Parti 5

E Maraviyoso Don di Boluntad Liber

1, 2. Ki don maraviyoso ta parti di nos composicion?

PA COMPRONDE pakico Dios a permití sufrimentu i loke lo e bai haci tocante dje, nos mester comprondé con el a traha nos. El a haci mas cu crea nos cu simplemente un curpa i un celebro. El a crea nos tambe cu cualidadnan mental i emocional special.

² Un parti clave di nos composicion mental i emocional ta boluntad liber. Sí, Dios a implantá den nos e facultad di libertad di scoge. Esei en berdad tabata un don maraviyoso for di dje.

Con Nos Ta Trahá

3-5. Pakico nos ta apreciá boluntad liber?

³ Laga nos considerá con boluntad liber ta enbolbí den e echo cu Dios a permití sufrimentu. Pa cuminsá, pensa riba esaki: Bo ta apreciá di tin e libertad di scoge loke lo bo haci i bisa, loke lo bo come i bisti, ki sorto di trabou lo bo haci i na unda i con lo bo biba? Of lo bo tabata kier un persona dicta tur bo palabra i accion tur momento di bo bida?

⁴ Ningun hende normal kier pa su bida wordu kitá for di su control asina completamente. Pakico nó? Debí na e manera cu Dios a traha nos. E Bijbel ta conta nos cu Dios a crea hende den su ‘imágen i semehansa,’ i un dje facultadnan cu Dios mes tin ta libertad di scoge. (Génesis 1:26; Deuteronomio 7:6) Ora el a crea hende, el a duna nan e mesun facultad maraviyoso ei​—e don di boluntad liber. Esei ta un motibu pakico nos ta haña cu ta frustrante pa ser esclabisá dor di gobernantenan opresivo.

⁵ Pues e deseo pa libertad no ta casualidad, pasobra Dios ta un Dios di libertad. E Bijbel ta bisa: “Caminda e spiritu di Jehova ta, ei tin libertad.” (2 Corintio 3:17) Pues, Dios a duna nos boluntad liber como parti di nos composicion mes. Como cu e tabata sa e manera cu nos mente i emocionnan lo a traha, e tabata sa cu nos lo tabata mas felis cu boluntad liber.

6. Con Dios a crea nos celebro pa traha na armonia cu boluntad liber?

⁶ Pa compañá e don di boluntad liber, Dios a duna nos e abilidad di pensa, pisa asuntunan, tuma decisionnan i sa loke ta bon for di malu. (Hebreo 5:14) Pues, boluntad liber lo mester tabata basá riba scogementu inteligente. Nos no tabata trahá manera robotnan sin sintí, sin tin nan mes boluntad. Tampoco nos no tabata creá pa actua dor di instinto mescos cu bestia. En bes di esei, nos celebro maraviyoso tabata diseñá pa traha na armonia cu nos libertad di scoge.

E Mihor Comienso

7, 8. Cua comienso excelente Dios a duna nos promé mayornan?

⁷ Pa mustra con interesá Dios tabata, el a duna nos promé mayornan, Adam i Eva, huntu cu e don di boluntad liber tur loke cualkier persona razonablemente lo por deseá. Nan a ser poné den un paradijs semehante na un parke grandi. Nan tabatin abundancia material. Nan tabatin mente i curpa perfecto, di manera cu nan lo no tabatin cu bira bieu of bira malu of muri​—nan por a biba pa semper. Nan lo por tabatin yunan perfecto cu tambe lo por tabatin un futuro felis i eterno. I e poblacion expandiendo lo por tabatin e trabou satisfactorio di eventualmente transformá henter e tera den un paradijs.​—Génesis 1:26-30; 2:15.

⁸ Encuanto loke a ser proveé, e Bijbel ta relatá: “Dios a mira tur loke el a traha i, mira! e tabata masha bon.” (Génesis 1:31) E Bijbel tambe ta bisa di Dios: “Perfecto ta su actividad.” (Deuteronomio 32:4) Sí, e Creador a duna e famia humano un comienso perfecto. Esei no por tabata mihor. Ki un Dios interesá el a resultá di ta!

Libertad Dentro di Límitenan

9, 10. Pakico boluntad liber mester ser regulá apropiadamente?

⁹ Sin embargo, Dios su intencion tabata pa boluntad liber ser sin límite? Imaginá bo un stad druk sin ningun ley di tráfico, caminda tur hende por a core auto den cualkier direccion i na cualkier velocidad. Lo bo kier a core auto bou dje condicionnan ei? Nó, esei lo ta un anarkia di tráfico i siguramente lo a resultá den hopi accidente.

¹⁰ Asina tambe cu Dios su don di boluntad liber. Libertad sin límite lo a nificá anarkia den sociedad. Mester tin leynan pa guia actividadnan humano. E Palabra di Dios ta bisa: “Comportá boso manera hende liber i nunca usa boso libertad como un excus pa maldad.” (1 Pedro 2:​16, JB) Dios kier pa boluntad liber ser regulá pa e bienestar general. El a proponé pa nos tin, no libertad total, sino libertad relativo, sometí na regla di ley.

Ken su Leynan?

11. Ken su leynan nos tabata diseñá pa obedecé?

¹¹ Ken su leynan nos tabata diseñá pa obedecé? Un otro parti dje texto na 1 Pedro 2:16 (JB) ta declará: “Boso ta esclabo di ningun otro persona sino di Dios.” Esaki no kier men esclabitud opresivo, pero, mas bien, esei kier men cu nos tabata diseñá pa ser mas felis ora nos ta sometí na Dios su leynan. (Mateo 22:​35-40) Su leynan, mas cu cualkier ley diseñá dor di hende, ta percurá e mihor guia. “Ami, Jehova, ta bo Dios, Esun cu ta siñá bo pa beneficiá bo mes, Esun cu ta poné bo trapa den e caminda den cua lo bo mester cana.”​—Isaías 48:17.

12. Ki libertad di scoge nos tin dentro di Dios su leynan?

¹² N’e mesun tempu, Dios su leynan ta permití gran libertad di scoge dentro di nan fronteranan. Esaki ta resultá den variedad i ta haci e famia humano facinante. Pensa riba e diferente tipo di cuminda, bistí, música, arte i casnan rond mundu. Nos siguramente ta preferá di scoge pa nos mes den tal asuntunan en bes di laga un otro persona dicidí pa nos.

13. Cua leynan físico nos mester obedecé pa nos mes bon?

¹³ Pues nos a ser creá pa ser mas felis ora nos ta sometí na Dios su leynan pa conducta humano. Esei ta igual cu ser sometí na Dios su leynan físico. Por ehempel, si nos ignorá e ley di gravedad i bula for di un lugar haltu, nos lo ser heridá of lo muri. Si nos ignorá leynan interno di nos curpa i stop di come cuminda, bebe awa of hala rosea, nos lo muri.

14. Con nos sa cu hende no tabata creá pa ta independiente di Dios?

¹⁴ Mesun sigur cu nos a ser creá cu e necesidad di someté nos na Dios su leynan físico, nos a ser creá cu e necesidad di someté nos na Dios su leynan moral i social. (Mateo 4:4) Hende no tabata creá pa ta independiente di nan Trahador i ser exitoso. E profeta Jeremías ta bisa: “No ta pertenecé na hende cu ta canando pa sikiera dirigí su paso. Coregí mi, O Jehova.” (Jeremías 10:​23, 24) Pues den tur manera hende tabata creá pa biba bou di Dios su gobernacion, no di nan mes.

15. Dios su leynan lo tabata un carga pa Adam i Eva?

¹⁵ Obedencia na Dios su leynan lo no tabata un carga pisá pa nos promé mayornan. Mas bien, esei lo a resultá pa nan bienestar i di henter e famia humano. Si e promé pareha lo a keda dentro dje límite di Dios su leynan, tur cos lo tabata bon. En realidad, nos lo tabata bibando awor aki den un maraviyoso paradijs di placer como un famia humano amoroso i uní! Lo no tabatin maldad, sufrimentu i morto.

[Plachi na página 11]

E Creador a duna hende un comienso perfecto

[Plachi na página 12]

Lo bo kier a core auto den tráfico pisá si no tabatin ley di tráfico?