Capítulo 32

Kico ta legal riba sabat?

TABATA ariba un otro dia di sabat cu Jesús a bishita un sinagoga cerca Lamá di Galilea. Tabatin ei un homber cu un man drechi secu. Scriba i fariseo a wak cu sumo atencion pa mira si Jesús lo curé. Finalmente nan a puntra: “Ta legal pa haci curacion riba dia di sabat?”

Lider religioso hudío a kere cu curacion tabata legal riba dia di sabat solamente si bida ta den peliger. Por ehempel, nan a siña cu ariba dia di sabat ta ilegal pa pone wesu den hips of verband pia trocí. P’sei scriba i fariseo tabata haci Jesús pregunta haciendo esfuerzo pa haya acusacion contra dje.

Sin embargo, Jesús a conoce nan razonamento. Ne mesun tempo, Jesús tabata sa cu nan a adopta un punto di bista extremo i no bíblico en cuanto loke ta bira violacion di requisito di dia di sabat cu ta prohibi trabao. P’sei Jesús a prepara un situacion pa haci un confrontacion dramático, bisando e homber cu e man secu: “Lantábo i bini aki meimei.”

Awor, dirigiendo palabra na scriba i fariseo, Jesús a puntra: “Cua ta e hende di boso cu tin un solo carné i, si e cai den poz riba dia di sabat, boso lo no cogé i saqué?” Siendo cu carné ta representa invertimento financiero, nan lo no lagué den poz te su mañan, tal bez pa bira enfermo i perde su balor. Además, e Scritura ta bisa: “Hende husto ta cuida alma di nan bestia doméstico.”

Usando un comparacion, Jesús a sigi: “Considerando tur cos, hende ta di cuanto mas balor cu un carné! Di manera cu ta legal pa haci un cos excelente riba dia di sabat.” Sin cu nan por a desmenti tal razonamento lógico i compasivo, e guíanan religioso a keda ketu.

Cu indignacion i també duele debí na nan obstinacion estúpido, Jesús a loer tur rond. Anto el a bisa e homber: “Saca bo man.” I el a saca su man i el a wordu curá.

En bez di keda contentu cu e restoracion dje man dje homber, fariseo a sali i un bez a conspira cu sigidor di partido di Herodes pa mata Jesús. Ta parce cu e partido político a inclui miembro di saduceo religioso. En general, e partido político i fariseo tabata abiertamente contra otro, pero nan a uni firmemente den nan oposicion na Jesús. Mateo 12:9-14; Marco 3:1-6; Lucas 6:6-11; Proverbio 12:10; Exodo 20:8-10.

▪ Ki situacion tabatin pe confrontacion dramático entre Jesús i lider religioso hudío?

▪ Kico guía religioso hudío a kere tocante curacion riba dia di sabat?

▪ Cua comparacion Jesús a usa pa desmenti nan punto di bista incorrecto?