Educacion cu un Propósito

“Siña conocimento na hende husto i nan saber lo aumenta.”—PROVERBIO 9:9.

1. Kico Jehova Dios ta spera di su sirbidornan en cuanto conocimento?

JEHOVA DIOS ta un “Dios di conocimento.” (1 Samuel 2:3) E ta educa sirbidor di dje. Moisés a profetiza cu pueblo contemporario lo bisa di Israel: “E gran nacion aki sin duda ta un pueblo sabí i entendido.” (Deuteronomio 4:6) Cristian berdadero també mester ta bon informá. Nan tin cu ser studiante excelente dje Palabra di Dios. Apóstol Pablo a mustra e propósito di tal estudio ora el a skirbi: “Nos . . . no a para den hacimento di oracion pa boso ni di pidi pa boso ser yená cu conocimento exacto di su boluntad den tur sabiduría i comprension spiritual, pa boso camna digno di ­Jehova afin di agradé plenamente mientras cu boso ta sigi produci fruta den tur bon obra i aumenta den conocimento exacto di Dios.”—Colosense 1:9, 10.

2. (a) Kico ta necesario pa bo gana conocimento exacto di Dios? (b) Con e Cuerpo Gobernante di Testigo di Jehova a trata cu e asunto?

² Pa studia afin di gana conocimento exacto di Dios i di su propósito, por lo menos un mínimo di educacion ta necesario. Pero hopi hende a yega di siña e berdad dje Palabra di Dios den país unda nan tabatin poco of ningun oportunidad pa recibi un educacion seglar adecuado. Nan tabatin un desbentaha. Pa vence e problema, e Cuerpo Gobernante di Testigo di Jehova pa hopi aña caba a duna instruccion pa organiza klas den e congregacion pa siña leza i skirbi, unda cu ta necesario. Mas cu 30 aña pasá, e curant brasilero Diário de Mogi a publica un artículo titulá “Testigo di Jehova ta haci gera contra ignorancia.” El a bisa: “Un instructor capacitá ta cuminza . . . siña cu pacenshi otronan leza i skirbi. . . . Studiante, debí ne mesun circunstancia cu a impulsánan como sirbidor di Dios, mester desaroya nan conocimento dje idioma pa nan duna discurso.” Asina, miles di hende den tur e mundo a wordu yudá pa bira bon studiante dje Palabra di Dios. Nan a acepta tal educacion básico pa un propósito halto.

Aptitud ta Necesario pa ser Predicador Efectivo

3, 4. (a) Pakico cristian berdadero ta interesá den educacion? (b) Cua situacion a existi den Israel, i cua educacion básico ta necesario den nos congregacion djawe?

³ Cristian berdadero ta interesá den educacion, no pe bentaha cu e ta duna, sino pa bira sirbidor mas efectivo di Jehova Dios. Cristo a duna tur hende cristian e mision di “haci disípel di hende di tur nacion, . . . siñando nan pa warda tur loke mi a manda boso.” (Mateo 28:19, 20) Pa hende cristian siña otro persona, nan mes tin cu gana conocimento promé, i esei ta exigi un bon sistema di estudio. Nan mester ta capaz pa examina cuidadosamente e Scritura. (Echo 17:11) Pa cumpli cu nan comision, ta necesario també pa nan leza flot.—Mira Habacuc 2:2; 1 Timoteo 4:13.

⁴ Manera nos a mira den e artículo anterior, tin bon motibo pa kere cu, en general, asta muchanan den Israel di antigua tabata sa leza i skirbi. (Huez 8:14; Isaías 10:19) Predicador cristian djawe tin cu skirbi nota nechi ora nan ta duna testimonio di cas pa cas. Nan ta skirbi carta, ta skirbi nota den reunion, i ta marca les di estudio. Tur esei ta exigi skirbimento na moda cu hende por lezé. Pa tene cuenta den e congregacion, por lo menos conocimento básico di rekenen ta necesario.

Bentaha di Educacion Adecuado

5. (a) E palabra “scol” tabatin cua origen? (b) Hovenan mester probecha di cua oportunidad?

⁵ Ta interesante cu e palabra “scol” ta bini dje palabra griego skho·leʹ, cu originalmente a nifica “tempo liber” of e uso di tempo liber pa algun actividad serio, tal como siñamento. Despues el a yega di indica e lugar unda tal siñamento ta ser hací. Esei ta indica cu, na un tempo, solamente hende di categoría—den Grecia i den casi tur otro país—tabatin tempo liber pa educacion. Hende peón generalmente a keda ignorante. Awe, den casi tur país, mucha i hovenan ta ser duná tempo liber pa siña. Muchanan cu ta Testigo di Jehova siguramente mester cumpra e tempo oportuno pa bira sirbidor educá i capacitá di Jehova Dios.—Efesio 5:15, 16.

6, 7. (a) Menciona algun bentaha di educacion apropiado. (b) Di ki manera por ta útil pa siña otro idioma? (c) Ora cu hopi hovenan ta caba scol, nan ta contra cu cua situacion awe?

⁶ Un conocimento básico di geschiedenis, aardrijkskunde, wetenschap, etc., por yuda Testigo di Jehova hoven bira sirbidor maduro. Den scol, nan no solamente ta siña un variedad di les sino també con pa siña. Siñamento i studiamento di cristian berdadero no ta para ora nan ta caba scol. No obstante, e beneficio cu nan ta saca for di nan studiamento ta depende mashá di si nan sa con pa studia. Tanto nan educacion seglar como loke nan ta recibi den e congregacion por yúdanan desaroya nan capacidad di siña. (Proverbio 5:1, 2) Ora nan ta leza algo, nan por distingi mihor loke ta importante, loke nan mester nota i memoriza.

⁷ Por ehempel, siñamento di otro idioma no solamente ta desaroya e capacidad mental di hovenan sino també ta hácinan mas útil den e organizacion di Jehova Dios. Den algun sucursal dje Sociedad Watch Tower, tin ruman hoven cu a haya cu ta probechoso cu nan por papia i leza inglés flot. Además, tur sirbidor cristian mester haci esfuerzo pa expresa nan mes correctamente den nan idioma natural. E bon nobo di Reino ta merece expresion di manera claro i gramaticalmente correcto. Echo ta mustra cu den e mundo djawe, tin hopi hoven cu, despues di caba scol, nan tin dificultad ainda pa skirbi i papia correctamente i haci calculacion di mas senciyo; i nan sa mashá poco mes di geschiedenis i aardrijkskunde.

Educacion Adecuado

8. Cua texto bíblico ta aplica na educacion seglar i na loke hende por haci pa mantene nan mes?

⁸ P’sei, ta parce cu awor ta un tempo apropiado pa considera e actitud di hende cristian pa cu educacion seglar. Cua principio bíblico ta aplica ne asunto? Den e promé lugar, den casi tur país sumision apropiado na “César” ta exigi pa mayornan cristian manda nan yiunan scol. (Marco 12:17; Tito 3:1) En cuanto Testigo di Jehova hoven, den nan les di scol nan mester corda Colosense 3:23, cu ta bisa: “Cualkier cos cu bo ta haci, traha riba dje cu tur bo alma como pa Jehova, i no pa hende.” Un otro principio cu ta aplica ne asunto ta cu hende cristian mester mantene nan mes, aunque nan ta pionero, of predicador di tempo completo. (2 Tesalonicense 3:10-12) Si un homber ta casá, e tin deber di mantene su esposa i yiu cu por nace, i un poco mas pa duna na esnan cu tin necesidad i pa apoya e trabao di predica local i mundial.—Efesio 4:28; 1 Timoteo 5:8.

9, 10. (a) Cua tendencia ta ser mirá den hopi país? (b) Un sirbidor pionero por considera cua sueldo como adecuado?

⁹ Cuanto educacion un hoven cristian mester recibi afin di respeta tal principio bíblico i cumpli cu nan obligacion cristian? Esei ta varia di país pa país. Sin embargo, en general, ta parce cu den hopi país e nivel di educacion necesario pa gana sueldo razonabel ta mas halto awor cu den e tempo di antes. Informe di sucursal dje Sociedad Watch Tower den diferente parti di mundo ta indica cu den hopi lugar ta difícil pa obtene empleo cu ta paga sueldo razonabel sin diploma of den algun país asta cu diploma di scol segundario.

¹⁰ Kico kier men “sueldo razonabel”? Esei no ta indica sueldo halto. E Diccionario General de la Lengua Española ta bisa cu “razonabel” kier men den e contexto aki: “Mediano, regular, suficiente.” Por ehempel, kico por ta yamá “suficiente” pa esnan cu kier bira predicador pionero dje bon nobo? Generalmente, ruman asina tin mester di empleo di tempo parcial pa nan evita di pone un “carga costoso” riba nan rumanan of nan famía. (1 Tesalonicense 2:9) Nan sueldo por ta yamá “suficiente,” si e ta yega pa nan por hiba un bida decente pero cu suficiente tempo i forza pa cumpli cu nan sirbishi cristian.

11. Pakico algun hoven a bandona e sirbishi di pionero, i cua pregunta ta presenta?

¹¹ Cua situacion ta existi hopi bez awendia? Segun informe, den algun país hopi hoven cu bon intencion a kita for di scol despues di a recibi e mínimo educacion obligatorio pa bira pionero. Nan no tin ofishi ni calificacion seglar. Si nan mayornan no a yúdanan, nan tabatin cu obtene empleo di tempo parcial. Algun tabatin cu acepta empleo den locual nan mester traha mashá ora pa nan mantene nan mes. Despues di a gasta nan curpa físicamente, nan a bandona e sirbishi di pionero. Kico nan por haci pa mantene nan mes i bolbe ne sirbishi di pionero?

Un Punto di Bista Balanzá di Educacion

12. (a) Hende cristian ta evita cua dos punto di bista extremo en cuanto educacion? (b) Educacion mester cumpli cu cua propósito pa sirbidor dedicá di Jehova Dios i nan yiunan?

¹² Un punto di bista balanzá di educacion por yuda. Pa hopi hoven di mundo, educacion ta un símbolo di prestigio, algo pa yúdanan subi te na un categoría halto, e clave pa un moda di biba próspero i materialista. Pa otronan, scol ta un carga pisá pa kita foi dje lo mas pronto posibel. Ningun punto di bista asina ta apropiado pa cristian berdadero. Kico, anto, nos por yama “un punto di bista balanzá”? Hende cristian mester mira educacion como un medio pa alcanza un fin. Den e último dianan aki, nan propósito ta di sirbi Jehova Dios cuanto cu ta posibel i di manera mas efectivo. Den país unda nan ta biba, si e mínimo di educacion of asta scol segundario por permitínan obtene empleo cu ta paga sueldo insuficiente pa nan mantene nan mes como pionero, anto nan por considera educacion of entrenamento extra. Nan por haci esei cu e meta específico di e sirbishi di tempo completo na bista.

13. (a) Con un hermana den Isla Filipina por a sigi den su sirbishi como pionero i cumpli cu su obligacion di famía? (b) Cua advertencia ta oportuno?

¹³ Algun a tuma curso di entrenamento cu a ofrece oportunidad di empleo pa nan por drenta den e sirbishi di tempo completo of bolbe na dje. Un hermana den Isla Filipina a mantene e famía, pero e kier a bira pionera. Segun e sucursal: “E por a haci esei pasobra el a recibi mas educacion pe diplomá como accountant oficial.” Segun e mesun informe dje sucursal: “Nos tin basta hopi ruman cu ta tuma curso i alabez por planeá nan orario pa ser pionero. Generalmente nan ta bira mihor publicador pasobra nan ta mas estudioso, con tal cu nan no ta bira demasiado ambicioso i kier progresa den mundo.” E último palabra ei mester hácinos pensa. Nos no mester perde bista dje propósito di mas educacion, ora esei ta parce necesario, ni cambié pa un meta materialista.

14, 15. (a) Pakico nos no mag traha regla permanente en cuanto educacion? (b) Algun ruman responsabel a recibi cua educacion seglar, pero con nan a ser recompensá?

¹⁴ Den algun país, tin ambachtschool cu por prepara hoven cristian pa un ofishi of puesto despues di a graduá. Asta ora esei no ta e caso, den algun país hovenan diligente cu solamente educacion básico ta obtene empleo di tempo parcial cu ta paga suficiente sueldo pa nan ser pionero. P’sei, regla permanente no mester ta trahá ni na fabor ni contra mas educacion.

¹⁵ Hopi ruman cu ta sirbi awor den puesto di responsabilidad como superintendente biahero, den oficina central dje Sociedad, of den un sucursal, a recibi solamente un educacion básico. Nan tabata fiel pionero, a sigi siña, a recibi entrenamento, i tabata confiá cu mas responsabilidad. Nan no ta corda malai. En cambio, algun otro hoven a scoge educacion di universidad i a kita cai for di camina, esclabizá pa filosofía i “sabiduría di mundo” cu a destrui nan fe.—1 Corintio 1:19-21; 3:19, 20; Colosense 2:8.

Calcula e Gasto

16. (a) Ken ta decidi si mas educacion ta necesario, i kico nos mester mantene den e promé lugar? (b) Kico nos mester tuma na cuenta?

¹⁶ Ken ta decidi si un hoven cristian mester busca mas educacion of entrenamento? E principio bíblico di hefatura ta drenta den e wega. (1 Corintio 11:3; Efesio 6:1) Riba e base ei, mayornan siguramente mester guia nan yiunan den e scogimento di ofishi of empleo i també cuanto educacion ta necesario. Den hopi país scogimento di educacion i ofishi mester ta hací pronto durante scol segundario. Esei ta e tempo ora mayornan cristian i yiu mester busca e guía di Jehova Dios pa tuma decision sabí, manteniendo den e promé lugar interés di Reino. Hovenan tin diferente inclinacion i aptitud. Mayornan sabí ta tuma esei na cuenta. Cualkier trabao onorabel ta digno, sea cu ta oficinista of trabao fisical. Aunque mundo por halza trabao di oficina i ta menosprecia trabao duro fisical, e Bijbel di ningun manera ta haci esei. (Echo 18:3) P’sei, despues di a haci oracion i a haci consideracion cuidadosamente, e mayornan i hovenan cristian djawe ta decidi na fabor of contra mas educacion despues di scol segundario, anto otronan den e congregacion no mag criticánan.

17. Algun mayornan cristian ta scoge kico pa nan yiunan?

¹⁷ Mayornan cristian tin derecho di decidi na moda responsabel si nan yiunan lo sigi studia despues di scol segundario of no. E duracion di tal estudio por varia segun e ofishi of puesto cu nan ta scoge. Pa motibo financiero i pa nan yiunan por drenta den e sirbishi di tempo completo lo mas pronto posibel, hopi mayornan cristian a scoge pa nan yiunan un curso di corto plazo den ambachtschool. Den algun caso hovenan mester ta leerjongen den un ofishi pero semper cu e meta di un bida di sirbishi pleno na Jehova Dios.

18. Si bo ta tuma mas curso, kico bo mester tene presente?

¹⁸ Si nan ta tuma mas curso, siguramente esei no mester ta e motibo di haya mas diploma of busca puesto prestigioso den e mundo aki. Curso mester ta escogí cu cuidao. E revista aki a enfatiza correctamente e peliger di educacion halto, pasobra hopi educacion halto ta na conflicto cu “siñanza saludable” dje Bijbel. (Tito 2:1; 1 Timoteo 6:20, 21) Además, desde 1970, hopi scol di siñanza superior a bira couveuse di inmoralidad i maldad. E “sclabo fiel i prudente” a duna spiertamento fuerte pa evita tal ambiente. (Mateo 24:12, 45) Sin embargo, nos tin cu admiti cu hovenan djawe ta contra cu e mesun peliger den scol segundario i colegio técnico i asta den nan lugar di empleo.—1 Juan 5:19.a

19. (a) Esnan cu ta decidi di tuma mas curso mester tene cua precaucion? (b) Con algun a usa nan educacion pa progresa spiritualmente?

¹⁹ Si boso ta decidi cu e Testigo di Jehova hoven tin mester di mas educacion, si ta posibel, tuma esei na cas, asina e por sigi su costumber di estudio cristian normal, asisti na reunion, i predica. Na principio bo mester mantene un posicion firme també en cuanto principio bíblico. Bo mester corda cu Daniel i su tres compañé hebreo tabata catibo den stranhería ora nan a keda obligá di tuma curso di educacion superior den Babilonia, pero nan a mantene firmemente nan integridad. (Daniel, capítulo 1) Testigo di Jehova hoven den varios país, cu a mantene interés spiritual den e promé lugar, a tuma curso pa capacitánan pa trabao di tempo parcial como accountant, comerciante, maestro, traductor, interpretador, i otro ofishi cu a gana sueldo adecuado pa mantenénan den nan vocacion principal, esta, e sirbishi di pionero. (Mateo 6:33) Varios hoven asina despues a bira superintendente biahero of trahador boluntario den Betel.

Un Pueblo Uní i Educá

20. Cua distincion mundano no mester existi den Testigo di Jehova?

²⁰ Den e pueblo di Jehova, sea cu bo ofishi ta oficinista, ta fisical, cunuquero, of di hotel, tur tin cu ser bon studiante di Bijbel i maestro capaz. E capacidad cu nos tur ta alcanza cu lezamento, studiamento, i siñamento ta despidi dje distincion cu mundo ta haci entre oficinista i peón. Esei ta establece unidad i respet mutuo cu ta sobresaliente den trahador boluntario den cas di Betel i riba sitio di construccion dje Sociedad Watch Tower, unda calidad spiritual ta mas importante i un necesidad. Na tal lugar oficinista cu experencia ta traha gozosamente cu homber di ofishi den trabao fisical, den un ambiente di amor i aprecio.—Juan 13:34, 35; Filipense 2:1-4.

21. Hovenan cristian mester tin cua meta?

²¹ Mayornan, pone dilanti boso yiunan e meta di ser miembro útil dje sociedad di mundo nobo! Hovenan cristian, probecha di boso oportunidad pa haya educacion como un medio pa capacita boso pa haya un gara mas fuerte riba boso privilegio den e sirbishi di Jehova Dios! Como esnan siñá, boso tur resulta di ser miembro bon prepará dje sociedad teocrático tanto awor como pa semper den e “tera nobo” cu Dios a priminti.—2 Pedro 3:13; Isaías 50:4; 54:13; 1 Corintio 2:13.

[Nota]

Pone Bo Memoria na Prueba

◻ Pakico cristian berdadero ta interesá den educacion?

◻ Cristian berdadero ta evita cua punto di bista extremo di educacion?

◻ Nos mester tuma na cuenta cua peliger di scol mas halto, i tuma cua precaucion?

◻ Cua distincion mundano no mester existi den e pueblo di Jehova?

[Plachi na página 16]

Hovenan cristian cu ta studia diligentemente por bira miembro mas útil dje sociedad di mundo nobo

[Plachi na página 19]

E motibo pa haya mas educacion mester ta bo deseo di sirbi Jehova Dios mihor