E Bon Nobo Cu Nan Kier pa Bo Tende

ORA Jesus tabata riba tera, su disipelnan a bini cerca dje i a puntr’é: “Kico lo ta e señal di bo presencia i dje conclusion dje sistema di cosnan?” El a contestá cu lo bai tin guera cu lo enbolbé hopi nacion, hamber, pest, temblor, aumento di maldad, maestronan religioso falsu cu ta gaña hopi hende, odio i persecucion contra su siguidónan, i tambe cu amor pa husticia di hopi hende lo fria. Ora e cosnan aki cuminsá sosodé, esaki lo a indicá cu Cristo ta presente di un forma invisibel i cu e Reino celestial ta cerca. Esaki lo ta noticia: bon noticia! P’esei Jesus a agregá e palabranan aki como parti di e señal: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—Mateo 24:3-14.

Riba su mes, cosnan cu ta sosodé rond mundu recientemente ta malu, pero loke nan ta nificá ta bon, esta, e presencia di Cristo. E condicionnan mencioná aki riba a cuminsá bira bisto na aña 1914, e aña ampliamente anunciá! El a marca e fin di Tempu Gentil i e comienso di e periodo di transicion di gobernacion humano pa e Reinado di Mil Aña (Milenario) di Cristo.

Na Salmo 110, versículo 1 i 2, i na Revelacion 12:7-12, tin indicacion cu lo tabatin un periodo di transicion. E textonan aki ta mustra cu Cristo lo a sinta na man drechi di Dios den shelu te ora e bira Rey. Anto como consecuencia dje guera den shelu Satanas lo a ser tirá riba tera, treciendo calamidad pa tera, i Cristo lo a reina meimei di su enemigunan. E destruccion completo di maldad lo bini pa medio di e “tribulacion grandi,” culminando den e guera na Har–Magedon, siguí pa Cristo su Reinado di Mil Aña di pas.—Mateo 24:21, 33, 34; Revelacion 16:14-16.

“Pero sabi esaki,” Bijbel ta bisa, “cu den e último dianan lo presentá tempu crítico, duru pa trata cuné. Pasobra hende lo ta stimadó di nan mes, stimadó di placa, presumido, halsá, blasfemadó, desobediente na mayornan, malagradecidu, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios, teniendo un forma di debocion piadoso pero resultando falsu na su poder; i apartá bo di esakinan.”—2 Timoteo 3:1-5.

Algun hende por argumentá cu e cosnan aki a yega di sosodé caba den historia humano, pero echo ta cu nan nunca a sosodé tur huntu. Manera historiadó i comentaristanan ta bisa, nunca tabatin un tempu riba tera manera esun experenciá desde 1914 padilanti. (Mira página 7.) E calamidadnan tabata na escala mas grandi cu nunca promé. Ademas, en cuanto otro rasgonan di e señal di Cristo dje último dianan, e factornan aki mester ser considerá: E proclamacion mundial di e presencia di Cristo i dje Reino ta di un magnitud sin precedente den historia. Nunca no a yega di tin un persecucion asina grandi pa motibu di predicacion, manera loke Testigonan di Jehova mester a enfrentá. Cientos di nan tabata ehecutá den e camponan di concentracion nazi. Te n’e dia djawe Testigonan di Jehova ta bou di prohibicion den algun lugá, i den otro lugánan nan ta ser arestá, encarcelá, torturá i matá. Tur esaki ta parti di e señal cu Jesus a duna.

Manera Revelacion 11:18 a predicí, ‘e nacionnan a bira rabiá’ contra e Testigonan fiel di Jehova, i esaki ta indicá cu e “propio rabia” di Jehova lo ser expresá contra e nacionnan ei. E mésun texto aki ta bisa cu Dios lo “causa ruina di esnan cu ta ruinando tera.” Nunca promé tabatin un tempu den historia humano cu tera su capacidad pa sostené bida a core peliger. Sin embargo, awor cos ta diferente! Hopi científico a advertí cu si hende sigui contaminá tera, lo e bira inhabitabel. Pero Jehova “a form’é asta pa ser habitá,” i lo e deshací di esnan cu ta contamin’é promé cu nan caba di ruiná tera.—Isaías 45:18.

BENDICIONNAN TERENAL BOU DJE REINO

Pa hopi hende cu ta kere den Bijbel i cu ta pensa cu tur esnan salbá ta den shelu, e idea di cu hende lo biba riba tera como súbdito di e Reino di Dios por parce straño. Bijbel ta mustra cu solamente un cantidad limitá di persona ta bai shelu i cu esnan cu lo biba pa semper riba tera lo ta un multitud grandi, un cantidad sin límite di hende. (Salmo 37:11, 29; Revelacion 7:9; 14:1-5) Un profecia den e buki bíblico di Daniel ta mustra cu e Reino di Dios bou di Cristo lo yena tera i reina riba dje.

Den e buki di Daniel aki, e Reino di Cristo ta ser representá como un piedra cortá for di Jehova su soberania manera un ceru. E ta dal i destruí un imágen cu ta representá nacionnan poderoso di tera, i “e piedra cu a dal e imágen . . . a bira un ceru grandi i a yena henter e tera.” E profecia ta sigui: “Den e dianan dje reynan ei e Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki, i e mes lo permanecé te na tempu indefiní.”—Daniel 2:34, 35, 44.

Ta tocante e Reino aki i e speransa di bida eterno riba un tera hací limpi i bunita, Testigonan di Jehova kier papia cu bo. E Scritura ta apoyá e speransa aki. Miyones cu ta biba awor, i miyones i miyones mas cu awor ta den nan graf lo tin e oportunidad di biba riba tera pa semper. E ora ei, bou di Cristo Jesus su Reinado di Mil Aña, e propósito original cu Jehova tabatin ora el a crea tera i pone e promé parehá humano riba dje lo ser realisá. E Paradijs terenal aki nunca lo bira laf. Mescos cu Adam tabata asigná pa traha den e hofi di Eden, asina humanidad lo tin proyectonan interesante di cuida e tera huntu cu su flora i fauna. Nan “lo disfrutá di e obra di nan mannan pa hopi tempu.”—Isaías 65:22, Beibel Santu; Génesis 2:15.

Nos lo por referí na hopi texto bíblico pa describí e condicion cu lo existí ora e oracion cu Jesus a siña nos ser contestá: “Laga bo reino bini. Laga bo boluntad sosodé, mescos cu den shelu, tambe riba tera.” (Mateo 6:10) Sin embargo, laga esaki ta suficiente pa awor: “Mi a tende un bos fuerte for dje trono bisa: ‘Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.’ I Esun sintá riba e trono a bisa: ‘Mira! Mi ta haci tur cos nobo.’ Tambe, e ta bisa: ‘Skirbi, pasobra e palabranan aki ta fiel i berdadero.’”—Revelacion 21:3-5.

[Komentario na página 15]

“Tempu crítico, duru pa trata cuné,”

PERO “e ora ei e fin lo yega”

[Plachi na página 18]

Hulanda

[Plachi na página 18]

Nigeria