Konklushon Efikas

KISAS bo a investigá i organisá kuidadosamente e informashon pa e kurpa di bo diskurso. Tambe bo por a prepará un introdukshon ku ta lanta interes. Sin embargo, bo mester di un kos mas: un konklushon efikas. No balotá su importansia, pasobra e último kos ku bo bisa ta loke hopi bes hende ta keda kòrda mas mihó. Si e konklushon ta suak, asta e informashon ku bo a presentá promé kuné ta pèrdè hopi di su efektividat.

Konsiderá e siguiente ehèmpel: Na final di su bida, Hosué a duna un diskurso memorabel na e ansianonan di e nashon di Israel. Despues ku el a kaba di relatá kon Yehova a trata Israel for di tempu di Abraham, Hosué no a djis duna un resúmen di e puntonan prinsipal. Mas bien, yen di sintimentu el a konsehá e pueblo: “Teme SEÑOR i sirbié ku sinseridat i den bèrdat.” Lesa su konklushon pa bo mes na Hosué 24:14 i 15.

Un otro diskurso notabel, ku nos ta haña na Echonan 2:14-36, ta esun ku apòstel Pedro a duna dilanti un multitut reuní na Yerúsalèm pa e Fiesta di Pentekòste di aña 33 di nos era. Promé, el a splika ku loke nan a mira tabata kumplimentu di e profesia di Yoël relashoná ku dramamentu di Dios su spiritu. Despues el a mustra kon esaki tabatin di haber ku e profesianan Mesiániko den Salmo ku a predisí ku Hesukristu lo ser resusitá i halsá na e man drechi di Dios. Anto den su konklushon, Pedro a deklará bon kla e kuestion ku tur hende mester a enfrentá. E di: “Asina, laga henter kas di Israel sa sigur ku Dios a hasié tantu Señor komo Kristu—e Hesus aki, kende boso a [“klaba na staka,” NW].” (Echo. 2:36-38) Esnan presente a puntra: “Rumannan, kiko nos mester hasi?” Pedro a kontestá: “Repentí, i laga kada un di boso wòrdu batisá den e nòmber di Hesukristu.” (Echo. 2:37, 38) Konmoví pa loke nan a tende, e dia ei un 3.000 hende den su ouditorio a aseptá e bèrdat tokante Hesukristu.

Puntonan pa Tene Kuenta Kuné. Bo último palabranan mester ta direktamente relashoná ku e tema di bo diskurso. Nan mester ta e konklushon lógiko ku bo ta saka di e puntonan prinsipal ku bo a kaba di presentá. Ta abo mester disidí si bo kier djis bolbe ripití bo tema òf usa algun palabra klave di bo tema.

Normalmente bo propósito ta pa animá bo ouditorio pa aktua na armonia ku e informashon ku bo a presentá. Un meta prinsipal di e konklushon ta pa mustra nan kiko pa hasi. Ora bo a skohe bo tema i e puntonan prinsipal, bo a pensa kuidadosamente pakiko e informashon ta importante pa bo ouditorio i ku ki meta lo bo present’é? Si ta asina, bo sa kiko lo bo kier pa nan hasi. Awor bo tin ku splika nan kiko ta ser sperá di nan i, podisé kon nan por hasié.

Fuera di mustra nan kiko nan por hasi, bo konklushon mester motivá nan pa hasié. Pa logra esei bo tin ku bini ku motibunan válido, kisas dor di menshoná e posibel benefisionan ku tal proseder por trese kuné. Un frase final bon pensá i bon formulá lo reforsá e impakto di henter bo diskurso.

Tene na mente ku bo diskurso ta yegando na su fin, i bo palabranan mester indiká esei. Bo ritmo tambe mester ta apropiá. No keda papia lihé te na final, anto kaba stòp diripiente. Di otro banda, no djis baha bo stèm. Bo volúmen mester ta sufisiente duru pero no di mas. Bo último frasenan mester tin un tono di konklushon, i tambe nan mester reflehá bo sinseridat i konvikshon. No keda sin train bo konklushon ora bo ta prepará bo diskurso.

Kon largu bo konklushon mester ta? No ta oloshi so mester determiná esei. Tur kos ta dependé di e efekto ku e tin riba bo ouditorio. No rèk bo konklushon te ku e ta kansa bo ouditorio. Un konklushon simpel, direkto i positivo semper ta bon. Loke tambe por ta efikas ta un konklushon un poko mas largu pero ku un ilustrashon kòrtiku i bon pensá. Kompará e konklushon kòrtiku di henter e buki di Eklesiástes, ku bo ta haña na Eklesiástes 12:13 i 14, ku e konklushon di e Sermon Riba Seru, un relato muchu mas kòrtiku, ku ta pará skirbí na Mateo 7:24-27.

Den Sirbishi di Vèlt. Partikularmente den sirbishi di vèlt bo mester tin un bon konklushon. Si bo prepará i mustra interes amoroso den e hendenan, lo bo por haña hopi bon resultado, pasobra e konseho deskribí anteriormente ta konta tambe pa ora bo ta kòmbersá ku un solo persona.

Un kòmbersashon por ta masha kòrtiku. Podisé e persona ta okupá i bo bishita kisas lo no dura mas ku un minüt. Si ta apropiá, lo bo por bisa algu asin’aki: “Mi ta komprondé ku bo ta okupá. Pero permití mi kompartí djis un animashon for di Beibel ku bo. Nos Kreadó tin un propósito maravioso. Lo e hasi e tera aki un lugá kaminda hende por biba pa semper. Nos por ta den e Paradeis ei, pero nos tin ku siña kiko Dios ta rekerí.” Òf bo por djis ofresé e persona pa bolbe na un ora mas kumbiniente.

Bo por tin bon resultado asta ora e doño di kas interumpí e bishita na un manera brutu òf grosero. Tene na mente e konsehonan ku nos ta haña na Mateo 10:12 i 13 i tambe na Romanonan 12:17 i 18. Bo kontesta suave por pone e doño di kas kambia su punto di bista di Testigunan di Yehova. Esei so kaba lo ta un gran logro.

Di otro banda, kisas bo tabatin un dushi kòmbersashon ku e doño di kas. Pakiko bo no ta ripití e puntonan prinsipal ku bo kier pa e kòrda i anim’é hasi algu al respekto?

Si bo ta mira un bon chèns pa sigui kòmbersá na un otro okashon, duna e persona un motibu pa antisipá bo siguiente bishita. Hasi un pregunta, por ehèmpel unu ku e buki Rasonamentu for di e Skritura òf un otro publikashon diseñá pa kondusí studio di Beibel, ta trata. No lubidá ku bo meta ta loke Hesus a ekspresá na Mateo 28:19 i 20.

Bo ta na konklushon di un studio di Beibel? Dor di ripití e tema lo bo yuda e studiante kòrda loke boso a trata. E preguntanan di repaso lo yuda graba e puntonan klave den mente di e studiante, foral si e repaso no bai purá. Kisas bo por anim’é pa pensa riba maneranan práktiko pa usa loke el a siña dor di puntr’é ki benefisio e por saka for di e informashon òf kon lo e por kompartié ku otro hende.—Pro. 4:7.

Kòrda: bo konklushon ta yuda determiná kon efikas henter bo presentashon tabata.