Capítulo 11

Juan a prepara e camina

DIESIETE aña a pasa desde cu Jesús tabata un mucha di 12 aña di edad haciendo pregunta na maestro den e tempel. Awor ta primavera di aña 29 EC, i ta parce cu tur hende ta papia tocante Juan, primo di Jesús, cu tabata predica den tur e tera rond di rio Jordan.

Juan en berdad tabata un homber impresivo, tanto di aparencia como cu palabra. Su bistí tabata di lana di camel, i el a bisti un faha di cuero rond di su custía. Su cuminda tabata sprinkhan i stropi di abeha di mondi. I su mensahe? “Arrepenti boso, pasobra e reino di cielo a yega cerca.”

Su mensahe a excita oyentes. Hopi di nan a reconoce nan necesidad di arrepenti, esta, cambia nan actitud i rechaza nan moda di anda di antes como indeseabel. Pues, for di territorio tur rond di Jordan, i asta for di Jerusalem, hende a acudi na Juan na gran cantidad, i el a bautizánan, bahando nan bao di awa dje rio Jordan. Pakico?

Juan a bautiza hende como un símbolo, of como un reconocimento di nan arrepentimento di curazón di nan picá contra e pacto di Ley di Dios. P’sei, ora algun fariseo i saduceo religioso a yega na Jordan, Juan a condenánan. El a yámanan “Yiu di cascabel. Produci fruta cu ta pas cu arrepentimento. I no cuminza bisa den boso mes, ‘Nos tin Abraham como tata.’ Pasobra mi ta bisa boso cu Dios tin poder di lanta yiu pa Abraham for dje piedranan aki. En berdad, e hacha ta puesto caba na raíz dje palu; pues, tur palu cu no ta produci fruta excelente lo ser cortá i tirá den candela.”

Debí na tur e atencion cu Juan a recibi, hudío a manda sacerdote i levita cerca dje. Nan a puntra: “Ken bo tá?”

Juan a admiti: “Mi no ta Cristo.”

Nan a puntra: “Kico, anto? Bo ta Elías?”

El a contesta: “Mi no tá.”

“Bo ta e profeta?”

“No!”

Pues nan a cuminza insisti: “Ken bo tá? pa nos duna contesta na esnan cu a mándanos. Kico bo ta bisa tocante bo mes?”

Juan a splica: “Mi ta boz di hende cu ta sclama den desierto, ‘Haci e camina di Jehova stret,’ net manera Isaías e profeta a bisa.”

Nan kier sa: “Pakico, anto, bo ta bautiza hende si bo mes no ta Cristo ni Elías ni e Profeta?”

Juan a contesta: “Mi ta bautiza den awa. Meimei di boso ta para uno cu boso no conoce, esun cu ta bini tras di mi.”

Juan tabata prepara e camina door di cultiva den hende un estado di curazón correcto pa nan acepta Mesías, cu lo bira Rey. Juan a bisa di dje: “Esun cu ta bini tras di mi ta mas fuerte cu mi, kende su sandalia mi no ta digno di los.” Realmente, Juan asta a bisa: “Esun cu ta bini tras di mi a bai dilanti mi, pasobra el a existi promé cu mi.”

Pues, e mensahe di Juan, “e reino di cielo a yega cerca,” a sirbi como un aviso público di cu e ministerio di Jesucristo, e Rey nombrá di Jehova, tabata cla pa cuminza. Juan 1:6-8, 15-28; Mateo 3:1-12; Lucas 3:1-18; Echo 19:4.

▪ Juan tabata ki clase di hende?

▪ Pakico Juan a bautiza hende?

▪ Pakico Juan por a bisa cu e Reino a yega cerca?