TÓPIKO PRINSIPAL | ANGEL—KIKO BEIBEL TA BISA DI NAN?

Kiko Beibel Ta Bisa di Angel?

Lo bo ke sa kiko Beibel ta bisa di angel? Lo bo ke sa ken nan ta, kon nan a bini na eksistensia i kiko nan ta hasi? E mihó kaminda pa haña kontesta riba e preguntanan ei ta den Beibel, e Palabra inspirá di Dios. (2 Timoteo 3:16) Pues, wak kiko Beibel ta bisa.

Meskos ku Dios ta un Spiritu, asina tambe, angel ta spiritu invisibel ku “no tin karni i wesu.” E angelnan fiel na Dios ta biba den shelu i tin akseso direkto na e presensia selestial di Dios.—Lukas 24:39; Mateo 18:10; Huan 4:24.
Den pasado, angel tabata tuma kurpa di hende pa kumpli ku un asignashon riba tera ku Dios a duna nan, i ora nan kaba, nan tabata kita e kurpa di karni ei.—Huesnan 6:11-23; 13:15-20.
Aunke den Beibel angel ta ser representá pa e sekso maskulino i semper nan a tuma kurpa di hende hòmber ora nan a bini na tera, nan no tin sekso, pues nan no ta ni hòmber ni muhé. Nan no ta kasa ni reprodusí. Ademas, angel no a bini na eksistensia originalmente komo hende riba tera, sea komo bebi, mucha òf adulto. Yehova a krea angel, i p’esei Beibel ta yama nan “yu hòmbernan di Dios.”—Yòb 1:6; Salmo 148:2, 5.
Beibel ta papia di “idioma di hende i di angel,” loke ta mustra ku angel tin nan mes idioma i ta komuniká ku otro. Aunke Dios a usa angel pa komuniká ku hende, e no ta permití nos adorá angel ni hasi orashon na nan.—1 Korintionan 13:1; Revelashon 22:8, 9.
Tin míles di miónes di angel, kisas asta miónes di miónes.a—Daniel 7:10; Revelashon 5:11.
Angel ta “poderoso den fortalesa,” muchu mas fuerte ku hende i tin inteligensia sobrehumano. Ademas, nan por biaha hopi mas lihé ku hende òf kualke otro kos den e mundu físiko.—Salmo 103:20; Daniel 9:20-23.
Maske angel ta muchu mas fuerte i sabí ku hende, nan tin nan limitashonnan i tin kos ku nan no sa.—Mateo 24:36; 1 Pedro 1:12.
Yehova a krea angel ku nan propio personalidat, ku kualidatnan manera esnan di Dios i ku boluntat liber. P’esei, meskos ku hende, nan tambe por skohe pa hasi bon òf malu. Lamentablemente, algun angel a skohe pa rebeldiá kontra Dios.—Hudas 6.

a E ekspreshon original na griego na Revelashon 5:11 ta referí na “10.000 biaha 10.000.” Pues esei ta duna e posibilidat ku por tin sientos di miónes di angel.

Kon Angel di Dios Ta Organisá?

E arkangel, Miguel, ta e hefe di e angelnan, i e tin mas poder i outoridat ku tur otro angel. E Skritura ta indiká bon kla ku Miguel ta un otro nòmber pa Hesukristu.—1 Tesalonisensenan 4:16; Hudas 9.

E serafinnan ta angel di rango hopi haltu debí na nan privilegionan i onor, i nan ta sirbi na e trono di Dios.—Isaías 6:1-3.

E kerubinnan tambe tin puesto haltu i tin responsabilidatnan spesial ku ta estrechamente relashoná ku Dios Todopoderoso, e Persona di mas glorioso. Vários pasashi bíbliko ta indiká ku nan ta sirbi Dios.—Génesis 3:24; Ezekiel 9:3; 11:22.

E míles di miónes di otro angelnan mensahero ta fungi komo agente i representante di e Haltísimo i ta kumpli ku su boluntat.b—Hebreonan 1:7, 14.

b Pa mas informashon tokante angel, wak kapítulo 10 di e buki Kiko Beibel Ta Siña Realmente? i tambe e apèndiks “Ken Ta e Arkangel Miguel?” publiká pa Testigunan di Yehova. Bo por download e buki akí for di www.jw.org.