Ken Ta e Arkangel Miguel?

E KRIATURA spiritual yamá Miguel no ta aparesé hopi biaha den Beibel. Sin embargo, ki ora ku Beibel a menshon’é, e ta hasiendo algu. Den e buki di Daniel, Miguel ta lucha kontra angelnan malbado; den e karta di Hudas, e ta diskutí ku Satanas; i den Revelashon, e ta hiba un guera kontra Diabel i su demoñonan. Dor di defendé Yehova su gobernashon i lucha kontra Dios su enemigunan, Miguel ta biba di akuerdo ku e nifikashon di su nòmber: “Ken Ta Manera Dios?” Pero ken Miguel ta?

Tin biaha, personanan ta konosí na mas ku un nòmber. Por ehèmpel, patriarka Jakòb ta konosí tambe komo Israel, i apòstel Pedro, komo Simon. (Génesis 49:1, 2; Mateo 10:2) Asina tambe Beibel ta indiká ku Miguel ta un otro nòmber pa Hesukristu, promé i despues di su bida riba tera. Laga nos konsiderá motibunan bíbliko pa yega na e konklushon ei.

Arkangel. E Palabra di Dios ta referí na Miguel “e arkangel.” (Hudas 9) E ekspreshon aki ta nifiká “angel prinsipal.” Tuma nota ku Beibel ta yama Miguel e arkangel. Esaki ta parse di indiká ku ta un arkangel so tin. De echo, e ekspreshon “arkangel” ta aparesé den Beibel solamente den forma singular, nunka na plural. Es mas, Beibel ta liga Hesus ku e puesto di arkangel. Relashoná ku e Señor Hesukristu resusitá, 1 Tesalonisensenan 4:16 ta deklará: “Señor mes lo baha for di shelu ku un gritu, ku bos di arkangel.” Pues Beibel ta deskribí e bos di Hesus komo bos di arkangel. E teksto aki ta sugerí anto ku Hesus mes ta e arkangel Miguel.

Lider di ehérsito. Beibel ta deklará ku “Miguel i su angelnan tabata hasi guera kontra e dragon . . . i su angelnan.” (Revelashon 12:7) Pues, Miguel ta e Lider di un ehérsito di angelnan fiel. Revelashon ta deskribí Hesus tambe komo e Lider di un ehérsito di angelnan fiel. (Revelashon 19:14-16) I apòstel Pablo spesífikamente ta menshoná “Señor Hesus” i “su angelnan poderoso.” (2 Tesalonisensenan 1:7) Pues Beibel ta papia tantu di Miguel i “su angelnan” komo di Hesus i “su angelnan.” (Mateo 13:41; 16:27; 24:31; 1 Pedro 3:22) Siendo ku e Palabra di Dios no ta indiká ningun kaminda ku den shelu tin dos ehérsito di angelnan fiel—unu enkabesá pa Miguel i un otro enkabesá pa Hesus—ta lógiko pa konkluí ku Miguel no ta ningun otro ku Hesukristu den su papel selestial.a