Pregunta di Lektor

Apòstel Pablo a komprometé su fe kristian ora el a bisa dilanti e Konsilio: “Mi ta un fariseo”?

Pa nos komprondé Pablo su deklarashon na Echonan 23:6, nos tin ku analisá su konteksto.

Despues ku un grupo di hudiu hostiná a ataká Pablo na Yerusalèm, el a papia ku e multitut. El a menshoná ku el a wòrdu ‘eduká na Yerusalèm na pia di Gamaliel, estriktamente segun e Lei di nan tatanan.’ E multitut a skucha su defensa un ratu, pero ora ku nan a bira furioso kontra dje, e komandante militar ku tabata eskoltá Pablo a hib’é kazèrne. Djis promé ku nan tabata bai suta Pablo, el a bisa: “Lei ta permití boso suta un hòmber ku ta un romano i ku no a wòrdu kondená?”—Echonan 21:27–22:29.

E siguiente dia, e komandante a hiba Pablo dilanti e Konsilio, esta, e korte supremo hudiu. Ora Pablo a fiha su atenshon riba e Konsilio, el a ripará ku esaki tabata konsistí di saduseo ku fariseo. E ora ei el a bisa nan: “Rumannan, mi ta un fariseo, yu di fariseonan; mi ta wòrdu husgá pa motibu di e speransa [di] resurekshon di e mortonan!” Dor di esei a surgi un diskushon fuerte entre e fariseonan i e saduseonan, “pasobra e saduseonan [tabata] bisa ku no tin resurekshon, ni angel, ni spiritu; ma e fariseonan [tabata] kere den tur dos.” Algun hende ku tabata pertenesé na e sekta di e fariseonan a diskutí fuertemente, bisando: “Nos no ta haña nada malu den e hòmber aki.”—Echonan 23:6-10.

Ya ku Pablo tabata konosí komo un kristian masha seloso, tabata imposibel p’e konvensé e Konsilio ku e tabata un miembro aktivo di e fariseonan. E fariseonan presente lo no a aseptá ningun hende ku no a kere tur nan siñansanan. Pues ora Pablo a bisa ku e ta un fariseo, esei no tabata den e sentido estrikto di e palabra, i e fariseonan presente lo no a komprondé Pablo su palabranan asina tampoko.

Ora Pablo a bisa ku el a wòrdu husgá pa motibu di e speransa di resurekshon di e mortonan, e tabata ke men bon kla ku ta den e sentido aki e tabata manera e fariseonan. Den kualke kontroversia riba e tema aki, Pablo tabata na banda di e fariseonan i no e saduseonan, kendenan no tabata kere den e resurekshon.

Pablo su kreensianan kristian no a bai kontra e kreensianan di e fariseonan riba asuntunan manera e resurekshon, angelnan i algun punto di e Lei. (Filipensenan 3:5) Pues denter di e límitenan aki, Pablo por a identifiká su mes ku e fariseonan, i tabata den e sentido limitá aki e presentenan di e Konsilio a komprondé su palabranan. Den e forma ei e tabata usando su background pa trata ku e korte supremo hudiu den kua a eksistí bastante prehuisio.

Sin embargo, e evidensia prinsipal ku Pablo no a komprometé su fe ta e echo ku el a keda ku Yehova su aprobashon. E anochi despues ku Pablo a hasi e deklarashon en kuestion, Hesus a bis’é: “Tene kurashi, pasobra meskos ku bo a duna testimonio di mi kousa na Yerusalèm, asina bo tin ku duna testimonio na Roma tambe.” Ya ku Pablo tabatin e aprobashon di Dios, nos tin ku konkluí ku Pablo no a komprometé su fe kristian.—Echonan 23:11.