Un Speransa Sigur

“Desde e momento di nacementu semper tin e posibilidad cu un ser humano por muri un ora pa otro; i ta inevitabel cu e posibilidad aki ta bai bira un echo.”—ARNOLD TOYNBEE, HISTORIADO BRITANICO.

1. Ki realidad humanidad mester a aceptá, i esaki ta pone ki preguntanan lanta?

KEN por argumentá contra e berdad obvio i histórico citá ariba? Humanidad semper mester a aceptá e teribel realidad di morto. I ki impotente nos ta sinti ora un persona cu nos stima muri! E pérdida n’e momento ei ta parce totalmente ireversibel. Ta posibel pa bolbe topa cu nos sernan kerí morto? Ki speransa Bijbel ta ofrecé n’e mortonan? Considerá e siguiente relato.

‘Nos Amigu A Muri’

2-5. (a) Ora Jesus su amigu Lázaro a muri, con el a demostrá cu e tabata dispuesto i capas pa resucit’é? (b) Ademas di trece Lázaro bek na bida, kico e milager di resureccion a logra?

² Tabata aña 32 E.C. Den e pueblo chikitu di Betania, 3 kilometer pafó di Jerusalem, Lázaro tabata biba cu su ruman muhernan Marta cu Maria. Nan tabata amigu íntimo di Jesus. Un dia, Lázaro a bira gravemente malu. Su ruman muhernan preocupá a core manda e noticia aki pa Jesus, kende tabata n’e otro banda di Riu Jordan. Jesus tabatin cariño pa Lázaro i pa su ruman muhernan, p’esei cu tempu el a sali rumbo pa Betania. Na caminda, Jesus a bisa su disipelnan: “Lázaro nos amigu a bai sosegá, pero mi ta bai ei pa lant’é for di soño.” Como cu e disipelnan no a capta mesora e nificacion dje declaracion ei, Jesus a bisa claramente: “Lázaro a muri.”—Juan 11:1-15.

³ Ora Marta a tende cu Jesus tabata na caminda pa Betania, el a core sali pa bai top’é. Conmoví pa Marta su tristesa, Jesus a sigur’é: “Bo ruman lo lanta.” Marta a contestá: “Mi sa cu lo e lanta den e resureccion riba e último dia.” E ora ei Jesus a bis’é: “Ami ta e resureccion i e bida. Esun cu ehercé fe den mi, asta si e muri, lo bolbe na bida.”—Juan 11:20-25.

⁴ Jesus a bai n’e graf i a manda pa kita e piedra cu tabata tapa e entrada. Despues di haci oracion na bos haltu, el a manda: “Lázaro, sali!” I miéntras tur wowo tabata fihá riba e graf, Lázaro di berdad a sali pafó. Jesus a resucitá Lázaro, debolbiendo bida na un homber cu tabatin cuater dia morto!—Juan 11:38-44.

⁵ Marta tabatin fe caba den e promesa di un resureccion. (Juan 5:28, 29; 11:23, 24) E milager di Lázaro su restoracion na bida a sirbi pa reforsá Marta su fe i pa inculcá fe den otronan. (Juan 11:45) Pero kico exactamente e palabra “resureccion” ta nificá?

“Lo E Lanta”

6. Kico e palabra “resureccion” ta nificá?

⁶ E palabra “resureccion” ta traducí for dje palabra griego a·ná·sta·sis, cu literalmente kier men “e acto di bolbe lanta para.” Traductornan hebreo cu a traducí for di griego a traducí e palabra a·ná·sta·sis cu e palabranan hebreo techi·yáth ham·me·thím, cu ta nificá “rebibamentu dje mortonan.”a Pues, resureccion ta enbolbé lanta e persona for dje condicion sin bida di morto, reactivando e patronchi di bida dje individuo.

7. Pakico e resureccion di personanan individual lo no ta un problema pa Jehova Dios i Jesucristo?

⁷ Siendo cu Jehova Dios ta infinitamente sabí i tin un memoria infinitamente perfecto, ta fácil p’e resucitá un persona. No ta un problema p’e corda e patronchi di bida di esnan morto: e característicanan di nan personalidad, nan historianan personal i tur e detayenan di nan identidad. (Job 12:13; compará cu Isaías 40:26.) Tambe Jehova ta e Originador di bida. Pues, fácilmente e por trece bek na bida e mésun persona, dunand’e e mésun personalidad den un curpa nobo. Ademas, manera e experencia di Lázaro ta indicá, Jesucristo ta tantu dispuesto como capas pa resucitá e mortonan.—Compará cu Lucas 7:11-17; 8:40-56.

8, 9. (a) Di con resureccion no ta compatibel cu e idea di inmortalidad di alma? (b) Kico ta e solucion pa morto?

⁸ Sin embargo, e siñansa bíblico di resureccion no ta compatibel cu e doctrina di inmortalidad di alma. Si un alma inmortal a keda na bida despues di morto, ningun hende lo tin cu ser resucitá of trecé bek na bida. Realmente, Marta no a bisa nada di cu e ta pensa cu tin un alma inmortal cu ta sigui biba un otro caminda despues di morto. E no a kere cu Lázaro a bai caba na un of otro region di spiritu pa sigui existí. Al contrario, el a demostrá su fe den e propósito di Dios pa eliminá e efectonan di morto. E di: “Mi sa cu lo e lanta den e resureccion riba e último dia.” (Juan 11:23, 24) Di igual manera, Lázaro mes no a conta ningun experencia di un bida despues di morto. No tabatin nada di conta.

⁹ Claramente, segun Bijbel, e alma ta muri i e solucion pa morto ta resureccion. Pero biyones di hende a muri for di tempu cu e promé homber, Adam, a cana riba tera. P’esei ken lo ser resucitá, i na unda?

‘Tur Esnan den Grafnan Conmemorativo’

10. Ki promesa Jesus a haci relacioná cu esnan den grafnan conmemorativo?

¹⁰ Jesucristo a bisa: “E ora ta bini den cua tur esnan cu ta den grafnan conmemorativo lo tende [Jesus] su bos i lo sali.” (Juan 5:28, 29) Sí, Jesucristo a primintí cu tur esnan den Jehova su memoria lo ser resucitá. Biyones di hende a biba i a muri. Ken entre nan ta den Dios su memoria, sperando e resureccion?

11. Ken lo ser resucitá?

¹¹ Esnan cu a sigui un bida di husticia como sirbidó di Jehova lo ser resucitá. Pero miyones di otro hende a muri sin mustra si nan lo a cumpli cu Dios su normanan hustu. Kisas nan no tabata sa dje rekisitonan di Jehova of nan a falta suficiente tempu pa haci e cambionan necesario. E hendenan aki tambe ta den Dios su memoria i pues lo ser resucitá, pasobra Bijbel ta primintí: “Lo bai tin un resureccion di tantu e hustunan como e inhustunan.”—Echonan 24:15.

12. (a) Ki vision apostel Juan a ricibí tocante e resureccion? (b) Kico ta ser “tirá den e lago di candela,” i kico e expresion ei ta nificá?

¹² Apostel Juan a ricibí un vision emocionante di hende resucitá pará dilanti e trono di Dios. Describiendo e vision, el a skirbi: “Laman a entregá esnan morto den dje, i morto i Hádes a entregá esnan morto den nan, i nan a ser husgá individualmente segun nan obranan. I morto i Hádes a ser tirá den e lago di candela. Esaki ta nificá e segundo morto, e lago di candela.” (Revelacion 20:12-14) Pensa kico esei kier men! Tur e mortonan cu ta den Dios su memoria lo ser librá for di Hádes of Sheol, e graf comun di humanidad. (Salmo 16:10; Echonan 2:31) Anto “morto i Hádes” lo ser tirá den loke ta ser yamá “e lago di candela,” cu ta simbolisá destruccion completo. E graf comun di humanidad lo stop di existí.

Resucitá na Unda?

13. Pakico Dios a haci areglo pa algun hende resucitá biba den shelu, i ki clase di curpa Jehova lo duna nan?

¹³ Un cantidad chikitu di homber i muher lo ser resucitá pa biba den shelu. Esakinan lo goberná huntu cu Cristo como rey i sacerdote i lo yuda eliminá tur e efectonan di morto cu humanidad a heredá for dje promé homber, Adam. (Romanonan 5:12; Revelacion 5:9, 10) Segun Bijbel, nan cantidad ta solamente 144.000 i nan ta scogí for di entre e siguidónan di Cristo, cuminsando cu e fiel apostelnan. (Lucas 22:28-30; Juan 14:2, 3; Revelacion 7:4; 14:1, 3) Jehova lo duna cada un di esnan resucitá aki un curpa spiritual pa nan por biba den shelu.—1 Corintionan 15:35, 38, 42-45; 1 Pedro 3:18.

14, 15. (a) E gran mayoria di esnan cu a muri lo ser resucitá pa ki clase di bida? (b) Ki bendicionnan humanidad obediente lo experenciá?

¹⁴ Sin embargo, e gran mayoria di esnan cu a muri lo ser resucitá pa biba riba tera. (Salmo 37:29; Mateo 6:10) Ki clase di tera? E tera awe ta yen di conflicto, dramamentu di sanger, contaminacion i violencia. Si e mortonan mester a bini bek na bida riba un tera asina aki, sigur cualkier felicidad cu nan tin lo ta di corto duracion. Pero e Creador a primintí cu pronto lo e trece un fin n’e sociedad di mundu actual cu ta bou di control di Satanas. (Proverbionan 2:21, 22; Daniel 2:44) E ora ei un sociedad humano nobo i hustu—“un tera nobo”—lo ta un realidad. (2 Pedro 3:13) N’e tempu ei “ningun residente lo bisa: ‘Mi ta malu.’” (Isaías 33:24) Asta e ansha di morto lo ser eliminá, pasobra Dios “lo . . . seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.”—Revelacion 21:4.

¹⁵ Den Dios su mundu nobo primintí, e mansunan “berdaderamente . . . lo haña nan deleite exkisito den e abundancia di pas.” (Salmo 37:11) E gobiernu celestial di Cristo Jesus i su 144.000 socio lo trece humanidad obediente progresivamente bek n’e perfeccion cu nos promé mayornan, Adam cu Eva, a perde. Entre e habitantenan dje tera lo tin esnan resucitá.—Lucas 23:42, 43.

16-18. Ki goso e resureccion lo trece pa famianan?

¹⁶ Bijbel ta duna un idea dje goso cu e resureccion lo trece pa famianan. Imaginá bo e felicidad cu e biuda di Nain a sinti ora Jesus a para e procesion di entiero i a resucitá su único yu homber! (Lucas 7:11-17) Despues, cerca dje Laman di Galilea, ora Jesus a trece un hobencita di 12 aña bek na bida, e mayornan tabata “for di nan mes di gran excitacion.”—Marco 5:21-24, 35-42; mira tambe 1 Reynan 17:17-24; 2 Reynan 4:32-37.

¹⁷ Pa miyones di hende cu awor ta drumí den morto, un resureccion lo nificá bida den un mundu nobo di pas. Djis pensa riba e prospecto emocionante cu esaki ta habri pa Tommy i pa e comerciante, mencioná den e seccion di introduccion dje foyeto aki! Ora Tommy lanta bek na bida den Paradijs riba tera, lo e ta e mésun Tommy cu su mama a conocé, pero e ora ei sin malesa. Su mama lo por mishi cuné, ten’é den su brasa i stim’é. Di igual manera, en bes di ta atrapá den un ciclo casi infinito di renacementu, e comerciante di India tin e prospecto maraviyoso di habri su wowo den Dios su mundu nobo i mira su yu hombernan.

¹⁸ Conocimentu dje berdad tocante alma, tocante loke ta sosodé cu nos ora nos muri, tocante e speransa di resureccion tambe por tin un efecto profundo riba hende cu ta na bida awor. Laga nos mira con.

[Notanan]

[Plachi na página 26]

Resureccion lo trece goso duradero