo ser resucitá riba un tera paradísico. (Salmo 37:11, 29; Mateo 6:10) Un parti dje motibu pa resucitá algun hende pa bai cielu ta pa completá e propósito di Dios p’e tera. Jesucristo i e 144.000 den cielu progresivamente lo trece humanidad obediente bek na e perfeccion cu nos promé mayornan a benta afó. Esaki lo incluí esnan resucitá, manera a ser indicá dor di Jesus ora cu el a bisa e homber muriendo clabá banda di dje: “Lo bo ta cu mi den Paradijs.”—Lucas 23:42, 43.

21. Segun profeta Isaías i apostel Juan, kico lo sosodé cu morto?

²¹ Riba e tera paradísico, morto, cu awe ta producí tantu banidad, lo ser remové. (Romanonan 8:19-21) E profeta Isaías a declará cu Jehova Dios “realmente lo traga morto pa semper.” (Isaías 25:8) Apostel Juan a ser duná un vision di e tempu ora humanidad obediente lo experenciá libertad for di dolor i morto. Sí, “Dios mes lo ta cu nan. I lo e seca tur lágrima di nan wowo, i morto lo no existí mas, tampoco lo tin mas lamento ni sclamacion ni dolor. E promé cosnan a pasa forbij.”—Revelacion 21:1-4.

22. Con conocimentu di e resureccion ta afectá bo?

²² E Bijbel su siñansanan claro ta kita confusion tocante loke ta sosodé cu e mortonan. E Scritura claramente ta declará cu morto ta “e último enemigu” cu lo ser destruí. (1 Corintionan 15:26) Ki fortalesa i consuelo nos por saca for di conocimentu di e speransa di resureccion! I ki contentu nos por ta cu nos stimánan morto cu ta den e memoria di Dios lo lanta for di e soño di morto pa disfrutá di tur e bon cosnan cu e tin wardá pa esnan cu ta stim’é! (Salmo 145:16) Tal bendicionnan lo ser cumplí mediante e Reino di Dios. Pero na ki tempu su gobernacion mester a cuminsá? Laga nos mira.

TEST BO CONOCIMENTU

Kico ta e spiritu cu tin den hende?

Con lo bo describí e condicion di e mortonan?

Ken lo ser resucitá?

[Plachi na página 85]

Mescos cu Jesus a yama Lázaro for di graf, asina miyones di hende lo ser resucitá

[Plachi na página 86]

Goso lo prevalecé ora ‘Dios traga morto pa semper’