“Laga Mi Splika Kiko A Pasa”

1, 2. Dikon Pablo a bai Herúsalèm, i ki difikultat el a hañ’é kuné einan?

PABLO tabata kana den e kayanan smal di Herúsalèm ku tabata yen di hende. Pa sientos di aña, Herúsalèm tabata e sentro di adorashon di Yehova riba Tera. Hopi hende einan tabata masha orguyoso di e historia di e stat i di nan nashon. Pablo tabata sa ku ainda hopi kristian na Herúsalèm tabata pegá na Lei di Moises, i nan no tabata lihé pa aseptá e manera nobo ku Yehova tabata siñando hende pa ador’é. Pues, ora Pablo tabata na Efeso, el a plania pa bai bèk Herúsalèm pa yuda e kristiannan einan. E no kier a djis hiba plaka pa e rumannan na Herúsalèm, e kier a yuda nan korigí nan manera di pensa tambe. (Echo. 19:21) Pablo a bai Herúsalèm aunke esei por tabata masha peligroso p’e.

² Pablo a hañ’é ku hopi difikultat na Herúsalèm. Algun di e rumannan na Herúsalèm a kere rumornan falsu tokante Pablo. Anto e hendenan ku tabata odia Hesus, a kousa asta mas problema pa Pablo. Nan a lanta akusashon falsu kontra dje, batié i menasá pa mat’é. Pero, e situashonnan ei a duna Pablo un oportunidat pa defendé su fe. Pablo a demostrá humildat, kurashi i fe ora el a trata ku e situashonnan difísil ei, i su ehèmpel por siña nos kon pa hasi meskos.

“Nan A Alabá Dios” (Echonan 21:18-20a)

3-5. (a) Ku ken Pablo a reuní na Herúsalèm i tokante kiko nan a papia? (b) Ki lès nos por siña for di e reunion ku Pablo tabatin ku e ansianonan na Herúsalèm?

³ E dia despues ku Pablo i su kompañeronan a yega Herúsalèm, nan a bai serka e ansianonan responsabel di e kongregashon. Ningun di e otro apòstelnan ku tabata na bida no a ser menshoná den e relato. Kisas nan a bai prediká na otro parti di mundu. Sinembargo, Santiago, ruman hòmber di Hesus, ainda tabata einan. (Gal. 2:9) Ora “tur e ansianonan” a reuní ku Pablo, ta parse ku Santiago a dirigí e reunion.​—Echo. 21:18.

⁴ Pablo a kumindá e ansianonan, “i el a konta nan tur e kosnan ku Dios a hasi entre hende di e nashonnan pa medio di e trabou di prediká.” (Echo. 21:19) Sin duda, lo tabata hopi animante pa e rumannan skucha su eksperensianan. Awe tambe, nos ta keda masha kontentu ora nos skucha e bon resultado di e trabou di prediká na otro pais.​—Pro. 25:25.

⁵ Na dado momento, Pablo mester a menshoná e kontribushonnan ku el a trese for di Europa. Sin duda, e rumannan lo tabata masha kontentu i gradisidu pa sa ku nan rumannan na pais leu tabata preokupá pa nan. Ora e rumannan a kaba di skucha Pablo, Beibel ta bisa: “Nan [e ansianonan] a alabá Dios”! (Echo. 21:20a) Di mes manera, nos rumannan awe ku ta pasa den desaster natural òf ku ta sufri di problema di salú serio ta masha kontentu i gradisidu ora nan rumannan duna nan yudansa i animashon na e debido tempu.

Ainda Hopi Ruman Tabata “Kumpli Fielmente ku Lei” (Echonan 21:20b, 21)

6. Ki problema e rumannan a konta Pablo di dje?

⁶ E ora ei, e ansianonan a bisa Pablo ku e rumannan na Hudea tabatin problema ku algu ku nan a skucha tokante Pablo. Nan a bisa: “Ruman, bo mes ta mira ku míles di hudiu a bira kreyente, i nan tur ta kumpli fielmente ku Lei. Pero nan a tende un rumor ku bo ta siña tur e hudiunan ku ta biba entre hende di e nashonnan pa nan legumai Lei di Moises. Sí, nan a tende ku bo ta bisa e hudiunan ei pa no sirkunsidá nan yunan ni sigui e kustumbernan di e hudiunan.”a​—Echo. 21:20b, 21.

7, 8. (a) Ki punto di bista robes hopi kristian na Hudea tabatin? (b) Dikon e komprondementu robes di algun kristian hudiu no a kita ku nan tabata kristiannan fiel?

⁷ Dikon tabatin asina tantu kristian ku ainda tabata insistí pa sigui Lei di Moises, aunke ku mas ku 20 aña a pasa desde ku e Lei a ser eliminá? (Kol. 2:14) Na aña 49 despues di Kristu, e apòstelnan i e ansianonan ku a reuní na Herúsalèm a manda un karta pa e kongregashonnan pa splika nan ku e kristiannan ku no tabata hudiu no mester a sirkunsidá ni sigui Lei di Moises. (Echo. 15:23-29) Sinembargo, e karta no a menshoná e kristiannan ku tabata hudiu, anto hopi di nan no a komprondé ku nan no mester a sigui Lei di Moises mas.

⁸ Aunke ku e kristiannan ei no tabatin un komprondementu korekto di e asuntu, esei no a kita ku nan tabata kristiannan fiel. No ta komo si fuera ántes nan tabata adorá dios falsu anto awor nan a bai bèk na nan kreensianan di ántes. E Lei ku tabata asina importante pa e kristiannan hudiu a bini di Yehova. E Lei no tabatin nada aden ku tabata robes òf ku tabatin di haber ku demoño. Pero, e Lei ei tabatin di haber ku e pakto bieu, i e kristiannan e tempu ei tabata bou di e pakto nobo. Pues, Yehova no tabata rekerí mas pa nan obedesé e Lei komo parti di nan adorashon na dje. E kristiannan hudiu ku a keda insistí ku hende mester a sigui e Lei no tabata konfia Yehova su areglo nobo di adorashon. P’esei, nan mester a kambia nan manera di pensa i adaptá na e kambionan ku Yehova tabata hasiendo.b​—Yer. 31:31-34; Luk. 22:20.

“E Rumornan Ku Nan A Tende . . . No Ta Bèrdat” (Echonan 21:22-26)

9. Kiko Pablo tabata siña hende relashoná ku Lei di Moises?

⁹ E rumannan a skucha un rumor ku Pablo tabata siña e hudiunan ku tabata biba entre hende di e nashonnan pa “no sirkunsidá nan yunan ni sigui e kustumbernan di e hudiunan.” Pablo tabata prediká e bon notisia na hende ku no tabata hudiu, i na armonia ku e guia di kuerpo gobernante, e tabata splika nan ku nan no mester a sigui Lei di Moises. Ademas, el a mustra tambe ku no tabata korekto pa e kristiannan hudiu insistí ku e kristiannan ku no tabata hudiu mester a sirkunsidá i sigui Lei di Moises. (Gal. 5:1-7) Pablo tabata prediká e bon notisia tambe na e hudiunan den e statnan ku e tabata bishitá. Sin duda, lo el a splika e hudiunan ku tabata skuch’é ku Hesus su morto a pone un fin na e Lei i ku Dios no tabata ferwagt mas pa hende sigui e Lei pa ser konsiderá hustu.​—Rom. 2:28, 29; 3:21-26.

10. Ki punto di bista balansá Pablo tabatin relashoná ku e Lei i sirkunsishon?

¹⁰ Sinembargo, Pablo no a kritiká esnan ku a tuma desishon personal pa sigui ku algun tradishon hudiu, manera no traha riba sabat òf no kome sierto tipo di kuminda. (Rom. 14:1-6) Anto, e no a pone niun regla relashoná ku sirkunsishon. De echo, Pablo a pidi Timoteo pa sirkunsidá, pasobra Pablo no tabata ke pa e hudiunan rechasá Timoteo komo ku nan tabata sa ku su tata ta griego. (Echo. 16:3) Sirkunsishon tabata un desishon personal. Pablo a bisa e galationan: “Ni sirkunsishon ni insirkunsishon no ta bal nada, ma fe ku ta obra ku amor sí tin balor.” (Gal. 5:6) Sinembargo, tabata robes pa un persona sirkunsidá pa asina sigui Lei di Moises. Ademas, tabata robes tambe pa bisa ku un hende mester a sirkunsidá pa asina e por haña Yehova su aprobashon. De echo, esei lo a demostrá un falta di fe.

11. Kiko e ansianonan a bisa Pablo pa hasi, pero kiko lo e no a hasi? (Wak e nota tambe.)

¹¹ Pues, aunke e rumornan ku e rumannan a skucha tokante Pablo no tabata bèrdat, nan a afektá e kristiannan hudiu. Pa e motibu ei, e ansianonan a bisa Pablo pa hasi lo siguiente: “Tin kuater hòmber akinan ku a hasi un promesa solèm. Bai ku nan; purifiká bo mes huntu ku nan, i paga nan gastunan pa nan por feita nan kabes. Asina, tur hende lo sa ku e rumornan ku nan a tende tokante bo no ta bèrdat. Nan lo sa ku bo ta komportá bo na un manera korekto, i ku bo mes tambe ta kumpli ku Lei.”c​—Echo. 21:23, 24.

12. Kon Pablo a mustra ku e tabata fleksibel i dispuesto pa kooperá ku e ansianonan?

¹² Pablo por a bisa ku e problema no tabata e rumornan tokante dje, sino e echo ku e kristiannan hudiu tabata insistí ku ainda nan mester a sigui Lei di Moises. Pero, e tabata dispuesto pa ta fleksibel, tanten ku e no mester a bai kontra di Dios su prinsipionan. Mas promé el a skirbi: “Pa esnan bou di lei, mi a bira manera un hende bou di lei, pa mi por gana esnan ku ta bou di lei, aunke mi mes no ta bou di lei.” (1 Kor. 9:20) Pablo a hasi loke e ansianonan a pidié pa hasi, i na e okashon ei, el a bira “manera un hende bou di lei.” Pablo a pone un bon ehèmpel pa nos awe. Nos tambe mester kooperá ku e ansianonan i no insistí pa hasi kos manera nos ke.​—Heb. 13:17.

“E No Meresé di Ta na Bida!” (Echonan 21:27–22:30)

13. (a) Dikon algun hudiu a lanta kontra di Pablo den e tèmpel? (b) Kiko a salba Pablo su bida?

¹³ Pero, un otro problema a surgi na e tèmpel. Ora ku e momento a yega pa e kuater hòmbernan kaba di kumpli ku nan promesa solèm, algun hudiu di Asia a mira Pablo i a akus’é falsamente di trese hende ku no tabata hudiu na e tèmpel. Anto nan a kuminsá instigá e hendenan pa lanta kontra Pablo. Si e komandante militar romano lo no a intervení, nan lo a bati Pablo te mat’é. En bes di esei, e komandante militar a bisa su sòldánan pa arestá Pablo. For di e dia ei, lo a tuma mas ku kuater aña pa Pablo haña su libertat. Pero ainda Pablo su bida tabata na peliger. Ora e komandante a puntra e hudiunan dikon nan tabata ataká Pablo, e multitut a kuminsá grita diferente akusashon. Komo ku e hendenan tabata hasi asina tantu desòrdu, e komandante no por a saka afó kiko nan tabata bisa. Na dado momento, e sòldánan a haña nan ta karga Pablo pa bai kuné for di einan, pasobra e multitut a bira hopi violento. Ora Pablo i e sòldánan romano tabata kla pa drenta kazèrne, Pablo a bisa e komandante: “Por fabor, permití mi papia ku e pueblo.” (Echo. 21:39) E komandante a bai di akuerdo, i Pablo a bai defendé su fe ku kurashi.

14, 15. (a) Kiko Pablo a splika e hudiunan? (b) Kiko e komandante romano a hasi pa haña sa dikon e hudiunan tabata asina rabiá ku Pablo?

¹⁴ Pablo a kuminsá su defensa ku e palabranan akí: “Laga mi splika kiko a pasa.” (Echo. 22:1) Pablo a papia ku e multitut na hebreo, i esei a kalma nan. El a duna nan un bon splikashon dikon el a bira un disipel di Kristu. Pablo a usa takto, i el a papia di kos ku e hudiunan por a verifiká si nan tabata ke. Pablo a ser eduká pa Gamaliel, un maestro famoso. Ademas, el a persiguí e siguidónan di Kristu, manera algun hende presente probablemente tabata sa. Sinembargo, na kaminda pa Damasko, el a haña un vishon di Kristu kende a resusitá. Anto Kristu a papia kuné. E hòmbernan ku tabata biaha huntu ku Pablo a mira e lus i skucha un stèm, pero nan no a komprondé loke e stèm tabata bisa. (Echo. 9:7; 22:9) Despues, komo ku Pablo no por a mira nada mas, e hendenan ku tabata biaha huntu kuné mester a lei e hib’é Damasko. Einan, Ananías, un hòmber ku e hudiunan den e área ei lo tabata konosé, a duna Pablo su bista bèk.

¹⁵ Ademas, Pablo a bisa nan ku ora el a bai Herúsalèm bèk, Hesus a aparesé na dje den un vishon ora e tabata den tèmpel. Ora e hudiunan a skucha esei, nan a rabia mashá i nan a kuminsá grita: “Kaba ku e hòmber ei, pasobra e no meresé di ta na bida!” (Echo. 22:22) Pa salba Pablo, e komandante a laga e sòldánan hib’é kazèrne. Komo ku e komandante tabata kier a sa dikon e hudiunan tabata asina rabiá ku Pablo, el a duna e sòldánan òrdu pa suta Pablo ku zuip pa asina haña sa kiko el a hasi. Sinembargo, ora e sòldánan a mar’é pa sut’é ku zuip, Pablo a bisa nan ku e tabata un siudadano romano, i el a puntra nan si nan tabatin mag di sut’é bou di lei romano. Awe tambe, Testigunan di Yehova ta hasi uso di diferente lei pa defendé nan fe. (Wak e kuadronan “Lei Romano i Siudadania Romano” i “Defendiendo Nos Derecho di Prediká e Bon Notisia.”) Ora e komandante a tende ku Pablo tabata un siudadano romano, el a realisá ku e mester a buska un otro manera pa haña mas informashon. E siguiente dia, e komandante a duna òrdu pa henter Korte Supremo Hudiu reuní pa haña sa di kiko Pablo a ser akusá.

“Fariseo Mi Ta” (Echonan 23:1-10)

16, 17. (a) Deskribí kiko a sosodé ora Pablo a papia dilanti di Korte Supremo Hudiu. (b) Ora nan a dal Pablo, kon el a demostrá ku e ta humilde?

¹⁶ Pablo a kuminsá su defensa dilanti di Korte Supremo Hudiu ku e siguiente palabranan: “Rumannan, semper mi a biba ku un konsenshi kompletamente limpi dilanti di Dios.” (Echo. 23:1) E no a logra bisa nada mas. E relato ta bisa: “Ora Sumo Saserdote Ananías a tende esei, el a duna e hendenan ku tabata pará banda di Pablo òrdu pa dal e den su boka.” (Echo. 23:2) Esei sí tabata un insulto! Esei ta mustra tambe ku e sumo saserdote tabatin prehuisio, pasobra el a konsiderá Pablo un gañadó promé ku Pablo por a defendé su mes! P’esei Pablo a bis’é: “Dios ta bai dal abo, hipókrita! Kon por ta ku bo ta sinta einan pa husga mi segun Lei i, na mes momento, bo ta kibra Lei dunando òrdu pa dal mi?”​—Echo. 23:3.

¹⁷ Algun di e hendenan ku tabata presente a keda di shòk! No pa motibu di loke a pasa, sino pa motibu di loke Pablo a bisa. Nan a puntra Pablo: “Bo ta tribi di insultá sumo saserdote?” Mesora Pablo a demostrá humildat i rèspèt pa Lei. El a bisa: “Rumannan, mi no tabata sa ku e ta sumo saserdote. Pasobra ta pará skirbí: ‘No insultá niun lider di bo pueblo.’”d (Echo. 23:4, 5; Éks. 22:28) E ora ei, Pablo a kuminsá rasoná ku nan na un otro manera. Komo ku Pablo tabata sa ku Korte Supremo Hudiu tabata konsistí di fariseo i saduseo, el a bisa: “Rumannan, fariseo mi ta, sí, yu di fariseo! Mi ta ser husgá pasobra mi ta kere den resurekshon di e mortonan.”​—Echo. 23:6.

18. Dikon Pablo a yama su mes un fariseo, i kon nos por rasoná na un manera similar den algun sirkunstansia?

¹⁸ Dikon Pablo a bisa ku e tabata un fariseo? Pasobra e tabata “yu di fariseo,” esta, el a bini for di un famia ku tabata pertenesé na e sekta ei. Pues, ainda hopi hende lo a konsider’é un fariseo.e Pero, kon Pablo por a yama su mes un fariseo si e fariseonan tabatin kreensia robes tokante e resurekshon? Ta parse ku e fariseonan tabata kere ku e alma di un persona tabata sigui biba despues ku e muri, i ku alma di hende hustu lo bolbe bai den un otro kurpa humano. Pablo no tabata kere den e siñansanan ei. E tabata kere den e resurekshon ku Hesus a siña hende di dje. (Huan 5:25-29) Pero tabatin un punto ku Pablo i e fariseonan tabata di akuerdo kuné, esta, ku tabatin un speransa pa bida despues di morto. Esei tabata kontrali na e saduseonan, kendenan no tabata kere ku tabatin bida despues di morto. Nos tambe por rasoná na e manera ei ora nos ta papia ku hende ku ta katóliko òf protestant. Nos por bisa nan ku nos tambe ta kere den Dios. Ta bèrdat ku nan ta kere den Trinidat, miéntras ku nos ta kere den e Dios ku Beibel ta papia di dje. Pero, nos tin un base en komun ku nan, esta, ku tin un Dios.

19. Dikon e reunion di Korte Supremo Hudiu a kaba den diskushon?

¹⁹ Loke Pablo a bisa a kousa un divishon entre e miembronan di Korte Supremo Hudiu. E relato ta bisa: “Un bochincha di otro mundu a kuminsá. Anto algun eskriba ku tabata fariseo a lanta para i kuminsá protestá fuertemente. Nan tabata bisa: ‘Nos no ta haña nada malu den e hòmber akí. Kiko si ta un spiritu òf un angel a papia kuné?’” (Echo. 23:9) E saduseonan no tabata kere den angel, pues ora nan a skucha esei, nan a bira furioso! (Wak e kuadro “E Saduseonan i e Fariseonan.”) E diskushon a bira asina fuerte, ku atrobe e komandante militar mester a salba Pablo. (Echo. 23:10) Pero, ainda Pablo su bida tabata na peliger. Kiko lo a pasa ku Pablo awor? Nos lo haña sa mas den e siguiente kapítulo.