Huan Boutista A Prepará e Kaminda

Tabata lènte di aña 29 di promé siglo, un 17 aña despues ku Hesus, komo un hóben di 12 aña, tabata den e tèmpel hasiendo e maestronan pregunta. Hopi hende tabata papia di un famia di Hesus ku tabata yama Huan, kende tabata prediká den henter e área parti wèst di Riu Yordan.

Huan su aparensia i manera di papia tabata kapta atenshon di hende. E tabata bisti paña di lana di kamel i tabatin un faha di kueru na su sintura. E tabata kome dalakochi i stropi di abeha di mondi. E tabata prediká i bisa: “Arepentí, pasobra e Reino di shelu a yega serka.”—Mateo 3:2.

Su mensahe a konmové e hendenan ku a bini pa skuch’é. Hopi di nan a komprondé ku nan mester a arepentí, esta, kambia nan aktitut i stòp ku nan forma di biba di ántes. Hende di “Herúsalèm, di henter Hudea i di henter e área rònt di Riu Yordan” tabata bini pa skucha Huan. (Mateo 3:5) Hopi di nan a arepentí. I Huan tabata batisá nan, hinkando nan kompletamente bou di awa di Riu Yordan. Dikon Huan tabata batisá hende?

Huan tabata batisá hende komo símbolo di e echo ku nan a arepentí di henter nan kurason di e pikánan ku nan a kometé kontra e Lei di Dios. (Echonan 19:4) Pero no ta tur hende a arepentí. Ora algun lider religioso, esta, algun fariseo i saduseo, a bini serka dje, el a yama nan “rasa di kolebra venenoso.” El a bisa nan: “Mihó boso produsí fruta ku ta mustra ku boso a arepentí! I no tribi di bisa den boso mes: ‘Ta Abraham ta nos tata,’ pasobra mi ta bisa boso ku Dios por duna Abraham yu for di e piedranan akí. E hacha ta poné kaba na rais di e palu. Pues, lo kap tur palu ku no ta pari bon fruta i tira nan den kandela.”—Mateo 3:7-10.

Awor, komo ku Huan tabata haña hopi atenshon, tabata prediká un mensahe poderoso i batisá hopi hende, e hudiunan a manda algun saserdote i levita serka dje pa puntr’é ‘ken e ta.’

Huan a bisa nan: “Ami no ta Kristu.”

Nan a puntr’é: “Ken bo ta anto? Elías?”

El a kontestá: “Nò, mi no ta Elías.”

Nan a puntr’é: “Bo ta e Profeta?” Bon mirá, nan tabata ke sa si Huan tabata e gran Profeta ku Moises a bisa ku lo a bini.—Deuteronomio 18:15, 18.

Pero Huan a kontestá nan: “Nò!”

P’esei nan a bolbe puntr’é: “Ta ken bo ta anto? Bisa nos pa nos por hiba un kontesta pa esnan ku a manda nos. Kiko bo ta bisa tokante bo mes?” Huan a bisa nan: “Ami ta stèm di esun ku ta grita den desierto: ‘Drecha e kaminda dilanti di Yehova,’ manera profeta Isaías a bisa.”—Huan 1:19-23.

Nan a puntr’é: “Pakiko bo ta batisá hende anto si bo no ta Kristu ni Elías ni e Profeta?” Huan a kontestá nan: “Ami ta batisá den awa. Meimei di boso tin un hende ku boso no konosé; e ta bini despues di mi.”—Huan 1:25-27.

Sí, Huan tabata sa ku e tabatin ku prepará e kaminda, esta, prepará e hendenan pa nan por tabatin un kurason reseptivo pa aseptá e Mesías primintí, esun ku mester a bira Rei. Relashoná ku e Mesías, Huan a bisa: “Esun ku ta bini despues di mi ta mas fuerte ku mi, i mi no ta digno di kita su sandalia.” (Mateo 3:11) Huan a bisa tambe: “Esun ku ta bini mi tras a pasa bai mi dilanti, pasobra e tabata eksistí promé ku mi.”—Huan 1:15.

Pues, korektamente Huan tabata prediká: “Arepentí, pasobra e Reino di shelu a yega serka.” (Mateo 3:2) Di e manera ei, Huan tabata anunsiá públikamente ku Hesukristu, esun ku Yehova a nombra komo Rei, tabata a punto di kuminsá su sirbishi aki riba tera.