“Sigui Papia, i No Keda Ketu”

1-3. Dikon Apòstel Pablo a bai Korinto, i kiko tabata algun kos ku lo por tabata preokup’é?

TABATA final di aña 50 despues di Kristu. Apòstel Pablo tabata na Korinto, un stat riku kaminda hende tabata bai pa bende i kumpra kos. Hopi hende griego, romano i hudiu tabata biba einan.a Pablo no a bai Korinto pa kumpra òf bende kos ni pa buska trabou. El a bai Korinto pa hasi algu muchu mas importante, pa prediká tokante e Reino di Dios. Sinembargo, Pablo tabatin mester di un lugá pa keda, i e no tabata ke puntra ningun hende pa sosten’é finansieramente. E no tabata ke duna e impreshon ku hende mester a dun’é plaka pasobra e tabata prediká e Palabra di Dios. Kiko lo el a hasi?

² Pablo tabatin un fishi. E tabata sa kon pa traha tènt. Trahamentu di tènt no tabata un trabou fásil. Pero e tabata dispuesto pa usa e fishi ei pa sostené su mes. Lo el a logra haña trabou den e stat drùk ei? Lo el a logra haña un lugá adekuá pa keda? Aunke Pablo tabatin tur e preokupashonnan ei, e no a lubidá ku e trabou di mas importante ku e tabatin tabata e trabou di prediká.

³ Ta parse ku Pablo a keda Korinto pa basta tempu, i su sirbishi a duna bon resultado. Ban wak tur loke Pablo a hasi na Korinto i kon su ehèmpel por yuda nos duna testimonio kabal tokante e Reino di Dios den nos teritorio.

“Nan Tabatin e Mesun Fishi di Traha Tènt” (Echonan 18:1-4)

4, 5. (a) Unda Pablo a keda ora e tabata na Korinto, i ki trabou el a hasi? (b) Kon Pablo a siña traha tènt?

⁴ Un poko tempu despues ku Pablo a yega Korinto, el a sera konosí ku un pareha masha hospitalario. Un hòmber hudiu ku yama Akila i su esposa Priskila, òf Priska. E pareha a muda bai Korinto pasobra Emperador Klaudio “a duna òrdu pa tur hudiu sali for di Roma.” (Echo. 18:1, 2) Akila i Priskila no a djis invitá Pablo pa keda serka nan, nan a invit’é pa traha huntu ku nan tambe. Beibel ta bisa: “Komo ku nan tabatin mesun fishi di traha tènt, Pablo a keda na nan kas i traha huntu ku nan.” (Echo. 18:3) Pablo a keda serka e pareha amabel i hospitalario ei durante su sirbishi na Korinto. Kisas ta ora Pablo tabata keda serka Akila i Priskila el a skirbi algun di e kartanan ku despues a bira parti di Beibel.b

⁵ Kon bini Pablo, un hòmber ku a ser eduká pa Gamaliel, por tabata traha tènt? (Echo. 22:3) Ta parse ku e hudiunan di promé siglo no tabata haña ku ta bèrgwensa pa nan yunan siña un fishi, asta si despues nan lo a haña mas edukashon. Pablo a bini di Tarso di Silisia. E área ei tabata konosí pa un tela famoso ku nan tabata usa pa traha tènt. Probablemente, Pablo a siña e fishi di traha tènt ora e tabata hóben. Kiko trahamentu di tènt tabata enserá? Pa traha un tènt, un trahadó mester a weef e tela di e tènt òf kòrt’é i kos’é. Esei no tabata un trabou fásil, pasobra e tela tabata hopi steif.

6, 7. (a) Kon Pablo a mira su fishi di traha tènt i kiko a indiká ku Akila i Priskila tabatin un punto di bista similar? (b) Kon kristiannan awe ta sigui e ehèmpel di Pablo, Akila i Priskila?

⁶ Trahamentu di tènt no tabata e kos di mas importante pa Pablo. E tabata traha tènt solamente pa sostené su mes den sirbishi. Su meta tabata pa prediká e bon notisia “sin kobra nada.” (2 Kor. 11:7) Kon importante Akila i Priskila a haña nan trabou? Komo kristian, sin duda nan tabatin e mesun punto di bista di trabou ku Pablo tabatin. De echo, Akila i Priskila a laga nan negoshi atras i a muda bai Efeso huntu ku Pablo ora Pablo a bai for di Korinto na aña 52 despues di Kristu. Na Efeso, e kongregashon tabata reuní na kas di Akila i Priskila. (1 Kor. 16:19) Mas despues, nan a bolbe bèk Roma i a bolbe bai Efeso. E pareha yen di entusiasmo ei a pone e Reino na promé lugá den nan bida. I nan tabata dispuesto pa pone nesesidat di otro hende promé ku di nan mes. Pa e motibu ei, “tur e kongregashonnan di e nashonnan” tabata gradisidu na nan.​—Rom. 16:3-5; 2 Tim. 4:19.

⁷ Awe, kristiannan ta sigui ehèmpel di Pablo, Akila i Priskila. Rumannan yen di entusiasmo ta traha duru pa asina nan “no pone un karga pisá riba” otro hende. (1 Tes. 2:9) Hopi ruman ku ta traha komo pionero awe ta pone un bon ehèmpel den esei. Nan ta traha algun dia pa siman òf algun luna durante aña pa asina kubri nan gastunan. Pero, ta nan sirbishi ta loke ta mas importante pa nan. Anto meskos ku Akila i Priskila, hopi ruman hospitalario awe ta laga superintendente di sirkuito keda serka nan. E rumannan ku ta “sigui e kaminda di hospitalidat” i ta laga superintendente di sirkuito keda serka nan sa kon animante i refreskante esei por ta.​—Rom. 12:13.

“Hopi di e Korintionan . . . A Bira Kreyente” (Echonan 18:5-8)

8, 9. Kon Pablo a reakshoná ora e hudiunan a opon’é miéntras ku e tabata prediká i unda Pablo a bai prediká e ora ei?

⁸ Loke Pablo a hasi ora Sílas i Timoteo a yega for di Masedonia ku regalo generoso ta mustra bon kla ku pa Pablo su trabou tabata djis algu pa sostené su mes den sirbishi. (2 Kor. 11:9) Mesora, “Pablo a kuminsá dediká su mes kompletamente na prediká palabra di Dios.” (Echo. 18:5) Sinembargo, miéntras ku Pablo tabata prediká yen di entusiasmo, e hudiunan tabata opon’é. Nan tabata rechasá e mensahe ku Pablo tabata prediká, esta, ku Kristu por a salba nan. Anto Pablo kier a mustra nan ku e no tabata responsabel pa e desishon ku nan a tuma. Pues, el a sagudí su paña i a bisa nan: “Boso mes ta responsabel pa boso morto! Ami no ta kulpabel. Di awor padilanti, lo mi bai serka hende di e nashonnan.”​—Echo. 18:6; Eze. 3:18, 19.

⁹ Na unda Pablo lo a bai prediká e ora ei? Un hòmber ku tabata yama Titio Hustu, probablemente un hende ku a kombertí i bira hudiu, a laga Pablo prediká for di su kas. Su kas tabata keda pegá ku Snoa. Pues, Pablo a stòp di prediká na snoa i a sigui prediká na kas di Hustu. (Echo. 18:7) Pablo a sigui biba serka Akila i Priskila miéntras ku e tabata na Korinto, pero e tabata usa kas di Hustu pa hasi su trabou di prediká.

10. Kiko ta mustra ku ora Pablo a bisa ku lo e bai prediká na e hendenan di e nashonnan e no a stòp di prediká na hende hudiu i hende ku a kombertí i bira hudiu?

¹⁰ Ora Pablo a bisa ku lo el a bai prediká na hende di e nashonnan, esei no tabata ke men ku lo e no a prediká mas na hende hudiu i hende ku a kombertí i bira hudiu ku sí kier a skucha. Por ehèmpel, “Krispo, e presidente di snoa, a bira un kreyente di Señor, huntu ku tur su hendenan di kas.” Ta parse ku mas hende ku tabata bai e snoa ei tambe a bira kristian. Pasobra, Beibel ta bisa: “Hopi di e korintionan ku a tende e mensahe tambe a bira kreyente, i nan a ser batisá.” (Echo. 18:8) Pues, e kas di Titio Hustu a bira e lugá kaminda e kongregashon kristian nobo di Korinto tabata reuní. Si Lukas a skirbi e susesonan ei den órden kronológiko, manera tabata su kustumber, esei ta nifiká ku e hudiunan òf e hendenan ku a kombertí i bira hudiu a bira kristian despues ku Pablo a sagudí su pañanan. Esei ta mustra ku si un hende kier a skucha e bèrdat, Pablo tabata fleksibel i tabata dispuesto pa prediká na dje.

11. Kon Testigunan di Yehova awe ta imitá Pablo segun ku nan ta prediká na hende ku ta bisa ku nan ta kristian?

¹¹ Na hopi pais awe, e iglesianan di kristiandat ta bon establesí i tin un gara firme riba nan miembronan. Rònt mundu, e misioneronan di e iglesianan ei a traha duru pa haña mas miembro. Hopi bes, e hendenan ei ku ta bisa ku nan ta kristian ta pegá na tradishon meskos ku e hudiunan ku tabata biba na Korinto den promé siglo. Pero, meskos ku Pablo kende a yuda e hudiunan e tempu ei komprondé e Skritura, nos tambe ta hasi tur loke nos por awe pa yuda hende siña mas tokante Beibel i komprond’é mihó. Asta ora nan oponé nos òf nan lidernan religioso persiguí nos, nos ta sigui purba di yuda hende. Entre e hendenan ku “tin zelo pa sirbi Dios, ma no segun konosementu eksakto,” tin hopi hende ku ke siña e bèrdat tokante Dios i nos tin ku buska i haña e hendenan ei.​—Rom. 10:2.

“Tin Hopi Hende den e Stat Akí” (Echonan 18:9-17)

12. Ki mensahe Hesus a duna Pablo ku a fortales’é?

¹² Kisas Pablo tabatin duda si e mester a sigui prediká na Korinto. Pero, despues ku Hesus a aparesé na dje un anochi, e tabata sa kiko e mester a hasi. Hesus a bis’é: “No tene miedu. Sigui papia, i no keda ketu, pasobra ainda tin hopi hende den e stat akí ku lo kere den mi. Niun hende lo no ataká bo di tal manera ku lo bo sufri daño, pasobra mi ta ku bo.” (Echo. 18:9, 10) Hesus su mensahe a fortalesé Pablo masha hopi mes! Hesus a sigurá Pablo ku lo el a proteh’é for di su enemigunan i ku tabatin hopi hende di kurason sinsero na e stat ei ku Hesus tabata ke pa Pablo prediká na dje. Kiko Pablo a hasi despues ku el a risibí e mensahe di Hesus? Beibel ta bisa: “Pablo a keda einan un aña i seis luna, i e tabata siña e hendenan palabra di Dios.”​—Echo. 18:11.

13. Riba kiko kisas Pablo lo a kòrda segun ku e tabata aserká e lugá di huisio, i dikon e tabata sa ku lo e no a pèrdè su bida meskos ku Esteban?

¹³ Despues ku Pablo tabatin un aña na Korinto, algu a sosodé ku a konvens’é mas ainda ku Hesus tabata kuné. “E hudiunan a sera kabes kontra Pablo, i nan a hib’é e lugá di huisio.” (Echo. 18:12) Algun hende ta pensa ku e lugá di huisio ei tabata un plataforma haltu serka di e sentro di e plasa di Korinto. E tabata trahá di marmer blanku i blou i tabatin figura bunita grabá riba dje. Dilanti di e lugá di huisio tabatin sufisiente espasio pa un multitut grandi por a reuní. Algun historiadó ta pensa ku e lugá di huisio tabata djis algun stap leu for di snoa, ku tabata pegá ku e kas di Hustu. Segun ku Pablo tabata yegando serka di e lugá di huisio, kisas lo el a kòrda riba e piedramentu di Esteban, kende tabata e promé kristian ku a ser matá pasobra e tabata sigui Hesus. Pablo, ku e tempu ei tabata konosí komo Saulo, “a aprobá e asesinato di Esteban.” (Echo. 8:1) Pero, e biaha akí ta Pablo su bida tabata na peliger! Pero, Pablo no mester a preokupá, pasobra Hesus a primintié ku ningun hende lo no hasié daño.​—Echo. 18:10.

14, 15. (a) Ki akusashon e hudiunan a lanta kontra Pablo i dikon Galio no a ni trata e kaso? (b) Kiko a pasa ku Sóstenes i dikon algun hende a pensa ku el a bira kristian?

¹⁴ Kiko a sosodé ora nan a hiba Pablo na e lugá di huisio? Einan tabatin un hues ku yama Galio. E tabata gobernador di Akaya i tabata un ruman hòmber grandi di e filósofo romano Seneka. E hudiunan a lanta e siguiente akusashon kontra Pablo: “E hòmber akí ta konvensé hende pa adorá Dios na un manera ku ta kontra lei.” (Echo. 18:13) E hudiunan tabata insinuá ku Pablo a kibra lei pasobra e tabata purba di kombertí algun hudiu pa bira kristian. Sinembargo, Galio a mira ku Pablo no a kometé ningun “inhustisia,” i e no tabata kulpabel di ningun “krímen serio.” (Echo. 18:14) Galio no kier a enbolbé su mes den e pleitu i desakuerdonan di e hudiunan. Pablo no mester a ni defendé su mes, Galio a anunsiá su desishon mesora. E hudiunan tabata furioso. Nan a baha nan rabia riba Sóstenes, kende kisas a bira presidente di snoa na lugá di Krispo. Nan a gara Sóstenes, “i nan a kuminsá batié dilanti di e lugá di huisio.”​—Echo. 18:17.

¹⁵ Dikon Galio no a stòp e multitut di bati Sóstenes? Kisas Galio a pensa ku Sóstenes tabata lider di e multitut ku a ataká Pablo i ku p’esei e tabata haña loke el a meresé. Sea ku esei tabata e kaso òf nò, algu bon a sali for di e situashon. Den e promé karta ku Pablo a skirbi na e kongregashon di Korinto vários aña despues, el a referí na un ruman ku yama Sóstenes. (1 Kor. 1:1, 2) Akaso esaki tabata e mesun Sóstenes ku nan a bati na Korinto? Si esei tabata e kaso, kisas e eksperensia doloroso ei a yuda Sóstenes pa bira un kristian.

16. Kon Hesus su palabranan, “sigui papia, i no keda ketu, . . . pasobra mi ta ku bo,” ta fortalesé nos pa sigui prediká?

¹⁶ Kòrda ku despues ku e hudiunan a rechasá Pablo su mensahe, Hesus a bisa Pablo: “No tene miedu. Sigui papia, i no keda ketu, . . . pasobra mi ta ku bo.” (Echo. 18:9, 10) Ta bon pa nos tene e palabranan ei na mente, foral ora hende rechasá nos mensahe. Nunka lubidá ku Yehova por lesa kurason i ta hala hende di kurason sinsero serka dje. (1 Sám. 16:7; Huan 6:44) Sin duda, esei ta animá nos pa sigui prediká. Tur aña sientos di míles di persona ta batisá, esei ta sientos di persona tur dia! Hesus a hasi un promesa na tur esnan ku obedesé su mandamentu pa “hasi hende di tur nashon [su] disipel,” el a bisa: “Mi ta ku boso tur e dianan, te na konklushon di e era akí.”​—Mat. 28:19, 20.

“Si Yehova Ke” (Echonan 18:18-22)

17, 18. Riba kiko Pablo kisas tabata pensa ora e tabata nabegá pa bai Efeso?

¹⁷ Nos no sa si e desishon di Galio a resultá den un periodo di pas pa e kongregashon kristian nobo na Korinto. Sinembargo, “Pablo a keda basta dia mas einan” promé ku el a despedí di su rumannan na Korinto. Den lènte di aña 52 despues di Kristu, Pablo a nabegá bai Siria for di e haf di Senkrea, ku tabata keda mas o ménos 11 kilometer ost di Korinto. Promé ku Pablo a bai for di Senkrea, el “a laga kòrta su kabei chikí chikí pa motibu di un promesa solèm ku el a hasi.”c (Echo. 18:18) Despues, el a krusa Laman Egeo i nabegá bai Efeso na Asia Menor. Anto Akila i Priskila a kompañ’é.

¹⁸ Segun ku Pablo tabata nabegá bai for di Senkrea, probablemente lo e tabata pensa riba tur loke a sosodé na Korinto. E tabatin vários bunita rekuerdo i hopi motibu pa ta felis. E trabou ku el a hasi einan durante un aña i mei a duna bon resultado. E promé kongregashon kristian a ser establesí na Korinto i nan tabata reuní na kas di Hustu. Entre e hendenan ku a bira kreyente tabatin Hustu, Krispo i su hendenan di kas i hopi otro hende. Tur tabata hende ku Pablo a yuda bira kristian, pues e tabata stima nan mashá. Mas despues, Pablo a skirbi nan i a bisa nan ku nan tabata manera karta di rekomendashon skirbí riba su kurason. Nos tambe tin un amor profundo pa hende ku nos a yuda kuminsá adorá Yehova. Nos ta sinti nos masha felis ora nos ta mira e rumannan ei ku ta manera “karta di rekomendashon”!​—2 Kor. 3:1-3.

19, 20. Kiko Pablo a hasi ora el a yega Efeso, i kon nos por imitá Pablo ora nos ta pone meta spiritual?

¹⁹ Manera ku Pablo a yega Efeso, el a kuminsá prediká. El “a drenta snoa, i el a kuminsá rasoná ku e hudiunan.” (Echo. 18:19) E biaha ei Pablo no a keda largu na Efeso. Aunke nan a pidié pa keda mas tempu serka nan, “e no tabata ke.” Ora Pablo tabata yama su rumannan na Efeso ayó, el a bisa nan: “Si Yehova ke, lo mi bolbe serka boso.” (Echo. 18:20, 21) Pablo tabata sa ku ainda e mester a prediká na hopi hende mas na Efeso. Pablo tabata kier a bolbe bishitá Efeso, pero solamente si esei tabata Yehova su boluntat. Pablo a pone un bon ehèmpel pa nos imitá. Ora nos pone meta spiritual, nos ta hasi esfuerso pa por tin e sirkunstansianan korekto pa por logra nos metanan. Sinembargo, semper nos mester dependé riba Yehova su guia i hasi loke ta di akuerdo ku su boluntat.​—Sant. 4:15.

²⁰ Pablo a laga Akila ku Priskila na Efeso, i el a nabegá bai Sesarea. Ta parse ku “el a bai Herúsalèm” i a pasa kumindá e kongregashon einan. (Echo. 18:22) Despues di esei, Pablo a bolbe bèk na Antiokia di Siria, kaminda e tabata biba ora e no tabata hasi su biahenan di misionero. Su di dos biahe komo misionero a terminá i hopi kos bon a sosodé. Ban wak kiko a sosodé riba su último biahe komo misionero.