Capítulo 22

Cua ofishi mi mester scoge?

‘KICO mi mester haci cu e resto di mi bida?’ Tardi of temprán e pregunta spantoso ei ta confrontábo. Un cantidad confundidor di seleccion ta presenta​—medicina, comercio, arte, educacion, ciencia di computer, engineer, of otro ofishi. I bo por sintíbo mescos cu e hoven cu a bisa: “Loke mi ta considera di ser bon éxito . . . ta di mantene e nivel di bida cu mi a goza ora mi a lanta.” Of manera otronan, bo por tin e soño di mehora bo suerte financiero den bida.

Pero, bon éxito no kier men mas cu ganashi material? Cualkier ofishi seglar por dunábo berdadero realizacion?

‘E no a nifica nada’

Encantador, excitante, probechoso! Asina hopi bez cine, TV, i buki ta pinta ofishi seglar. Pero pa alcanza loke nan ta yama bon éxito, hopi bez hende di ofishi tin cu competi cu otro den un lucha di bida i morto pa haya fama. Dr. Douglas LaBier ta conta di con hende hoven, hopi di locual tin ofishi di un bida rápido i di halto tecnología, pero ta bisa cu nan no ta keda satisfecho, ta sinti ansha, depresion, banidad, miedu, i també un lista largu di keho físico.

Leu atrás rey Salomón a desenmascara e banidad di simplemente bon éxito di mundo. Cu e apoyo di recurso casi sin límite, Salomón a cumpli cu un lista asombroso di logramento di ofishi. (Leza Eclesiastés 2:​4-10.) Pero, Salomón a conclui: “Ami, asta ami, a enfrenta tur e trabao di mi cu mi man a haci, i, e trabao duro cu mi a traha duro pa haci, i, mira! tur tabata banidad [“Mi a realiza cu e no a nifica nada,” Today’s English Version] i un lucha tras di bientu.”​—Eclesiastés 2:11.

Empleo por wel resulta den riqueza i fama, pero e no por satisface e ‘necesidad spiritual’ di hende. (Mateo 5:3) P’sei, satisfaccion ta evita hende cu ta edifica nan bida ariba trabao seglar so.

Un moda di biba cu ta satisface

Rey Salomón a conseha: “E conclusion dje asunto, despues di a tende tur cos, tá: Teme e Dios berdadero i warda su mandamento. Pasobra esei ta tur e obligacion di hende.” (Eclesiastés 12:13) E obligacion primario pa hende cristian djawe ta di predica e mensahe di Reino. (Mateo 24:14) I hovenan cu ta tuma na serio nan obligacion dilanti Dios ta síntinan obligá di tene un parti tanto completo posibel den e trabao​—aunque nan no ta keda naturalmente incliná di predicá. (Compara cu 2 Corintio 5:14.) En bez di sigi tras di trabao seglar di tempo completo, miles di hoven ta scoge di sirbi como evangelizador pionero di tempo completo. Otronan ta sirbi como misionero den stranhería of den oficina di sucursal dje Sociedad Watch Tower.

Emily, cu a bandona su ofishi como secretaria ehecutiva pa bira pionero, a bisa: “Mi a desaroya un berdadero amor pe sirbishi.” Sí, e sirbishi di tempo completo ta e moda di biba di mas satisfaciente i excitable imaginabel! I cua privilegio mas grandi hende por tin como “compañé di trabao di Dios”?​—1 Corintio 3:9.

Educacion mas halto ta probechoso?

Mayor parti di predicador pionero ta mantene nan mes cu trabao di mitá tempo. Pero, kico bo por haci si despues bo tin cu mantene un famía? Siguramente bo nunca ta sinti duele di a dedica e añanan di bo hubentud ne sirbishi di Dios! Pero, no ta razonabel pa un hoven obtene diploma di universidad promé i kizás sigi e ministerio despues?

Naturalmente e Bijbel no ta detaya exactamente cuanto aña di scol un hoven cristian mester obtene. Ni tampoco e no ta condena educacion. Jehova Dios, e “Gran Instructor” ta anima su pueblo pa leza bon i pa expresa nan mes claramente. (Isaías 30:20; Salmo 1:2; Hebreo 5:12) Además, educacion por ampliá nos comprendimento di hende i dje mundo den locual nos ta biba.

No obstante, diploma di universidad cada bez ta bal e dedicacion enorme di tempo i placa cu e ta exigi?a Datos ta indica cu graduado di universidad ta recibi salario mas halto i ta sufri di menos desempleo cu graduado di scol segundario. Sin embargo, e buki na inglés Planeamento di bo educacion den colegio ta hácinos corda cu tal datos ta simplemente un promedio. Solamente un menoría di graduado di universidad ta recibi salario realmente halto; e otronan ta biba cu salario cu ta hopi mas realista. Además, entrada halto cu nan ta bisa cu graduado di universidad ta recibi també por ta e resultado di factor tal como “capacidad extraordinario, motivacion, oportunidad di sector unda cu tin empleo, . . . talento special”​—i no simplemente nan educacion.

“Diploma [di universidad] no ta garantiza mas bon éxito den empleo,” segun e Departamento di Labor di E.U. “E porciento [di graduado di universidad] empleá den ofishi profesional, técnico, i administrativo . . . a mengua pasobra tal ofishi no a aumenta suficientemente lihé pa percura empleo pe cantidad aumentante di graduado. Como resultado, aproximadamente 1 di cada 5 graduado [di universidad] cu a busca empleo entre 1970 i 1984 a acepta trabao cu generalmente no a exigi un diploma. Tal cantidad mucho grandi di graduado probablemente lo sigi te casi e aña 2 mil.”

Mas echo pa considera

Diploma di universidad por mehora of no por mehora e prospecto di bo empleo. Pero un echo ta innengable: “E tempo cu ta keda ta reducí”! (1 Corintio 7:29) Pa tur su supuesto beneficio, cuater aña of mas den un universidad ta e mihor manera pa usa e tempo cu ta keda?​—Efesio 5:16.

Educacion di universidad por guiábo cerca of alehábo for di bo meta spiritual? No lubida, entrada grandi no ta un prioridad cristian. (1 Timoteo 6:​7, 8) Sin embargo, un encuesta di administrador di universidad americano a pinta alumno djawe como ‘concentrá riba ofishi, interesá den bon éxito material, interesá den nan mes.’ “Placa. Ta parce cu tur tema di nos conbersacion ta placa,” segun un grupo di alumno. Con rondoná den un ambiente di competencia intenso i materialismo egoísta por afectábo?

Kizás universidad no tin multitud desordená cu nan tabatin entre 1960 i 1970. Pero un reduccion di desordu den universidad apenas kier men cu ambiente di campo di universidad ta saludable. Un investigacion di bida di campo di universidad a conclui: “Alumno ainda tin libertad casi sin límite den asunto personal i social.” Nan ta usa droga i alcohol libremente, i inmoralidad ta normal​—i no ta abnormal. Si esei ta cierto di universidad den bo país, bo bida ei no por stroba bo esfuerzo pa keda moralmente limpi?​—1 Corintio 6:18.

Un otro preocupacion ta e asociacion wel documentá di influencia di educacion halto cu ta reduci “sigimento di siñanza religioso fundamental.” (Lo sagrado den un época seglar, na inglés) E presion pa mantene marca halto a haci algun hoven cristian neglisha nan actividad spiritual i asina bira víctima dje atake di pensamento seglar cu universidad ta promove. Algun hoven a perde nan fe por completo.​—Colosense 2:8.

Alternativa di educacion universitaria

Den bista di tal echo, hopi hoven cristian a decidi di no busca educacion universitaria. Hopi a haya cu e entrenamento cu e congregacion di Testigo di Jehova ta ofrece​—e Scol di Ministerio Teocrático simanal specialmente​—ta dúnanan un berdadero bentaha den buscamento di empleo. Aunque nan no tin diploma di universidad, hoven asina ta siña equilibrio, apto pa expresa nan mes, i ta basta capaz pa cumpli cu responsabilidad. Además, mientras cu nan ta den scol segundario, algun ta tuma curso di type, programacion di computer, drechamento di auto, bankwerk, etc. Ofishi asina ta conbeniente pa empleo di mitá tempo i hopi bez tin hopi oportunidad. I aunque hopi hoven no ta gusta ‘traha cu nan man,’ e Bijbel ta duna dignidad na hacimento di “trabao duro.” (Efesio 4:28; compara cu Proverbio 22:29.) Sí, Jesucristo mes a siña un ofishi asina bon cu el a yega di ser yamá “e carpinté”!​—Marco 6:3.

Ta cierto cu den algun país graduado di universidad ta asina abundante cu ta difícil pa obtene asta empleo gewoon sin mas entrenamento di ofishi. Pero hopi bez tin programa di aprendista, scol manera MAVO i MTS, i curso di corto plazo di universidad cu ta siña ofishi necesario, pidiendo un mínimo di tempo i placa. Nunca lubida tampoco cu tin un factor cu datos tocante empleo no ta tuma na cuenta: E promesa di Dios di percura pa hende cu ta duna prioridad na interés spiritual.​—Mateo 6:33.

E prospecto di empleo i sistema di educacion ta varia di un lugar pa otro. Hovenan tin diferente capacidad i inclinacion. I aunque nos ta recomenda e ofishi dje ministerio cristian como beneficioso, ainda esei ta un asunto di seleccion personal. Abo i bo mayornan tin cu considera cuidadosamente tur factor enbolbí pa boso decidi cuanto educacion ta bon pa bo. ‘Cada un mester wanta su mes carga’ tumando tal decision.​—Galatio 6:5.

Por ehempel, si bo mayornan ta insisti pa bo matricula den universidad, bo no tin alternativa sino di obedecénan tan tempo cu bo ta biba bao di nan autoridad.b (Efesio 6:​1-3) Kizás bo por sigi biba na cas i evita di ser hibá pe bida di universidad. Sea selectivo scogiendo cua curso bo ta tuma, por ehempel, enfocando ariba siñamento di ofishi en bez di filosofía di mundo. Vigila bo asociacion. (1 Corintio 15:33) Mantene bo mes spiritualmente fuerte asistiendo na reunion, participando den e sirbishi di feld, i den estudio personal. Algun hoven cu a keda obligá di bai universidad asta a logra haci trabao di pionero, scogiendo un orario di curso cu a haci esei posibel.

Scogé bo ofishi cu cuidao i cu oracion, pa esei no solamente dunábo felicidad personal sino haci posibel pa bo ‘warda tesoro den cielo.’​—Mateo 6:20.

[Nota]

Pregunta pa consideracion Capítulo 22

◻ Pakico ofishi seglar hopi bez no ta duna felicidad personal?

◻ Pakico tur hoven temoroso di Dios mester considera un bida den e sirbishi di tempo completo?

◻ Menciona algun beneficio cu nan ta bisa ta bini di educacion mas halto, i loke nan ta bisa ta semper e berdad?

◻ Cua peliger educacion mas halto ta presenta pa hovenan cristian?

◻ Hovenan por considera cua alternativa pa educacion mas halto?

[Komentario na página 175]

Empleo por wel trece riqueza i fama, pero e no por satisface e ‘necesidad spiritual’ di hende

[Komentario na página 177]

“Diploma [di universidad] no ta garantiza mas bon éxito den e campo di empleo”