Volúmen Adekuá

SI UN oradó no ta papia sufisiente duru, algun hende den ouditorio por kuminsá kabishá. Si un publikadó ta papia ku stèm muchu abou den sirbishi di vèlt, ta difísil pa e keda ku e atenshon di e doño di kas. I si na reunion e komentarionan for di ouditorio no tin sufisiente volúmen, nan lo no duna esnan presente e animashon nesesario. (Heb. 10:24, 25) Di otro banda, si un oradó ta hisa su stèm n’e momentunan robes, su ouditorio lo por sinti su mes inkómodo, asta iritá.—Pro. 27:14.

Tene Kuenta ku Bo Ouditorio. Ku ken bo ta papiando? Ku un solo persona, un famia, un grupo chikí ku ta reuniendo pa sirbishi di vèlt, henter e kongregashon, òf ku e públiko grandi di un asamblea? Ta bisto ku kada situashon ta eksigí su propio nivel di volúmen.

Na vários okashon sirbidónan di Dios a papia dilanti un públiko grandi. Na inougurashon di e tèmpel na Yerúsalèm den tempu di Sálomon, no tabatin ekipo di zonidu. P’esei Sálomon a para riba un plataforma haltu i a bendishoná e pueblo “na bos haltu.” (1 Rei. 8:55; 2 Kró. 6:13) Siglonan despues, ora ku spiritu santu a ser dramá na Pentekòste di aña 33 di nos era, un multitut di hende (algun interesá i otronan hasiendo bofon) a reuní rònt di e grupo chikí di kristiannan na Yerúsalèm. Demostrando sabiduria práktiko, Pedro ‘a lanta para i papia na bos haltu.’ (Echo. 2:14) El a duna un testimonio ku a hasi un impakto.

Kon bo por sa si bo volúmen ta adekuá pa sierto situashon? Un di e mihó indikashonnan ta e reakshon di e ouditorio. Si bo ripará ku algun hende den ouditorio ta fòrsa pa tende bo, bo mester purba papia mas duru.

Sea ku bo ta papiando ku un persona so òf ku un grupo, ta sabí pa tene kuenta ku e tipo di hende ku ta forma bo ouditorio. Si un hende ta poko surdu, anto bo tin ku hisa bo stèm. Pero si ta debí na edat avansá e persona ta reakshoná poko slo, anto lo e no keda kontentu si bo grita. E por asta haña ku bo tin mal manera. Den algun kultura, ora un hende papia muchu duru nan ta konsiderá esei komo un indikashon di ku e persona ta rabiá òf no tin pasenshi.

Tene Kuenta ku Zonidunan Ku Ta Kita Hende Su Tinu. Ora bo ta den sirbishi di vèlt, e sirkunstansianan ku bo ta topa definitivamente ta determiná kon duru bo mester papia. Kisas bo tin ku papia mas duru pa motibu di e zonidu di tráfiko òf di mucha ku ta hasi bochincha, kachó ku ta blaf, músika duru òf un televishon tur-tur hisá. Di otro banda, kaminda kasnan ta hopi pegá riba otro, bo por pone e doño di kas sinti su mes inkómodo si bo papia asina duru ku bo ta hala atenshon di bisiña.

Ruman hòmbernan ku ta duna diskurso den kongregashon òf na asamblea tambe ta haña nan ku vários sirkunstansia. Papia ku un ouditorio na airu liber no ta meskos ku duna un diskurso den un salòn ku tin bon akústika. Na Latinoamérika, dos misionero tabatin ku duna un diskurso públiko den e patio di kas di un persona interesá miéntras ku hende tabata tira vürwèrk riba un plenchi djis eibanda i un gai tabata kanta kokoyoko sin stòp!

Por sosodé algu meimei di un diskurso ku ta obligá e oradó pa sea hisa su stèm òf pousa te ora e boroto pasa. Por ehèmpel, si tin un reunion den un lugá ku tin dak di zim i un palu di áwaseru bira kai, lo ta kasi imposibel p’e ouditorio skucha e oradó. Mucha ku ta yora òf e zonidu kousá dor di personanan ku ta yega lat, tambe ta stroba hende di konsentrá. Siña kontrarestá tal distraishon di manera ku bo ouditorio por saka pleno benefisio di e informashon ku bo ta presentá.

Ounke ekiponan di zonidu ta útil, lo tin okashon ku tòg e oradó mester hisa su stèm. Na lugánan kaminda kada bes koriente ta bai, oradónan ta haña nan obligá di sigui ku nan diskurso sin yudansa di mikrofon.

Tene Kuenta ku e Informashon Ku Ta Ser Tratá. E tipo di informashon tambe ta determiná kon duru bo mester papia. Si e tema ta rekerí un tono potente, no suak bo presentashon dor di papia ku stèm muchu abou. Por ehèmpel, si bo ta lesando deklarashonnan fuerte di huisio for di e Skritura, bo stèm mester ta mas duru ku ora bo ta lesa konseho enkuanto amor. Adaptá e volúmen di bo stèm n’e informashon, pero sòru hasié na un manera ku no ta hala atenshon na bo mes.

Tene Kuenta ku Bo Meta. Si bo kier stimulá bo ouditorio na aktividat seloso, kisas bo tin ku hisa bo stèm un poko. Pero si bo kier kambia nan manera di pensa, no spanta nan ku un stèm muchu duru. Ora bo kier duna konsuelo, ta mihó bo papia ku un bos suave.

Hisa Bo Stèm Ora e Okashon Ta Rekerí Esei. Si bo ta purba haña e atenshon di un hende ku ta drùk, por lo general ta bon pa hisa bo stèm. Mayornan sa esaki i ta p’esei nan ta hisa nan stèm ora nan ta yama nan yunan pa stòp di hunga i bin paden. Tambe ora un ruman ta presidente di un reunion di kongregashon òf di seshon di asamblea kisas e tin ku papia mas duru ora e ta bai kuminsá ku e programa. Ora publikadónan ta den sirbishi di vèlt, kisas nan tin ku saludá un persona ku ta trahando den kurá na bos haltu.

Asta despues ku bo kapta un persona su atenshon, ta importante pa bo sigui papia sufisiente duru. Un stèm hopi abou por duna e impreshon ku e oradó no ta bon prepará òf ku e mes no ta konvensí di loke e ta papia.

Ora un hende hisa su stèm pa duna un òrdu, esei por pone hende aktua. (Echo. 14:9, 10) Asina tambe, si bo grita un òrdu bo por evitá desaster. Na Filípos, un wardadó di prezu tabata kla pa mata su kurpa pasobra el a kere ku e prezunan a hui. “Ma Pablo a grita duru, bisando: ‘No hasi bo mes daño, pasobra nos tur t’aki!’” Asina el a evitá un suisidio. Despues Pablo ku Sílas a duna e wardadó di prezu i su famia testimonio, i nan tur a aseptá e bèrdat.—Echo. 16:27-33.

Kon pa Mehorá Bo Volúmen. Algun hende mester hasi un berdadero esfuerso pa nan siña usa volúmen adekuá. Kisas un persona no ta papia sufisiente duru dor ku su stèm ta suak. Sin embargo, ku esfuerso e por oumentá su potensia, maske su stèm lo keda un poko suave. Si bo kier mehorá, bo tin ku paga tinu na bo halamentu di rosea i na bo postura. Kustumbrá sinta i para stret. Manda bo skoudernan patras, i hala rosea profundo pa bo yena e parti abou di bo pulmonnan. Si bo regulá bon kon e airu aki ta sali, lo bo por kontrolá bo volúmen ora di papia.

Serka otro hende e problema ta ku nan ta papia muchu duru. Podisé nan a desaroyá e kustumber ei dor ku nan ta traha na airu liber òf den un ambiente di bochincha. Tambe por ta ku nan a lanta den un ambiente kaminda tur hende ta grita i interumpí otro. Komo resultado, nan ta kere ku e úniko manera pa nan por haña chèns di bisa algu den un kòmbersashon ta dor di papia mas duru ku sobrá hende. Pero segun ku nan ta apliká e konseho bíbliko pa bisti “un kurason di kompashon, kariño, humildat, mansedumbre [òf “suavedat”] i pasenshi,” nan lo siña ahustá nan volúmen ora nan ta kòmbersá ku otro hende.—Kol. 3:12.

Bon preparashon, eksperensia ku bo ta haña dor di sali regularmente den sirbishi di vèlt, i orashon na Yehova lo yuda bo papia ku e volúmen adekuá. Sea ku bo ta papia for di plataforma òf ku un persona den sirbishi di vèlt, hasi esfuerso pa pensa riba e benefisionan ku e persona lo risibí si e por tende bon loke bo ta bisa.—Pro. 18:21.