Kon pa Prepará Asignashon pa e Skol

KADA asignashon den e skol ta duna bo un oportunidat pa progresá. P’esei si bo hasi bo bèst, pokopoko pero sigur tantu abo mes komo otro hende lo mira ku bo a bai dilanti. (1 Tim. 4:15) E skol lo yuda bo bira hopi mas kapas.

Bo ta bira nervioso ora bo kòrda ku bo tin ku papia dilanti di e kongregashon? Esei ta normal, asta ora bo tin algun tempu kaba inskribí den e skol. Sin embargo, tin sierto kosnan ku por yuda bo baha bo ansiedat. Kustumbrá lesa na bos haltu na kas. Komentá ku frekuensia na reunionnan di kongregashon, i si bo ta un publikadó, sali den sirbishi di vèlt ku regularidat. Asina bo ta haña eksperensia den papia den públiko. Ademas, prepará bo partinan hopi tempu di antemano, i praktiká nan na bos haltu. Kòrda ku lo bo ta papiando dilanti di un ouditorio amigabel. I promé ku bo presentá kualkier parti, hasi orashon na Yehova. Gustosamente e ta duna spiritu santu na su sirbidónan ku pidié.—Luk. 11:13; Fil. 4:6, 7.

Sea rasonabel den bo espektativanan. Ta tuma tempu pa bo haña eksperensia komo oradó i bira un maestro efikas. (Mik. 6:8) Si bo ta resien den e skol, no ferwagt di duna un presentashon perfekto mesora. Mas bien, traha un pa un riba e puntonan di konseho i studia e sekshon den e buki aki ku ta trat’é. Si ta posibel, hasi e tareanan ku ta ser sugerí, asina bo ta haña chèns di praktiká e punto di konseho promé ku bo presentá bo parti. Sin duda lo bo hasi progreso.

Kon pa Prepará pa Lesamentu

Prepará pa lesa den públiko ta enserá hopi mas ku djis train pronunsiá e palabranan bon. Hasi esfuerso pa bo mes komprondé ta over di kiko e informashon ta bai. Asina ku bo haña bo asignashon, les’é ku e meta ei na mente. Purba komprondé e sentido di e frasenan i e idea ku kada paragraf ta trese dilanti, di tal manera ku bo por transmití e pensamentunan ku eksaktitut i ku e sintimentu adekuá. Bo por konsultá ku personanan ku konosé e idioma hopi bon pa bo haña sa kua ta e pronunsiashon korekto di palabranan deskonosí. Familiarisá bo bon ku e informashon. Mayornan kisas lo tin ku yuda nan yunan chikí ku esaki.

Bo a ser asigná pa lesa un porshon di Beibel òf e paragrafnan di un artíkulo di E Toren di Vigilansia? Podisé bo por pidi un persona ku ta un bon lesadó p’e lesa e informashon na bos haltu pa bo, i lo bo por tuma nota di kosnan manera pronunsiashon, konstrukshon di e frasenan, énfasis i variashon di tono. Anto purba apliká e kualidatnan aki den bo propio lesamentu.

Promé ku bo kuminsá traha riba bo parti, hasi sigur di studia e lès ku ta trata e kualidat di papia ku bo tin ku traha ariba. Si ta posibel, repas’é despues ku bo a praktiká e lesamentu vários bes na bos haltu. Hasi esfuerso pa apliká e sugerensianan duná mas tantu posibel.

E entrenamentu aki lo yuda bo bon den sirbishi di vèlt kaminda bo ta haña hopi oportunidat di lesa pa otro hende. Siendo ku e Palabra di Dios tin poder pa kambia bida di hende, ta importante pa bo les’é bon. (Heb. 4:12) No ferwagt ku lo bo dominá tur aspekto di bon lesamentu despues di un òf dos asignashon. Apòstel Pablo a skirbi un ansiano kristian ku hopi aña di eksperensia: “Okupá bo mes ku lesamentu di Skritura.”—1 Tim. 4:13.

Traha un Parti ku un Tema i Marko di Sirkunstansia

Kiko bo tin ku hasi ora bo haña un asignashon den e skol ku bo mester presentá den forma di un demostrashon?

Bo mester tene kuenta ku tres kos prinsipal: (1) bo tema asigná, (2) bo marko di sirkunstansia i e persona ku ken lo bo papia, i (3) e punto di konseho ku bo mester traha ariba.

Bo tin ku buska informashon riba bo tema asigná. Pero promé ku bo kuminsá ku esei, pensa bon riba bo marko di sirkunstansia i tambe riba e persona ku bo ta bai papia kuné, ya ku e faktornan aki lo determiná e informashon ku lo bo trata i e manera ku lo bo present’é. Ki marko di sirkunstansia lo bo usa? Lo bo demostrá kon pa presentá e bon nobo na un persona ku bo konosé? Òf lo bo mustra kiko lo por sosodé ora bo topa un persona pa promé bes? E persona ta mas grandi ku bo òf mas yòn? Ki aktitut lo e por tin relashoná ku e tema ku bo ta bai trata i kuantu lo e sa kaba di esaki? Kiko bo kier logra ku bo kòmbersashon? E kontestanan riba e preguntanan ei lo duna bo algun punto importante riba kua bo por traha.

Unda lo bo haña informashon riba e tema asigná? Página 33 pa 38 di e buki aki ta trata “Kon pa Hasi Investigashon.” Les’é, anto kaba usa e fuentenan di informashon ku bo tin na bo alkanse. Den mayoria kaso lo bo haña umbes mas informashon di loke bo por usa. Lesa sufisiente pa bo por haña un idea general di e posibilidatnan ku tin. Segun ku bo ta hasi esei, kòrda riba e marko di sirkunstansia di bo presentashon i tambe e persona ku lo bo ta papiando kuné. Marka e puntonan ku ta apropiá pa usa.

Promé ku bo organisá bo presentashon i skohe e detayenan definitivo, tuma tempu pa lesa e lès ku ta trata e punto di konseho ku bo mester traha ariba. Un di e motibunan prinsipal pakiko bo ta presentá un parti ta pa bo apliká e konseho ei.

Dor di kubri e informashon den e tempu asigná, lo bo tin e satisfakshon di por duna bo konklushon tambe, pasobra si no ta asina, lo bo tende un señal pa para ora bo tempu kaba. Den sirbishi di vèlt sí tempu no ta semper un faktor determinante. P’esei ora bo ta prepará, tene kuenta ku e kantidat di tempu ku bo tin disponibel, pero mas ku tur kos konsentrá riba duna siñansa den un forma efikas.

Algun Palabra Relashoná ku Marko di Sirkunstansia. Analisá e sugerensianan na página 82, i skohe unu ku lo ta práktiko pa sirbishi i ku lo permití bo presentá e informashon na un manera realista. Si bo tin basta tempu kaba den e skol, konsiderá bo asignashonnan komo oportunidat pa kultivá kualidatnan ku ta hasi bo mas kapas pa sirbishi di vèlt.

Si ta e superintendente di e Skol di Ministerio Teokrátiko ta esun ku ta skohe e marko di sirkunstansia, aseptá e reto. Kasi tur marko di sirkunstansia ta trata un faseta di e predikashon. Si nunka bo a duna testimonio bou di e sirkunstansianan deskribí, buska algun idea dor di kòmbersá ku publikadónan ku sí a yega di hasi esei. Si ta posibel, promé ku e dia di bo parti, purba papia riba bo tema asigná den un marko di sirkunstansia paresido na esun ku lo bo usa den e skol. Esaki lo yuda bo logra un di e metanan prinsipal di bo entrenamentu.

Presentashon den Forma di Diskurso

Si ta hende hòmber bo ta, lo bo por haña asignashon pa presentá un diskurso kòrtiku na e kongregashon. Ora di prepará e diskursonan aki, bo tin ku tene kuenta ku e mesun puntonan básiko menshoná kaba pa presentá e partinan di studiante den forma di demostrashon. E diferensia prinsipal ta e ouditorio i e forma di presentá e informashon.

Por lo general, ta konsehabel pa prepará bo informashon di tal manera ku tur hende den ouditorio lo benefisiá di dje. Mayoria di esnan presente konosé e bèrdatnan básiko di Beibel kaba. Podisé nan ta bon konosí ku e tema ku bo tin ku papia ariba. P’esei tene kuenta ku loke nan sa kaba di e tópiko i hasi esfuerso pa nan benefisiá di un manera òf otro di bo presentashon. Puntra bo mes: ‘Kon mi por usa e tema aki pa profundisá mi apresio—i di e ouditorio—pa Yehova i su kualidatnan? Kiko tin den e informashon ku ta indiká loke ta Dios su boluntat? Kon e informashon aki por yuda nos tuma desishonnan sano meimei di un mundu dominá pa deseonan di karni?’ (Efe. 2:3) Pa haña kontesta satisfaktorio riba e preguntanan ei bo mester hasi investigashon. Ora di usa Beibel, no djis lesa e versíkulonan, sino mas bien, rasoná riba nan pa mustra kon nan ta perkurá e base pa bo konklushonnan. (Echo. 17:2, 3) No purba kubri muchu informashon. Presentá bo informashon di tal manera ku lo e ta fásil pa kòrda.

Preparashon mester inkluí tambe kon pa presentá bo parti. Konsiderá esei komo algu importante. Train na bos haltu. E esfuerso ku bo ta hasi pa studia i apliká e konsehonan relashoná ku vários kualidat di papia lo kontribuí hopi na bo progreso. Sea ku bo tin tiki òf hopi eksperensia, prepará bon di manera ku bo por papia ku e konvikshon i sintimentu ku ta pas ku bo informashon. Segun bo ta kumpli ku kada asignashon den e skol, kòrda riba e meta: onra Yehova mediante e don divino di papia.—Sal. 150:6.