Kapítulo Dieskuater
Kon Yehova Ta Dirigí Su Organisashon?
1. Kiko Beibel ta revelá tokante Yehova su organisashon, i dikon ta importante pa nos sa esei?
DIOS tin un organisashon? E Skritura inspirá ta bisa nos ku sí. Den su Palabra, Dios ta duna nos djis un idea kon e parti selestial impreshonante dje organisashon ei ta. (Ezekiel 1:1, 4-14; Daniel 7:9, 10, 13, 14) Ounke nos no por mira e parti invisibel aki, tòg e tin su impakto riba adoradónan berdadero djawe. (2 Reinan 6:15-17) Yehova su organisashon ta konsistí tambe di un parti visibel riba tera. Beibel ta yuda nos komprendé kiko e ta i kon Yehova ta dirigié.
Identidat dje Parti Visibel
2. Kua kongregashon nobo Dios a forma?
2 Pa 1.545 aña e nashon di Israel tabata e kongregashon di Dios. (Echonan 7:38) Pero Israel no a kumpli ku e leinan di Dios i asta a rechasá su Yu. P’esei Yehova a rechasá e kongregashon ei i a bandon’é. Hesus a bisa e hudiunan: “Mira, boso kas ta keda desolá pa boso!” (Mateo 23:38) Anto Dios a forma un kongregashon nobo, ku kua el a sera un pakto nobo. E kongregashon aki lo a bai konsistí di 144.000 persona ku Dios lo a skohe pa uni ku su Yu den shelu.—Revelashon 14:1-4.
3. Kiko a tuma lugá na Pentekòste di aña 33 Era Komun komo evidensia bon kla ku awor Dios tabata usa un kongregashon nobo?
3 Yehova a ungi e promé personanan dje kongregashon nobo ei ku su spiritu santu na Pentekòste di aña 33 Era Komun. Nos ta lesa relashoná ku e suseso remarkabel ei: “I ora ku e dia di Pentekòste a yega, nan tur tabata huntu na ún lugá. I di ripiente a bin un zonidu for di shelu, manera un bientu violento i fuerte, i esaki a yena henter e kas kaminda nan tabata sintá. I nan a mira loke tabata parse lenganan di kandela, kuanan a separá for di otro, i a bai para riba kada un di nan. I nan tur a wòrdu yená ku spiritu santu.” (Echonan 2:1-4) Asina Dios su spiritu santu a duna evidensia bon kla ku awor esaki tabata e grupo di hende ku Dios lo a usa pa kumpli ku su propósito bou di guia di Hesukristu den shelu.
4. Ken awe ta forma Yehova su organisashon visibel?
4 Awe, ta un restu so dje 144.000 tin riba tera. Pero na armonia ku profesia bíbliko, “un multitut grandi” di ‘otro karné,’ miónes di nan, ta asosiá ku e restu ungí. Hesus, e Bon Wardadó, a uni e otro karnénan aki ku e restu di manera ku huntu nan ta forma un solo tou bou di dje komo nan solo Wardadó. (Revelashon 7:9; Huan 10:11, 16) Nan tur huntu ta forma un solo kongregashon uní, Yehova su organisashon visibel.
Un Organisashon ku un Struktura Teokrátiko
5. Ken ta dirigí e organisashon di Dios, i den ki manera?
5 E ekspreshon bíbliko “e iglesia [kongregashon, NW] di e Dios bibu” ta revelá ta ken ta dirigié. E organisashon ta teokrátiko, es desir, e ta ser dirigí dor di Dios. Yehova ta guia su pueblo via Hesus, ku El a nombra komo Kabes invisibel dje kongregashon, i tambe via Beibel, ku ta Su propio Palabra inspirá.—1 Timoteo 3:14, 15; Efesionan 1:22, 23; 2 Timoteo 3:16, 17.
6. (a) Kon guia selestial dje kongregashon tabata bisto den promé siglo? (b) Kiko ta mustra ku ainda Hesus ta Kabes dje kongregashon?
6 E guia selestial ei tabata masha bisto na Pentekòste. (Echonan 2:14-18, 32, 33) Tambe e tabata bisto ora e angel di Yehova a dirigí kosnan p’e bon nobo plama bai te Áfrika, ora Hesus su bos a duna instrukshon na e okashon ku Saulo di Tarso a kombertí, i ora Pedro a kuminsá prediká na e hendenan dje nashonnan. (Echonan 8:26, 27; 9:3-7; 10:9-16, 19-22) Pero ku tempu, e kristiannan no tabata tende bos mas for di shelu, ni mira angel, ni risibí donnan milagroso di spiritu. Sin embargo, Hesus a primintí: “Mira, mi ta ku boso semper, te na fin di mundu.” (Mateo 28:20; 1 Korintionan 13:8) Awe, Testigunan di Yehova ta konfirmá ku ta Hesus ta guia nan. Sin esei, lo no tabata posibel pa proklamá e mensahe di Reino apesar di e oposishon intenso ku nan ta enfrentá.
7. (a) Ta ken ta forma “e esklabo fiel i prudente,” i dikon? (b) Ki asignashon e “esklabo” aki a haña?
7 Djis promé ku su morto, Hesus a konta su disipelnan tokante “e esklabo fiel i prudente” ku e komo Doño òf Shon lo a konfia ku responsabilidat spesial. E “esklabo” ei lo tabata presente ora e Señor a bai shelu i ainda lo e ta trahando duru ora Kristu regresá na un manera invisibel den poder di Reino. Un deskripshon asina no por ta referí na un solo persona, pero sí e ta kuadra ku Kristu su kongregashon ungí. Komo ku Hesus a kumpr’é ku su sanger, e ta referí na dje komo su “esklabo.” El a enkargá su miembronan pa hasi disipel i pa alimentá e disipelnan progresivamente, dunando nan “nan kuminda [spiritual] na su debido tempu.”—Mateo 24:45-47; 28:19; Isaías 43:10; Lukas 12:42; 1 Pedro 4:10.
8. (a) Ki responsabilidat e grupo di esklabo tin awor? (b) Dikon ta importante pa nos hasi kaso di e instrukshon perkurá via e kanal di Dios?
8 Siendo ku e grupo di esklabo tabata hasiendo e trabou dje Shon fielmente ora el a regresá na un manera invisibel na aña 1914, tin evidensia ku nan a risibí mas responsabilidat na 1919. E añanan ku a pasa desde e tempu ei tabata un periodo pa duna un testimonio mundial dje Reino, i aktualmente nan ta reuniendo un multitut grandi di adoradó di Yehova ku e propósito di konserbá nan na bida atraves dje gran tribulashon. (Mateo 24:14, 21, 22; Revelashon 7:9, 10) E multitut grandi aki tambe tin mester di alimento spiritual, i e grupo di esklabo ta sirbi nan esei. Pues anto, pa nos agradá Yehova nos tin ku aseptá e instrukshon ku e ta perkurá via e kanal aki i aktua na armonia ku e instrukshon.
9, 10. (a) Ki areglo tabatin den promé siglo pa solushoná pregunta tokante doktrina òf pa guia e predikashon dje bon nobo? (b) Ki areglo tin awe pa kordiná e aktividatnan di Yehova su pueblo?
9 Tin biaha ta surgi pregunta tokante doktrina i e manera di hasi kosnan. Kiko mester hasi e ora ei? Echonan kapítulo 15 ta konta nos kon a solushoná un kuestion ku a surgi tokante hende dje nashonnan ku a kombertí. Nan a presentá e asuntu na e apòstel i ansianonan na Yerusalèm, ku a sirbi komo un kuerpo gobernante sentral. E hòmbernan ei no tabata infalibel, es desir hendenan ku no por a faya, pero ta nan Dios tabata usa. Nan a konsiderá loke e Skritura a bisa relashoná ku e kuestion i tambe e evidensia ku tabatin dje manera ku Dios su spiritu a obra pa habri e teritorio dje nashonnan. Kaba, nan a tuma un desishon. Dios a bendishoná e areglo ei. (Echonan 15:1-29; 16:4, 5) E kuerpo sentral ei tabata manda personanan otro lugá pa yuda e predikashon di Reino bai dilanti.
10 Den nos tempu e Kuerpo Gobernante di Yehova su organisashon visibel ta konsistí di ruman hòmbernan ungí ku spiritu for di vários pais, i ta ubiká na e sede mundial di Testigunan di Yehova. Bou dje liderato di Hesukristu, e Kuerpo Gobernante ta yuda adorashon puru bai dilanti den tur pais, i ta kordiná e aktividat di prediká di Testigunan di Yehova den nan desénas di míles di kongregashon. Esnan ku ta forma parti dje Kuerpo Gobernante tin e mesun punto di bista ku apòstel Pablo, kende a skirbi kompañeronan kristian: “No ku nos tin dominio riba boso fe, ma nos ta trahadó huntu ku boso pa boso goso; pasobra den boso fe boso ta para firme.”—2 Korintionan 1:24.
11. (a) Kon ansiano i sirbidó ministerial ta ser nombrá? (b) Dikon nos tin ku koperá estrechamente ku esnan nombrá?
11 Testigunan di Yehova rònt mundu ta laga e Kuerpo Gobernante skohe ruman hòmbernan kualifiká ku, na nan turno, ta ser outorisá pa nombra ansiano i sirbidónan ministerial pa atendé e kongregashonnan. Beibel ta bisa kua ta e rekisitonan ku esnan nombrá mester kumpli kuné i ta tene kuenta ku e hòmbernan ei no ta perfekto i ta faya. E ansianonan ku ta rekomendá ken por bira ansiano i sirbidó ministerial i esnan ku ta hasi e nombramentu ta karga un responsabilidat serio dilanti Dios. (1 Timoteo 3:1-10, 12, 13; Tito 1:5-9) P’esei, nan ta hasi orashon pa pidi Dios su spiritu yuda nan i nan ta buska guia den su Palabra inspirá. (Echonan 6:2-4, 6; 14:23) Laga nos demostrá nos apresio pa e “donnan na hende” aki, ku ta yuda nos tur alkansá “e unidat di fe.”—Efesionan 4:8, 11-16.
12. Kon Yehova ta usa hende muhé den e areglo teokrátiko?
12 E Skritura ta manda pa hende hòmber supervisá kosnan den e kongregashon. Esaki no ta rebahá hende muhé, pasobra algun di nan ta heredero dje Reino selestial, i nan ta hasi gran parti dje trabou di prediká. (Salmo 68:11, SAB) Tambe dor di atendé nan responsabilidatnan di famia fielmente, hende muhé ta kontribuí n’e bon reputashon dje kongregashon. (Tito 2:3-5) Pero ta hende hòmber ku a ser nombrá tin e enkargo di duna siñansa den e kongregashon.—1 Timoteo 2:12, 13.
13. (a) Beibel ta urgi ansianonan pa nan tin ki punto di bista di nan posishon? (b) Den ki privilegio nos tur por partisipá?
13 Pa mundu, un persona ku tin un puesto prominente ta un hende importante, pero den Dios su organisashon e regla ta: “Esun ku komport’é komo un menor den boso tur ta esun ku ta grandi.” (Lukas 9:46-48, NW; 22:24-26) E Skritura ta konsehá ansianonan pa tene kuidou pa nan no dominá esnan ku ta Dios su herensia sino mas bien, bira ehèmpel pa e tou. (1 Pedro 5:2, 3) No ta solamente un par di hende skohí, sino tur Testigu di Yehova, hòmber i muhé, tin e privilegio di representá e Soberano di universo dor di papia humildemente den su nòmber i konta hende na tur parti tokante di su Reino.
14. Usando e tekstonan bíbliko menshoná, trata e preguntanan na fin dje paragraf.
14 Nos ta hasi bon di puntra nos mes: ‘Di bèrdat mi ta komprendé i apresiá e manera ku Yehova ta dirigí su organisashon visibel? Mi aktitut, mi abla i mi akshonnan ta reflehá esei?’ Kada un di nos por eksaminá su mes dor di rasoná riba e siguiente puntonan.
Si di bèrdat mi a someté mi na Kristu komo Kabes dje kongregashon, kiko lo mi mester ta hasiendo, manera e siguiente tekstonan ta indiká? (Mateo 24:14; 28:19, 20; Huan 13:34, 35)
Ora mi ta aseptá ku apresio e perkurashonnan spiritual ku ta bini dje grupo di esklabo i su Kuerpo Gobernante, na ken mi ta mustra rèspèt? (Lukas 10:16)
Kon tur hende den kongregashon, foral e ansianonan, mester trata otro? (Romanonan 12:10)
15. (a) Kiko nos ta demostrá ku e aktitut ku nos tin pa Yehova su organisashon visibel? (b) Ki oportunidatnan nos tin pa duna prueba ku Diabel ta un mentiroso i hasi Yehova su kurason kontentu?
15 Yehova ta guia nos awe via su organisashon visibel bou di mando di Kristu. Nos aktitut pa ku e areglo aki ta demostrá kiko nos ta pensa dje kuestion di si Dios tin derecho di ta e gobernante supremo. (Hebreonan 13:17) Satanas ta pretendé ku nos ta interesá solamente den nos mes. Nos ta duna prueba ku Diabel ta un mentiroso ora nos ta sirbi den kualkier manera ku ta nesesario i ta evitá kosnan ku ta hala indebido atenshon na nos mes. Si nos ta stima i respetá esnan ku ta hiba delantera den nos, pero ta nenga di ‘labia hende pa nos saka probecho,’ nos ta hasi Yehova kontentu. (Hudas 16; Hebreonan 13:7) Dor di keda fiel na Yehova su organisashon, nos ta mustra ku Yehova ta nos Dios i ku nos ta uní den su adorashon.—1 Korintionan 15:58.
Komo Repaso
• Ken ta forma Yehova su organisashon visibel awe? Kiko ta su propósito?
• Ken ta nombrá komo Kabes dje kongregashon, i via ki areglo visibel e ta perkurá guia amoroso pa nos?
• Ki aktitutnan saludabel nos tin ku kultivá pa e personanan den Yehova su organisashon?
[Plachi na página 133]
Yehova ta guia nos via su organisashon visibel bou di mando di Kristu