Kapítulo Diesdos

Loke Bo Boutismo Ta Nifiká

1. Dikon kada un di nos mester ta personalmente interesá den boutismo den awa?

NA AÑA 29 Era Komun, Huan Boutista a batisá Hesus den riu Yordan. Yehova tabata wak i a ekspresá su aprobashon. (Mateo 3:16, 17) Asina Hesus a establesé un patronchi pa tur su disipelnan sigui. Tres aña i mei despues, Hesus a duna e instrukshonnan aki na su disipelnan: “Tur outoridat a wòrdu duná na mi den shelu i riba tera. P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu.” (Mateo 28:18, 19) Abo a batisá na armonia ku loke Hesus a manda einan? Si no ta asina, bo ta preparando pa hasi esei?

2. Ki pregunta nos mester kontestá en konekshon ku boutismo?

² Sea ku bo a batisá kaba òf ta preparando pa batisá, ta importante pa tur hende ku kier sirbi Yehova i biba den su hustu mundu nobo, komprendé bon kla kiko ta boutismo. Preguntanan ku mester di un kontesta ta entre otro: Boutismo kristian djawe tin e mesun nifikashon ku Hesus su boutismo? Kiko ta nifiká batisá “den nòmber di e Tata i di e Yu i di e spiritu santu”? Kiko ta enserá biba di akuerdo ku loke boutismo kristian den awa ta nifiká?

Boutismo Ku Huan A Hasi

3. Huan su boutismo tabata limitá na ken?

³ Un seis luna promé ku Hesus a batisá, Huan Boutista a kuminsá prediká den e desierto di Hudea, bisando: “Repentí, pasobra e reino di shelu ta serka.” (Mateo 3:1, 2) Hende a tende loke Huan a bisa i a hasi kaso di su atvertensia. Nan a konfesá nan pikánan abiertamente, repentí di nan, anto a bini serka Huan p’e batisá nan den riu Yordan. E boutismo ei tabata pa hudiu so.—Lukas 1:13-16; Echonan 13:23, 24.

4. Dikon e hudiunan den promé siglo mester a repentí urgentemente?

⁴ E hudiunan ei mester a repentí urgentemente. Na aña 1513 promé ku Era Komun, na seru Sínai, nan antepasadonan a drenta den un aliansa òf pakto nashonal—un akuerdo formal i solèm—ku Yehova Dios. Pero debí na nan pikánan grave, nan no a kumpli ku e responsabilidatnan ku nan tabatin bou di e pakto ei. Di manera ku e pakto ei a kondená nan. Ya den tempu di Hesus nan situashon tabata krítiko. “E dia grandi i teribel di SEÑOR” ku Malakías a profetisá, tabata serka. Na aña 70 Era Komun, e “dia” ei a yega ora ehérsito romano a destruí Yerusalèm, su tèmpel i mas ku un mion hudiu. Dios a manda Huan Boutista, kende tabatin selo pa adorashon berdadero, promé ku e destrukshon ei “pa asina forma un pueblo bon prepará pa Señor.” Nan mester a repentí di nan pikánan ku nan a kometé kontra e pakto dje Lei di Moises i prepará pa aseptá e Yu di Dios, Hesus, ku Yehova tabata bai manda pa nan.—Malakías 4:4-6; Lukas 1:17; Echonan 19:4.

5. (a) Ora Hesus a bini pa batisá, dikon Huan a kuestioná esaki? (b) Kiko Hesus su boutismo a simbolisá?

⁵ Entre esnan ku a bini serka Huan pa batisá tabata Hesus mes. Pero dikon? Sabiendo ku Hesus no tabatin piká pa konfesá, Huan a bis’é: “Ta ami mester wòrdu batisá dor di bo, anto abo ta bin serka mi?” Pero e boutismo di Hesus lo a simbolisá un otro kos. P’esei Hesus a kontestá: “Pèrmití esaki awor, pasobra di e manera aki ta toka nos di kumpli ku tur hustisia.” (Mateo 3:13-15) Komo ku Hesus tabata sin piká, su boutismo no a simbolisá repentimentu di piká; ni e no tabatin nodi dediká su mes na Dios, ya ku e tabata miembro di un nashon dediká kaba na Yehova. Mas bien, su boutismo na edat di 30 aña tabata úniko, i a simbolisá e echo ku el a presentá su mes na su Tata selestial pa hasi Su boluntat adishonal.

6. Kon serio Hesus tabata den hasi loke ta Dios su boluntat p’e?

⁶ Dios su boluntat pa Kristu Hesus a enserá aktividat en konekshon ku e Reino. (Lukas 8:1) Tambe esei a enserá e sakrifisio di su kurpa humano perfekto komo un reskate i komo base pa un pakto òf aliansa nobo. (Mateo 20:28; 26:26-28; Hebreonan 10:5-10) Hesus a tuma masha na serio loke su boutismo den awa a simbolisá. E no a pèrmití ningun otro interes kita su atenshon. Te na fin di su bida riba tera, el a kumpli fielmente ku Dios su boluntat, i su trabou prinsipal tabata di prediká e Reino di Dios.—Huan 4:34.

Boutismo den Awa di Disipel Kristian

7. Desde Pentekòste di aña 33 Era Komun, ki enkargo kristiannan a haña en konekshon ku boutismo?

⁷ Huan a batisá e promé disipelnan di Hesus den awa i despues a dirigí nan na Hesus komo futuro miembro dje Reino di shelu. (Huan 3:25-30) Bou di direkshon di Hesus, e disipelnan aki tambe a batisá algun hende i e boutismo aki tabatin e mesun nifikashon ku e boutismo di Huan. (Huan 4:1, 2) Sin embargo, for di Pentekòste di aña 33 Era Komun, nan a kuminsá kumpli ku e enkargo di batisá “den nòmber di e Tata i di e Yu i di e spiritu santu.” (Mateo 28:19) Lo ta hopi probechoso pa bo repasá kiko esei ta nifiká.

8. Kiko ta nifiká batisá “den nòmber di e Tata”?

⁸ Kiko ta nifiká batisá “den nòmber di e Tata”? Esei ta nifiká aseptá su nòmber, posishon, outoridat, propósito i leinan. Konsiderá kiko esaki ta enserá. (1) Relashoná ku su nòmber, Salmo 83:18 (NW) ta bisa: “Abo, kende su nòmber ta Yehova, abo so ta e Haltísimo riba henter tera.” (2) Relashoná ku su posishon, 2 Reinan 19:15 ta deklará: “O SEÑOR . . . , abo ta e Dios, abo so.” (3) En kuanto su outoridat, Revelashon 4:11 ta bisa nos: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” (4) Tambe nos tin ku rekonosé ku Yehova ta e Dunadó di Bida, kende tin e propósito di salba nos for di piká i morto: “Salbashon ta di SEÑOR.” (Salmo 3:8; 36:9) (5) Nos tin ku aseptá ku Yehova ta e Dunadó Supremo di Lei: “SEÑOR ta nos Hues, SEÑOR ta nos Dunadó di lei, SEÑOR ta nos Rei.” (Isaías 33:22) Debí ku e ta tur e kosnan aki, Beibel ta urgi nos: “Stima SEÑOR bo Dios ku henter bo kurason, i ku henter bo alma, i ku henter bo mente.”—Mateo 22:37.

9. Kiko ta nifiká batisá “den nòmber . . . di e Yu”?

⁹ Kiko batisá “den nòmber . . . di e Yu” ta nifiká? Esei ta nifiká rekonosé e nòmber, posishon i outoridat di Hesukristu. Su nòmber, Hesus, ta nifiká “Yehova Ta Salbashon.” E tin e posishon ei pasobra e ta Dios su Yu unigénito, Dios su promé kreashon. (Mateo 16:16; Kolosensenan 1:15, 16) Ta di e Yu aki Huan 3:16 ta bisa nos ku: “Dios a stima mundu [di humanidat ku ta bini na remarke pa reskate] asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” Komo ku Hesus a muri fiel, Dios a resusit’é for di morto i a dun’é mas outoridat. Segun apòstel Pablo, Dios ‘a halsa Hesus na un puesto superior’ den universo. Ta Yehova so ta mas haltu kuné. P’esei, “pa e nòmber di Hesus tur rudia mester dobla . . . [i] tur lenga mester konfesá ku Hesukristu ta Señor, pa e gloria di Dios Tata.” (Filipensenan 2:9-11; Hebreonan 1:3, 4) Esaki ta nifiká obedesé Hesus su mandamentunan, kuanan ta bini for di Yehova mes.—Huan 15:10.

10. Kiko ta nifiká batisá “den nòmber . . . di e spiritu santu”?

¹⁰ Kiko ta nifiká batisá “den nòmber . . . di e spiritu santu”? Esei ta nifiká rekonosé kiko ta e funshon di spiritu santu i tambe kiko ta tur loke e ta hasi. I kiko e spiritu santu ta? E ta Yehova su forsa aktivo ku kua e ta realisá su propósito. Hesus a bisa su siguidónan: “Lo mi pidi e Tata, i e lo duna boso un otro konsolador, pa e keda serka boso pa semper, esta, e spiritu di bèrdat.” (Huan 14:16, 17) Kiko esaki lo a kapasitá nan pa hasi? Hesus a bisa nan despues: “Boso lo risibí poder ora spiritu santu bin riba boso, i boso lo ta mi testigunan na Yerusalèm i na henter Hudea i Samaria, i te na e parti mas alehá di mundu.” (Echonan 1:8) Tambe mediante e spiritu santu, Yehova a inspirá e skirbimentu di Beibel: “Nunka profesia no a wòrdu duná pa medio di e boluntat di hende, ma hòmbernan santu di Dios a papia, inspirá dor di spiritu santu.” (2 Pedro 1:21) Pues, nos ta rekonosé e papel di spiritu santu ora nos ta studia Beibel. Un otro manera ku nos ta rekonosé e funshon di e spiritu santu ta dor di pidi Yehova yuda nos produsí “fruta di e spiritu,” kuanan ta “amor, goso, pas, pasenshi, kariño, bondat, fieldat, mansedumbre, dominio propio.”—Galationan 5:22, 23.

11. (a) Kiko ta e berdadero nifikashon di boutismo den nos tempu? (b) Den ki sentido un persona ta muri i resusitá ora e batisá?

¹¹ E promé personanan ku a batisá na armonia ku e instrukshonnan di Hesus tabata hudiu i hende ku a kombertí na religion hudiu, kuminsando na aña 33 Era Komun. Djis despues, a ekstendé e privilegio di bira disipel kristian na e samaritanonan. Anto na aña 36 Era Komun, e yamada a ekspandé pa inkluí hende ku no tabata hudiu sirkunsidá. Promé ku samaritano i hende ku no tabata hudiu sirkunsidá a batisá, nan tabatin ku dediká nan mes personalmente na Yehova pa sirbié komo disipel di su Yu. Te awe, esei ta loke boutismo kristian den awa ta nifiká. Bai kompletamente bou di awa ta un símbolo apropiado dje dedikashon personal aki, ya ku boutismo ta un entiero simbóliko. Ora bo bai bou di awa pa batisá, esei ta nifiká ku bo a muri pa ku bo forma di bida anterior. Ora bo sali for di bou di awa, esei ta simbolisá ku bo a resusitá pa hasi Dios su boluntat. E “ún boutismo” aki ta apliká na tur hende ku bira un kristian berdadero. Ora nan batisá nan ta bira un Testigu kristian di Yehova, nombrá pa Dios komo un sirbidó kualifiká pa prediká.—Efesionan 4:5; 2 Korintionan 6:3, 4.

12. Ku kiko boutismo kristian ta korespondé, i den ki manera?

¹² Tal boutismo tin gran balor den bista di Dios, pasobra e por salba un persona. Por ehèmpel, despues di menshoná kon Noe a traha e arka den kua e ku su famia a skapa e Diluvio, apòstel Pedro a skirbi: “Korespondiendo na esei, boutismo awor ta salba boso—no e kitamentu di sushi for di e karni, ma un apelashon na Dios pa un bon konsenshi—pa medio di e resurekshon di Hesukristu.” (1 Pedro 3:21) E arka tabata un prueba konkreto ku Noe a kumpli fielmente ku e trabou ku Dios a asign’é. Despues ku nan a kaba di traha e arka, “e mundu di e tempu ei a wòrdu destruí, siendo inundá ku awa.” (2 Pedro 3:6) Pero Noe ku su famia, “ocho persona, a wòrdu hibá sano i salvo dor di e awa.”—1 Pedro 3:20.

13. Di kiko boutismo den awa ta salba un kristian?

¹³ Awendia, hende ku dediká nan mes na Yehova a base di nan fe den Kristu resusitá, ta batisá komo símbolo di nan dedikashon. Nan ta kuminsá hasi loke ta Dios su boluntat pa nos tempu i ta ser salbá for dje mundu malbado aktual. (Galationan 1:3, 4) Nan no ta rumbo pa destrukshon mas huntu ku e mal sistema di kosnan aki. Nan ta skapa di esaki i Dios ta duna nan un bon konsenshi. Apòstel Huan ta sigurá sirbidónan di Dios: “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.”—1 Huan 2:17.

Kumpliendo ku Nos Responsabilidat

14. Dikon boutismo riba su mes no ta un garantia pa haña salbashon?

¹⁴ Lo ta un ekibokashon pa kere ku boutismo riba su mes ta un garantia pa haña salbashon. E tin balor solamente si un persona realmente a dediká su mes na Yehova mediante Hesukristu i despues di esei ta kumpli ku Dios su boluntat, kedando fiel te na fin. “Esun ku perseverá te na fin, esei lo ta salbá.”—Mateo 24:13.

15. (a) Awe, kiko ta Dios su boluntat pa kristiannan batisá? (b) Kon importante ser un disipel kristian mester ta den nos bida?

¹⁵ Dios su boluntat pa Hesus a enserá e manera ku el a usa su bida komo hende. E tabatin ku entregá su bida komo sakrifisio. Den nos kaso, nos tin ku presentá nos kurpa na Dios, i nos tin ku hiba un bida di sakrifisio propio dor di hasi Dios su boluntat. (Romanonan 12:1, 2) Sigur nos lo no ta hasiendo Dios su boluntat si nos ta komportá nos mes—maske ta de bes en kuando so—deliberadamente meskos ku e mundu rònt di nos òf si nos bida ta enfoká riba aktividatnan egoista i nos ta sirbi Dios djis pa formalidat. (1 Pedro 4:1-3; 1 Huan 2:15, 16) Ora un hudiu a puntra kiko e tin ku hasi pa haña bida eterno, Hesus a konfirmá ku ta importante pa hiba un bida moralmente limpi. Pero despues el a indiká algu ku ta asta mas importante: un hende mester ta un disipel kristian, un siguidó di Hesus. Esei mester ta e kos prinsipal den bida. E no por ta na di dos lugá, despues di aktividatnan material.—Mateo 19:16-21.

16. (a) Ki responsabilidat tur kristian tin en konekshon ku e Reino? (b) Manera e ilustrashonnan na página 116 i 117 ta mustra, kua ta algun manera efikas pa hasi e trabou di Reino? (c) Si nos ta partisipá di henter kurason den e trabou di duna testimonio, esei ta duna evidensia di kiko?

¹⁶ Nos mester bolbe enfatisá ku Dios su boluntat pa Hesus a enserá aktividat vital en konekshon ku e Reino di Dios. Hesus mes a ser ungí komo Rei. Pero miéntras e tabata riba tera, el a duna tambe un testimonio seloso tokante e Reino. Nos tin un trabou similar di duna testimonio, i nos tin tur motibu pa partisipá den dje ku henter nos kurason. Hasiendo esei, nos ta demostrá nos gratitut pa Yehova su gobernashon supremo i tambe nos amor pa nos próhimo. (Mateo 22:36-40) Ademas nos ta demostrá ku nos ta uní ku kompañeronan di adorashon mundialmente, ya ku nan tur ta proklamadó di Reino. Huntu, den union mundial, nos ta sigui padilanti pa alkansá e meta di bida eterno den e teritorio terenal dje Reino ei.

Komo Repaso

• Ki similaridat i ki diferensia tin entre e boutismo di Hesus i boutismo den awa djawe?

• Kiko ta nifiká batisá “den nòmber di e Tata i di e Yu i di e spiritu santu”?

• Kiko ta enserá kumpli ku e responsabilidat di boutismo kristian den awa?

[Plachinan na página 116, 117]

ALGUN MANERA PA PROKLAMÁ E REINO

Di kas pa kas

Na famia

Na kolega di trabou

Na kompañero di skol

Riba kaya

Rebishitando hende interesá

Na studio di Beibel na kas