Capítulo 20

E segundo milagro den Caná

ORA Cristo a bolbe ne territorio unda el a nace despues di un campaña largo di predica den Hudea, esei no tabata pe sosega. Mas bien, el a cuminza un ministerio asta mas grandi den Galilea, e tera unda el a lanta. Pero su disípelnan, en bez di keda cuné, a bolbe na nan famía i na nan trabao di antes.

Cua mensahe Jesús a cuminza predica? Lo sigiente: “E reino di Dios a yega cerca. Boso arrepenti boso i tene fe den e bon nobo.” I cu cua reaccion? Galileo a recibi Jesús. Nan tur a mustré onor. Sin embargo, esei no tabata specialmente debí na su mensahe sino, mas bien, pa motibo cu hopi di nan tabata ne pascu hudío den Jerusalem hopi luna promé i a mira siñal notable cu el a haci.

Ta parce cu Jesús a cuminza su gran ministerio galileo den Caná. Bo ta corda cu mas promé, ora el a bolbe for di Hudea, Jesús a haci awa bira biña na fiesta di matrimonio den Caná. Ne segundo bishita e yiu di un funcionario di gobierno di rey Herodes Antipas tabata mashá malu. Tendiendo cu Jesús a yega Caná for di Hudea, e funcionario a bai tur e distancia for di su cas den Capernaum pa haya Jesús. Mashá desconsolá, el a pidi urgentemente: ‘Haci fabor di bini un bez promé cu mi yiu ta muri.’

Jesús a responde: ‘Bolbe pa bo cas. Bo yiu ta curá!’ E funcionario di Herodes a kere i a cuminza haci e biahe largo pa cas. Riba camina su criánan a encontrele, kende a bini lihé pa bisé cu tur cos ta bon—su yiu a recobrele! El a puntra: ‘Na ki tempo el a bira bon?’

Nan a contesta: ‘Ayera un or’ di merdia.’

E funcionario a corda cu esei tabata net e tempo cu Jesús a bisa, ‘Bo yiu ta curá!’ Despues di esei, e homber i tur hende di su cas a bira disípel di Cristo.

Asina Caná a bira e lugar favorecí unda Jesús a haci milagro dos bez, indicando su bolbimento for di Hudea. Naturalmente eseinan no tabata tur milagro cu el a haci te ne tempo ei, pero nan tabata significante pasobra nan a marca su bolbimento na Galilea.

Awor Jesús a dirigié pa su cas den Nazaret. Kico a speré ei? Juan 4:43-54; Marco 1:14, 15; Lucas 4:14, 15.

▪ Ora Jesús a bolbe pa Galilea, kico a sosode su disípelnan, i con hende a recibié?

▪ Ki milagro Jesús a haci, i con esei a afecta hende dje famía?

▪ Dje manera ei, con Jesús a favorece Caná?