Capítulo 20

Con mi por keda bon cu mi maestro?

“MI NO POR wanta un maestro inhusto,” segun e hovencita Vicky. Sin duda bo ta sintíbo mescos. Sin embargo, den un encuesta na 1981 di 160.000 hoven americano, 76 porciento a acusa nan maestro di algun sorto di favoritismo!

Hovenan ta keda molestiá ora nan marca ta abao pa loke nan ta kere ta bon trabao. Nan ta carga rencor ora disiplina ta parce mucho severo of innecesario of ta parce di ser e resultado di discriminacion racial. Nan ta keda rabiá ora un favorito dje maestro ta recibi atencion special of tratamento preferencial.

Ta cierto cu maestro ta leu di ser perfecto. Mescos cu tur otro hende, nan també tin capricho, problema, i sí, prehuicio. Sin embargo, e Bijbel ta duna e advertencia: “No sea purá den bo spiritu pa ofende.” (Eclesiastés 7:9) Asta maestro “ta trompica hopi bez. Si un hende no ta trompica den su palabra, esei ta un hende perfecto, capaz pa frena tur su curpa també.” (Santiago 3:2) Pues, bo no por duna bo maestro e beneficio dje duda?

Un hoven yamá Freddy a ripara cu su maestro “tabata papia skerpi cu tur hende.” Cu tacto, Freddy a bai cerca e maestro i a descubri e causa di su irritacion. E maestro a splica, “Net awe mi tabatin problema cu mi auto. El a cayenta riba camina pa scol i mi a yega laat na trabao.”

Maestro i nan favoritonan

Kico di favor special mustrá na alumno favorito dje maestro? Corda cu maestro tin cu enfrenta exigencia i presion extraordinario. E buki na inglés Ser hoven ta splica cu maestro ta enfrenta un “situacion serio” den locual nan tin cu purba di hala atencion di un grupo di hoven “kende nan mente ta generalmente na otro parti . . . Nan tin dilanti nan un grupo di hoven cu ta mashá caprichoso i destraíble, cu generalmente no ta costumá di concentra riba nada pa mas cu 15 minut.”

Ta straño, anto, cu maestro por presta mas atencion na alumno cu ta studia duro, ta presta atencion, of ta trátanan cu respet? Ta cierto cu por irritábo ora esnan cu ta labia e maestro ta recibi mas atencion cu bo. Pero, pakico molestiábo of bira jaluz si un alumno diligente ta e favorito dje maestro tan tempo cu e maestro no ta neglisha bo necesidad educacional? Además, tal bez ta un bon idea pa bo mes bira un poco mas diligente.

Gera den klas

Un alumno a bisa tocante su maestro: “El a sigi pensa cu nos tur a declara gera contra dje i cu p’sei el a decidi di dalnos promé. E ta un hende cu ta biba den miedu.” Sin embargo, hopi maestro ta kere cu nan tin derecho di tene “miedu.” Manera e Bijbel ta profetiza, esaki ta “tempo crítico duro pa trata cuné,” i hopi bez hovenan ta “sin dominio propio, feroz, sin stimacion di husticia.” (2 Timoteo 3:​1-3) P’sei, U.S.News & World Report a bisa: “Maestro, den hopi districto dje stad ta biba den miedu di violencia.”

Ex-maestro Roland Betts a bisa tocante maestro: “E muchanan ta considera cu ta nan responsabilidad natural pa . . . [den un sentido] púsha [maestro] i stootnan pa mira cuanto nan por wanta promé cu nan ta kibra . . . Ora e muchanan ta sinti cu nan a pusha un maestro nobo te na un cabei di nan límite, nan ta pusha mas.” Abo of bo compañénan di scol a tene parti den tal wega den e klas? Anto reaccion dje maestro no mester sorprendébo.

E Bijbel ta bisa: “Simple opresion por haci hende sabí comportánan manera loco.” (Eclesiastés 7:7) Den e ambiente di miedu i falta di respet cu ta yena cierto scol, ta di comprende cu algun maestro ta reacciona demasiado i ta bira disiplinario severo. Segun e buki na inglés E buki di instruccion pa hubentud: “Alumno cu . . . ta parce cu nan conducta di menospreciá e kerimento dje maestro generalmente ta ser menospreciá na buelta.” Sí, alumno hopi bez ta responsabel pe enemistad dje maestro!

També, considera efecto di wega cruel den klas. E hovencita Valeriana a exagera mashá poco ora el a menciona e “tortura, i tormento,” di maestro sustituto di parti di alumno. Roland Betts a agrega: “Maestro sustituto ta ser persigi sin misericordia den klas, hopi bez pushá te ne punto di kibra i explota.” Sigur cu nan por hacié i scapa, pa malu tur alumno hunto di ripiente ta laga nan buki of potlood cai na suela. Of nan por purba di bruha e maestro door di gaña cu nan ta bobo i haci como si nan no por comprende ningun palabra cu e ta papia. Segun e hoven Robert: “Nos ta sabotea e klas pa pret.”

No obstante, si bo ta cruel den klas, no keda soprendí si bo ta cosechá un maestro severo i enemigo. (Compara cu Galatio 6:7.) Pues, corda e regla di oro: “P’sei, tur loke bo kier pa hende haci cu bo, abo també tin cu haci mescos cu nan.” (Mateo 7:12) Nenga di participa den wega di klas. Keda atento na loke e maestro ta bisa. Sea cooperativo. Kizás cu tempo lo e sinti un tiki menos enemistad​—por lo menos en cuanto abo.

‘Mi maestro no ta gustámi’

Tin bez cu un choque di personalidad of un sorto di malcomprendimento por bira bo maestro contra bo; e ta mira bo hacimento di pregunta como rebelion of bo co’i pret como co’i bobo. I si e maestro no ta gustábo, e por keda incliná di bergonzábo of humiyábo. Enemistad mutuo por florece.

E Bijbel ta bisa: “No paga malu cu malu na ningun hende. . . . Si ta posibel, tanto como ta depende di bo, keda na paz cu tur hende.” (Romano 12:​17, 18) No purba di provoca bo maestro. Evita confrontacion innecesario. No duna bo maestro ningun motibo legítimo pa kehábo. Al contrario, purba di ser amigo. Bo ta puntra, “Amigo cuné?” Sí, mustra cortesía cumindando bo maestro cu respet ora bo ta drenta den e klas. Bo cortesía persistente​—asta un sonrisa de bez en cuando​—por posiblemente cambia su opinion di bo.​—Compara cu Romano 12:​20, 21.

Ta cierto cu sonrisa no ta scapábo for di un cierto situacion cada bez. Pero Eclesiastés 10:4 sí ta conseha: “Si e spiritu di un gobernante [of persona cu autoridad] mester subi contra bo [pa castigábo], no bandona bo mes lugar, pasobra calmo mes ta suaviza picá grandi.” Corda, també, cu “contesta, ora nan ta suave, ta aparta rabia.”​—Proverbio 15:1.

‘Mi ta merece un mihor marca’

Esei ta un keho común. Purba di resolve e problema papiando cu bo maestro. E Bijbel ta menciona con Natán a trata cu e trabao dificultoso di desenmascara un falta serio di parti di rey David. Natán no a drenta den e palacio gritando acusacion, sino a papia cu David cu tacto.​—2 Samuel 12:​1-7.

Abo, també, por acudi na bo maestro cu humildad i calmo. Ex-maestro Bruce Weber, ta hácinos corda: “Rebelion di alumno ta provoca obstinacion den e maestro. Bo no ta logra nada si bo rabia i ta grita of ta acusa di inhusticia grosero i ta priminti vinganza.” Purba di haci contacto na moda mas adulto. Kizás bo por cuminza pidiendo bo maestro di yudábo comprende su sistema di duna marca. Anto, segun Weber, bo por “purba di duna prueba cu bo tabata víctima di descuido of malcalculacion mas bien cu mal huzgamento. Usa e mesun sistema di duna marca dje maestro; mustré unda bo ta mira error den e marca cu el a dunábo.” Aunque e no ta cambia bo marca, bo madurez probablemente lo haci un impresion positivo riba bo maestro.

Duna bo mayornan di sa

Sin embargo, tin bez cu simplemente papiamento ta inútil. Por ehempel, wak e experencia di Suzana. Como un alumno di onor, el a keda escandalizá ora un maestro a cuminza duné cinco. Kico tabata e problema? Suzana tabata un Testigo di Jehova, i e maestro a admiti cu p’sei mes e no a gusta Suzana. Segun Suzana, “Esei realmente a frustrámi i mi no tabata sa kico pa haci.”

Suzana ta corda: “Mi a cobra curashi i a bisa mi mama [sin esposo] tocante e maestro. El a bisa, ‘Wel, kizás mi por papia cu bo maestro.’ I durante oudersavond el a drenta i a puntra mi maestro kico tabata e problema. Mi a kere cu mi mama realmente lo bira molestiá, pero e no a hacié. E simplemente a conbersa cuné.” E maestro a haci arreglo pa Suzana haya otro maestro.

Admitidamente, tur cuenta bruhá no ta caba nechi asina, i tin bez cu bo simplemente tin cu soporta. Pero si bo por sigi existi den paz cu bo maestro durante e aña, semper ta bini otro aña, ora bo por cuminza di nobo, kizás cu otro alumno​—i kizás cu asta un otro maestro pa bo siña di keda bon cuné.

Pregunta pa consideracion Capítulo 20

◻ Con bo por considera un maestro cu ta tratábo inhustamente?

◻ Pakico maestro hopi bez ta presta mas atencion na alumno favorito?

◻ Con bo por siña for di maestro cu ta parce fastioso?

◻ Pakico algun maestro ta parce enemigo di alumno?

◻ Con bo por aplica e regla di oro den klas?

◻ Kico bo por haci si bo ta kere cu bo ta víctima di marca of tratamento inhusto?

[Komentario na página 158]

Atencion cu e maestro ta presta na nan favorito ta crea rencor

[Komentario na página 163]

“Maestro den hopi scol di districto di stad ta biba den miedu di violencia.”—U.S.News & World Report

[Kuadro/Plachi na página 160, 161]

‘E maestro ta fastioso’

E buki na inglés E buki di instruccion pa famía cu tin yiu tiener ta bisa: “Algun encuesta ta mustra cu e mayoría di alumno tiener ta critica nan maestro, kehando cu nan ta fastioso of ta falta humor.” Tardi of temprán bo por haya maestro cu simplemente ta fastidiábo “te cu bo ta yora.” Kico bo por haci?

Un experimento reciente a mustra cu e nivel di concentracion di tiener ta basta halto den klas tal como arte industrial, educacion física, i música. Pero, e nivel di concentracion ta tira zambuya den klas cu ta siña idioma i geschiedenis.

Maestro cu ta siña educacion física of música ta mihor maestro cu esnan cu ta siña tema académico? Probablemente cu no. Ta posibel cu alumno tin un actitud negativo en cuanto tema académico? Si alumno ta decidi di antemano cu un tema ta fastioso, asta un maestro cu e don di Sócrates por tin dificultad di hala nan atencion. Ta posibel cu bo actitud tocante un cierto tema simplemente mester ta cambiá? Mustrando mas interés den loke bo ta siña por haci scol menos fastioso.

Tin bez cu asta alumno interesá den siñamento ta keha cu nan tin maestro “malu.” Pero, exactamente kico ta “bon” maestro? Segun un hovencita: “Mi ta gusta e maestro cu ta siña wiskunde pasobra e ta pret.” Un mucha homber a elogia e maestro cu a siña inglés pasobra ‘el a conta hopi chasco.’

Pero, aunque maestro cu ta pret of ta diverti tin bentaha, esei no ta sustituto di ser “adecuadamente capacitá pa siña otronan.” (2 Timoteo 2:2) Aunque e Bijbel kier men capacitá pa siña spiritualmente, e ta duna énfasis ne echo cu bon maestro mester conoce nan tema.

Desafortunadamente, conocimento i un personalidad alegre no ta hunto den e mesun persona. Por ehempel, apóstol Pablo tabata sumamente capacitá como instructor dje Palabra di Dios. Pero algun hende cristian den e dia di Pablo a keha cu “su presencia [tabata] swak i su papiamento tabata despreciabel.” Pablo a contesta: “Aunque mi no ta capaz pa papia, siguramente mi ta capaz den conocimento.” (2 Corintio 10:10; 11:6) Si algun hende a pasa por halto di loke Pablo a bisa i solamente a mira loke nan a kere e tabata falta como orador, nan a perde oportunidad di gana conocimento balioso. No haci e mesun equibocacion den e asunto di scol! Promé cu bo ta desacredita un maestro como “malu,” puntra bo mes, ‘E sa di kico e ta papia? Mi por siña algo foi dje?’

Kizás bo tin cu presta mas cu gewoon atencion na maestro cu ta un orador fastioso. Purba di skirbi nota pa bo atencion keda fihá riba loke e ta papia. Mehora loke bo ta siña den klas fastioso cu mas studiamento na cas.

Barbara Mayer, cu ta maestra, a bisa: “Maestro, cu probablemente a repiti e mesun les mas bez cu nan por corda, tin e tendencia di cai den un rutina.” Kico bo por haci pe les ser mas bibo? “Haci cambio i hiza bo dede i pidi mas informacion . . . Haci e maestro realmente bisábo tur loke e sa.” Maestro ta gusta esei? Sí, si bo ta puntra cu respet. (Colosense 4:6) Segun Mayer: “Bo por descubri cu e maestro ta bini ne klas poco mas prepará, i no cu informacion ariba ariba so.”

Entusiasmo ta contagioso, i bo deseo pa siña por wel indjecta mas bida den e maestro. Naturalmente, no spera un cambio drástico. I por tin algun klas unda bo tin cu simplemente wanta cu un sonrisa pa un tempo. Pero, si bo ta un bon scuchador i ta sinceramente interesá den loke ta pasa, bo por siña toch, aunque e maestro ta fastioso.

[Plachi na página 162]

E aumento di ola di crimen den scol ta haci e trabao di maestro dificultoso

[Plachi na página 164]

Si bo ta kere cu tin inhusticia, papia cu respet cu bo maestro