Di Dos Milager na Kana

Despues di a keda un dos dia asina na Samaria, Hesus a kue rumbo pa e teritorio kaminda el a lanta. Aunke e tabatin un kampaña di predikashon ekstenso na Hudea, e no tabata bayendo Galilea pa sosegá. Al kontrario, e tabata bai kuminsá un gira di sirbishi muchu mas grandi. Probablemente, Hesus no tabata spera ku e hendenan einan lo a risibié bon pasobra manera e mes a bisa: “Un profeta no ta haña onor den su mes tera.” (Huan 4:44) Su disipelnan no a keda huntu kuné; nan a regresá nan kas serka nan famianan i a sigui ku nan trabou di ántes.

Ki mensahe Hesus a kuminsá prediká? Su mensahe tabata: “E Reino di Dios a yega serka. Arepentí i pone fe den e bon notisia.” (Marko 1:15) Kon e hendenan a reakshoná? En realidat, hopi hende di Galilea a risibí Hesus bon i a mustra onor na dje. Pero no ta su mensahe so a motivá nan pa hasi esaki. Algun di nan tabata na e selebrashon di Pasku Hudiu na Herúsalèm algun luna promé, i nan a mira e milagernan ku Hesus a hasi.—Huan 2:23.

Na unda na Galilea Hesus a kuminsá ku su gira di sirbishi? Aparentemente, el a kuminsá na Kana, kaminda el a yega di laga awa bira biña na un fiesta di kasamentu. Pues, awor tabata e di dos biaha ku e tabata na Kana. Anto el a haña sa di un mucha hòmber ku tabata hopi malu i serka di muri. E hóben akí tabata yu di un sirbidó di Heródes Antipas, e rei ku despues a laga kita kabes di Huan Boutista. E sirbidó akí a tende ku Hesus a sali for di Hudea i tabata na kaminda pa Kana, p’esei el a sali for di su kas na Kapernaum pa bai topa ku Hesus na Kana. E tabata masha tristu; el a supliká Hesus: “Señor, ban ku mi promé ku mi yu chikitu muri.”—Huan 4:49.

Hesus a bis’é: “Bai numa; bo yu a bira bon.” (Huan 4:50) Esei lo a sorprendé e sirbidó di Heródes. Pero el a kere Hesus i a kuminsá su biahe pa kas. Na kaminda, su esklabonan a bin kontr’é ku e bon notisia ku su yu hòmber ta bibu i bon di salú. Anto pa e por tabata sigur di loke a pasa, el a puntra nan: ‘Ki ora el a bira bon?’

Nan a kontest’é: “Ayera 1 or di mèrdia e keintura a kita.”—Huan 4:52.

E sirbidó di rei a realisá ku esei tabata nèt e ora ku Hesus a bis’é: “Bo yu a bira bon.” Despues di esei, tantu é, kende tabata un hòmber sufisientemente bon pará pa por tabatin esklabo, komo tur hende di su kas a bira disipel di Kristu.

Pues, Kana tabata un lugá kaminda Hesus a hasi milager dos biaha: Promé, el a laga awa bira biña, i despues el a kura un mucha hòmber for di un distansia di mas òf ménos 26 kilometer. Klaru ku eseinan no tabata e úniko milagernan ku Hesus a hasi. Pero e echo ku el a kura e mucha hòmber tabata di gran balor pasobra e milager ei a duna prueba ku el a regresá Galilea komo un profeta di Dios. Tabata bisto ku e tabata un profeta ku tabatin aprobashon di Dios. Pero kuantu ‘onor e profeta akí lo a haña na su mes tera’?

Esei lo a bira bisto ora e yega su kas na Názarèt. Kiko tabata sper’é einan?