Capítulo 13

“E palabra di Dios ta bibo”

Den e capítulo anterior, nos a mira cu conseho bíblico por yúdanos resolve problema i evita error. E sabiduría eterna di conseho bíblico ta duna prueba fuerte di inspiracion. E Bijbel mes ta bisa: “Tur Scritura ta inspirá di Dios i ta probechoso pa siña, pa reprende, pa rectifica, pa disipliná den husticia.” (2 Timoteo 3:16) Pero e Bijbel no solamente ta duna conseho sabí. Como e Palabra di Dios, e realmente por efectua cambio den hende.

1-3. (a) Con e Bijbel ta enfatiza e necesidad di cambio di personalidad? (b) Cua experencia ta demonstra e poder dje Bijbel pa transforma personalidad?

E BIJBEL realmente por efectua cambio den hende? Sí, e por asta cambia nan personalidad. Considera e sigiente conseho skirbí den e Bijbel: “Boso mester kita e personalidad bieu cu ta conforma cu boso moda di anda di antes i cu ta ser corrumpi conforme cu su deseo engañoso; pero . . . boso mester ta hací nobo den e forza cu ta impulsa boso mente, i mester bisti e personalidad nobo cu a wordu creá conforme cu e boluntad di Dios den berdadero husticia i lealtad.”—Efesio 4:22-24.

² Ta realmente posibel pa bisti un personalidad nobo? Sigur cu sí! Realmente, tin bez cu pa nan bira cristian, hende mester haci cambio berdaderamente drástico. (1 Corintio 6:9-11) Por ehempel, den Suramérica un mucha homber tabata huérfano ne edad di nuebe. Den su crecimento sin guía di mayornan, el a desaroya problema grave di personalidad. El a conta: “Ne tempo cu mi a haci 18 aña caba, mi tabata un drogadicto i a pasa tempo caba den prisón pa hortamento pa paga pa mi bicio.” Pero, su tía tabata un Testigo di Jehova, i cu tempo e por a yudé.

³ El a splica: “Mi tía a cuminza studia e Bijbel cu mi, i despues di siete luna mi por a librámi di droga.” També el a bandona asociacion cu mal compañé bieu i a haci amigo nobo di Testigo di Jehova. El a sigi: “Tal compañé nobo, hunto cu mi estudio regular di Bijbel, a yudámi progresa i finalmente dedica mi bida pa sirbi Dios.” Sí, e hoven cu tabata drogadicto i ladrón a bira un cristian activo, i e cambio radical tabata lográ mediante e poder dje Bijbel. En berdad, manera apóstol Pablo a bisa, “E palabra di Dios ta bibo i ta eherce poder.”—Hebreo 4:12.

Conocimento a transformánan

4, 5. Segun Colosense 3:8-10, kico ta necesario pa cultiva e personalidad nobo?

⁴ Con e Bijbel ta cambia hende? E contesta ta ser mirá den e texto bíblico: “Kítanan tur foi boso, rabia, furia, maldad, zundramento, i papiamento obseno di boso boca. No papia mentira cu otro. Kita e personalidad bieu cu práctica di dje, i bisti boso cu e personalidad nobo, cu mediante conocimento exacto ta ser hací nobo segun e imagen di Esun cu a creé.”—Colosense 3:8-10.

⁵ Ripara e papel importante cu conocimento exacto dje Bijbel ta hunga. E Bijbel ta splica cu nos tin cu líbranos di cierto característica i cultiva otro. Tal conocimento di su mes por tene un efecto poderoso, manera un mucha homber hoven di zuid di Europa a descubri. E tabatin un berdadero problema: un genio violento. Durante hubentud, e tabata den pelea constantemente, i pa saca su rabia, el a bira boxista; pero toch e no por a domina su naturaleza violento. Ora e tabata den dienst, e tabatin problema pasobra el a golpea otro soldad. Despues di a sali for di dienst, el a casa pero despues a golpea su casá. Den un argumento di famía, e asta a golpea su mes tata, i a mandé na suela. Berdaderamente, e tabata un homber rabiá i violento!

6, 7. Con conocimento exacto di Bijbel a yuda un hoven den zuid di Europa transforma su personalidad?

⁶ Sin embargo, cu tempo el a studia e Bijbel cu Testigo di Jehova i a tende conseho tal como lo sigiente: “No paga malu cu malu na ningun hende. . . . Si ta posibel, tanto como ta depende di boso, keda na paz cu tur hende. No vinga boso, stimánan, sino laga lugar pe rabia.” (Romano 12:17-19) Esei a yudé mira ki malu tabata e debilidad di su genio violento. El a bandona boxeo, pasobra el a comprende cu e no ta compatible cu un personalidad cristian pacífico. Pero toch e tabatin un berdadero lucha cu su naturaleza violento.

⁷ Sin embargo, e aumento di su conocimento di principio bíblico a yudé. Esei a refina su concenshi, i a haci posibel pe controla su genio violento. Un biaha, despues cu el a haci algun progreso den su estudio bíblico, un hende straño a rabia i a grita insulto na dje. E hoven a sinti surgi den dje e rabia cu el a conoce bon. Anto, el a sinti un otro forza: un sintimento di bergüenza; i p’sei e no a entrega na rabia. En bez di “paga malu cu malu,” el a domina su spiritu. Awor, e ta un otro persona, cu un personalidad nobo, gracias ne conocimento exacto di Bijbel.

Conociendo Dios

8. (a) E personalidad nobo ta ser transformá na imagen di ken? (b) E conocimento exacto cu ta forma e personalidad nobo mester inclui e conocimento di ken?

⁸ Ta cierto cu hopi hende ta comprende loke nan mester haci, pero nan ta entrega na debilidad di carni. Ta keda claro cu simplemente conocimento exacto di loke ta bon i malu no ta tur loke ta necesario. Algo mas a yuda cambia e dos hoven detayá anteriormente. Kico esei tabata? E texto cu nos a mencioná caba a bisa: “Bisti boso cu e personalidad nobo, cu mediante conocimento exacto ta ser hací nobo segun e imagen di Esun cu a creé.” (Colosense 3:10) Ripara cu, mescos cu Adam originalmente tabata trahá den e imagen di Dios, asina també e personalidad nobo ta trahá den e imagen di Dios. (Génesis 1:26) Pues, e conocimento exacto cu a yuda e dos hoven tabatin cu inclui conocimento di Dios. Esei ta hácinos corda e palabra di Jesús: “Esaki ta nifica bida eterna, nan ganando conocimento di bo, e único Dios berdadero, i di esun cu bo a manda, Jesucristo.”—Juan 17:3.

9. Con un conocimento di Dios ta yúdanos transforma nos personalidad?

⁹ Con un conocimento di Dios por yúdanos cambia nos personalidad? E ta dúnanos un motibo pa hacié. Ora via estudio di Bijbel nos ta yega di conoce Dios, nos ta conoce calidad divino di dje i e amor cu el a mústranos. Esei ta impulsános pa stimé també. (1 Juan 4:19) Anto, nos por obedece loke Jesús a bisa ta e promé i mayor mandamento: “Bo mester stima Jehova bo Dios cu tur bo curazón i cu tur bo alma i cu tur bo mente.” (Mateo 22:37) Nos amor pa Dios ta dúnanos e deseo di bisti e personalidad nobo cu ta agradé. Esei ta hácinos deseá di ser mas manera E, sea loke sea e dificultad cu nos tin cu vence pa hacié.

Debilidad cu raíz hundo

10, 11. Con un conocimento exacto di Dios a yuda un muher hoven di Nortamérica transforma su personalidad?

¹⁰ Den algun caso, esei ta un berdadero lucha. Un muher hoven na Nortamérica tabatin cu lucha mashá duro pa cambia. Criá den un famía violento, e tabata víctima di abuso sexual como mucha i cu tempo a usa droga. Pero, droga ta caro, pues el a bende su curpa como prostituta pa paga pe bicio. També el a molestiá turista i a hórtanan i a termina pasando mas tempo den prisón i den cantina cu el a pasa na cas.

¹¹ Ora Testigo di Jehova a conocé, e tabata mama di un yiu ilegítimo, despues di varios aborto. No obstante, el a gusta loke el a tende for di Bijbel i a cuminza studié. Pronto el a cuminza edifica un relacion cu Dios i haci cambio den su bida.

12, 13. Splica con conocimento exacto despues di a ser inculcá ta obra como un forza cu ta causa cambio.

¹² Sin embargo, un lucha duro a speré, pasobra e personalidad bieu tabatin raíz hundo. Na un ocasion, algun conseho duná cu bon intencion a ofendele, el a bandona su estudio bíblico i a bolbe na su costumber mundano. Pero e no por a lubida e berdad bíblico inculcá den dje, i el a admiti: “De bez en cuando mi a sinti culpa, i e palabra di 2 Pedro 2:22 a pasa den mi mente: ‘Cachó ta bolbe na su mes sacamento i porco labá ne lodo.’”

¹³ Cu tempo, su conocimento a impulsé pa haci otro esfuerzo determiná. El a bisa: “Mi a cuminza habri porta pa Jehova Dios i pidi yudanza hopi bez.” Awor e personalidad nobo a saca raíz mas firme, aunque ainda e tabatin cu lucha duro. Un biaha, den un momento di debilidad, el a sucumbi na burachería i inmoralidad. Pero awor su reaccion a mustra cu e berdaderamente tabata cambiá. El a keda disgustá cu su mes i a bisa: “Mi a haci hopi oracion i studiamento.” Cu tempo, e Palabra di Dios a eherce tanto poder den su bida cu el a bira un cristian activo, hibando un bida limpi i onorabel. Ta haci varios aña caba cu e ta un persona totalmente diferente cu e persona abusá, adicto na droga i cu a biba desenfrená.

Un pueblo cu e Palabra di Dios a cambia

14, 15. (a) Cua forza di Dios ta obra mediante e Bijbel? (b) Menciona algun característica di cristian berdadero djawe.

¹⁴ E poder cu e Bijbel a eherce den e bida di hende humilde ta mustra cu e ta mas cu simplemente obra di hende. Como e Palabra inspirá di Dios, e Bijbel ta un canal pe obramento dje spiritu di Dios. E mesun spiritu cu a haci posibel milagro di Jesús ta yúdanos awe vence mal calidad i desaroya un personalidad cristian. Realmente, calidad básico cu hende cristian mester cultiva—amor, gozo, paz, gran pacenshi, bondad, husticia, fe, suavidad, i dominio propio—e Bijbel ta yama “fruta di spiritu.”—Galatio 5:22, 23.

¹⁵ E spiritu ta obra awe, no den poco hende so sino den miyones di hende cu “Jehova a siña” i cu ta disfruta di un ‘abundancia di paz’ di dje. (Isaías 54:13) Kende? Jesús a mencioná un manera pa identificánan, bisando: “Cu esei tur hende lo sa cu boso ta mi disípelnan, si boso tin amor den boso.” (Juan 13:35) Amor cristian ta un fruta di spiritu i un parti clave dje personalidad cristian nobo. Tin un grupo di hende cu ta mustra amor dje manera cu Jesús a mencioná?

16, 17. Cita comentario di curant cu ta yuda identifica hende cu “Jehova a siña” i cu ta disfruta di un ‘abundancia di paz.’

¹⁶ Wel, leza un parti di un carta skirbí ne curant nortamericano New Haven Register: “Aunque nan evangelizacion por a molestiábo of a hacíbo rabiá, manera a pasa ami, bo tin cu admira nan dedicacion, nan pureza, nan ehempel sobresaliente di comportamento humano i bida saludable.” E curant alemán Münchner Merkur a menciona e mesun grupo ora el a bisa: “Nan ta hende di mas onrado i pagador di belasting di mas puntual den e República Federal [alemán]. Nan obedencia na ley ta keda bisto den e manera cu nan ta corre nan auto i també den datos di crimen.”

¹⁷ Di ken e dos curant tabata skirbi? E mesun grupo mencioná den Herald di Buenos Aires, Argentina. E curant a bisa: “Aña tras aña Testigo di Jehova a demonstra cu nan ta ciudadano balente, serio, próspero i temeroso di Dios, claramente e clase di ciudadano cu e nacion mester.” Un investigacion sociólogo di Zambia (Africa) publicá den American Ethnologist ta menciona e mesun grupo. E ta bisa: “Testigo di Jehova ta experimenta mas éxito cu miembro di otro religion manteniendo enlace matrimonial mas fuerte.”

18, 19. Ki detaye ta ser duná di Testigo di Jehova den Italia i Zuidáfrica?

¹⁸ E curant italiano La Stampa a menciona Testigo di Jehova també ora el a bisa: “No tin ciudadano mas leal: nan no ta purba di evita pagamento di belasting ni no ta purba di evita ley inconbeniente pa nan mes probecho. Ideal moral di stima próhimo, nenga di tuma poder, no practica violencia i keda onrado personalmente (locual pa casi tur cristian ta ‘regla di diadomingo’ cu ta sirbi solamente pa predica riba preekstoel) ta un parti di nan bida ‘diario’.”

¹⁹ Un profesor di universidad di Zuidáfrica cu a experimenta discriminacion bao di ley racial dje país a yama Testigo di Jehova un “pueblo educá den ley halto di Bijbel cu realmente ta ‘kleurenblind.’” El a agrega e sigiente splicacion: “Esei ta un pueblo cu ta mira loke otro hende tá padén, no simplemente e color di nan cuero. Testigo di Jehova djawe ta forma e único berdadero hermandad humano.”

20. Pakico Testigo di Jehova ta sobresalí como diferente?

²⁰ Tal comentario ta mustra cu tin un grupo di hende cu a habri nan curazón pe Bijbel i riba locual e spiritu di Dios ta activo. Ta merece anotacion di cu esei ta e mesun pueblo cu nos a identifica caba como obediente ne mandamento di Jesús di predica e bon nobo di Reino rond di mundo. (Mateo 24:14) Pakico Testigo di Jehova ta sobresalí di tal manera? Di hopi manera nan no ta diferente cu otro hende. Nan tin e mesun debilidad carnal, e mesun problema económico, i e mesun necesidad básico. Pero, como un grupo, nan ta stima Dios, ta tuma e Bijbel na serio, i ta lagué eherce poder den nan bida.

21. E echo cu un pueblo tal como Testigo di Jehova por existi den e mundo djawe yen di odio ta duna prueba di kico?

²¹ Tin miyones di Testigo di Jehova den mas cu 200 país. Nan ta inclui hende di tur raza, idioma, i rango social imaginable. Pero, nan ta un hermandad internacional uní i pacífico. Nan ta bon ciudadano di tur país unda nan ta biba, pero primeramente nan ta ciudadano dje Reino di Dios, i nan tur ta mashá activo proclamando e bon nobo di tal Reino. Ta berdaderamente notable cu den e mundo desuní aki i yen di odio, un grupo tal como Testigo di Jehova por sikiera existi. Nan existencia ta duna prueba fuerte di cu e spiritu di Dios ta activo ainda den humanidad. I esei ta duna prueba cu e Bijbel en berdad ta “bibo i ta eherce poder.”

[Komentario na página 177]

E Bijbel realmente ta cambia hende

[Komentario na página 181]

Un conocimento di Dios ta haci hende deseá di ser manera E