Capítulo 56

Kico ta contamina hende?

OPOSICION na Jesús a bira mas fuerte. Hopi disípel di dje no solamente a bandoné sino hudío den Hudea tabata buské pa mata, manera nan a haci ora e tabata den Jerusalem durante e pascu hudío di aña 31 EC.

Awor pascu di aña 32 EC a yega. Probablemente di acuerdo cu e requisito di Dios di asisti, Jesús a bai ne pascu den Jerusalem. Sin embargo, el a bai cautelosamente pasobra su bida tabata den peliger. Despues, el a bolbe na Galilea.

Kizás Jesús tabata den Capernaum ora fariseo i scriba di Jerusalem a yega cerca dje. Nan tabata busca un motibo pa acusé di violacion religioso di ley. Nan a puntra: “Pakico bo disípelnan ta viola e tradicion di hende di tempo di antes? Por ehempel, nan no ta laba nan man ora nan ta bai come cuminda.” Esei no tabata un requisito di Dios, pero fariseo a considera cu tabata un ofensa serio pa no cumpli cu ceremonia tradicional, locual a inclui labando te na elleboog.

En bez di contestánan tocante nan acusacion, Jesús a siñala na nan violacion dje ley di Dios cu mal intencion. El a púntranan: “Pakico boso també ta viola e mandamento di Dios pa causa di boso tradicion? Por ehempel Dios a bisa, ‘Onra bo tata i bo mama’; i ‘Laga ken cu zundra tata of mama termina den morto.’ Pero boso ta bisa, ‘Ken cu bisa su tata of mama: “Tur loke mi tin via locual bo por saca probecho foi mi ta un ofrenda dedicá na Dios,” i e no tin cu onra su tata di ningun manera.’”

Realmente, fariseo a siña cu placa, propiedad, of cualkier cos dedicá como ofrenda na Dios a pertenece ne tempel i no mester ta usá pa otro propósito. Pero, en realidad, e persona cu a dedica e ofrenda a keda cuné. Dje manera ei un yiu, simplemente door di bisa cu su placa of propiedad tabata “corbán”—tabata un ofrenda dedicá na Dios of ne tempel—a evita su responsabilidad di yuda su mayornan di edad, cu kizás tabata den un situacion desesperá.

Jesús a indigná apropiadamente ne mal trocimento di fariseo dje ley di Dios, i a bisa: “Boso a haci e palabra di Dios inválido pa causa di boso tradicion. Hipócrita, Isaías a profetiza aptamente di boso, ora el a bisa, ‘E pueblo aki ta onrámi cu nan lip, pero nan curazón ta mashá alehá foi mi. Ta en bano cu nan ta sigi adorámi, pasobra nan ta siña mandamento di hende como doctrina.’”

Kizás e multitud a habri camina pa permiti fariseo haci Jesús pregunta. Awor, ora fariseo no tabatin contesta pe censura fuerte di nan di parti di Jesús, el a yama e multitud cerca dje. El a bisa: “Scuchámi i capta e sentido. No tin nada djafó cu ta drenta den hende cu por contaminánan; ma loke ta sali for di hende ta loke ta contaminá hende.”

Despues, ora nan a drenta un cas, su disípelnan a puntra: “Bo sa cu fariseo a trompica ora nan a tende loke bo a bisa?”

Jesús a contesta: “Tur mata cu mi Tata celestial no a planta lo ser rancá cu raíz. Láganan. Guía ciegu ta loke nan tá. Pues, si ciegu ta guía ciegu, tur dos lo cai den poz.”

A parce un sorpresa pa Jesús ora, di parti dje disípelnan, Pedro a pidi un aclaramento di loke ta contamina hende. Jesús a contesta: “Boso també ta sin comprendimento ainda? Boso no sa cu tur loke ta drenta den e boca ta pasa djei pa tripa i ta sacá na riool? Sin embargo, loke ta sali for di boca ta bini di curazón, i esei ta loke ta contaminá hende. Por ehempel, for di curazón ta sali razonamento malu, asesinato, adulterio, fornicacion, ladronicia, testimonio falso, blasfemia. Esei ta loke ta contamina hende; pero comimento di cuminda sin laba man no ta contamina hende.”

Jesús no tabata contra limpieza normal asina. E no tabata debati cu hende no tin cu laba man promé cu preparacion di cuminda ni di comé. Mas bien, Jesús tabata condena hipocresía di lider religioso cu usando engaño a purba di evita ley husto di Dios, insistiendo riba tradicion no bíblico. Sí, malecho ta loke ta contamina hende, i Jesús a mustra cu esei ta origina den curazón di hende. Juan 7:1; Deuteronomio 16:16; Mateo 15:1-20; Marco 7:1-23; Exodo 20:12; 21:17; Isaías 29:13.

▪ Ki oposicion a enfrenta Jesús awor?

▪ Cua acusacion fariseo a haci, pero segun Jesús, con fariseo a viola e ley di Dios obstinadamente?

▪ Segun Jesús, kico ta contamina hende?