Sirbidó Ministerial Ta Hasi un Trabou Balioso

DEN Apòstel Pablo su karta na e kongregashon di Filipo, el a skirbi: “Esaki ta un karta di Pablo i Timoteo, esklabonan di Kristu Hesus, na tur e santunan den union ku Kristu Hesus ku ta na Filipo, i tambe na e superintendentenan i sirbidónan ministerial.” (Flp. 1:1) Ripará bon ku den su saludo na e kongregashon el a inkluí e sirbidónan ministerial. Ta bisto ku e hòmbernan ei tabata un gran yudansa pa e ansianonan i a hunga un papel importante den e kongregashon di e tempu ayá. Meskos ta e kaso awe. Sirbidó ministerial ta yuda e ansianonan kumpli ku e tareanan ku ta yuda mantené òrdu den kongregashon.

² Bo sa ken ta e sirbidónan ministerial di bo kongregashon? Bo sa ki ta e trabounan ku nan ta hasi na bienestar di abo i henter e kongregashon? Yehova tin hopi apresio pa e trabou di e rumannan akí. Pablo a skirbi: “E hendenan ku ta sirbi na un manera ekselente ta haña un bon reputashon i por papia ku gran frankesa tokante nan fe den Kristu Hesus.”—1 Tim. 3:13.

REKISITO BÍBLIKO PA BIRA SIRBIDÓ MINISTERIAL

³ Un sirbidó ministerial mester tin un bida kristian sano, i e mester ta un persona responsabel ku ta sòru bon pa su asignashonnan. Nos ta komprondé esaki ora nos lesa loke Pablo a skirbi den su karta na Timoteo, bisando: “Sirbidónan ministerial mester ta hende serio, ku no tin dos lenga, ku no ta bebe muchu biña, ku no ta golos pa ganashi desonesto, ma ku ta pega fielmente na e sekreto sagrado di e fe ku un konsenshi limpi. Ademas, laga tèst e hòmbernan akí promé pa wak si nan ta apto; anto si nan ta liber di akusashon, laga nan sirbi komo sirbidó. Laga sirbidónan ministerial ta esposo di ún esposa, ku ta dirigí nan yunan i nan kas na un manera ekselente.” (1 Tim. 3:8-10, 12) Si e kongregashon pega na e normanan moral haltu pa sirbidó ministerial, hende lo no por lanta niun akusashon kontra di e rumannan den puesto di responsabilidat.

⁴ Sin importá nan edat, sirbidó ministerial ta traha aktivamente den sirbishi tur luna. Nan ta imitá Hesus i ta partisipá ku entusiasmo den e trabou di prediká. Di e manera ei, nan ta reflehá e interes ku Yehova tin pa salba humanidat.—Isa. 9:7.

⁵ Ruman hòmber ku ta sirbidó ministerial ta pone bon ehèmpel tambe den nan forma di bisti, nan aparensia, abla, aktitut i komportashon. Nan ta demostrá sano huisio, i p’esei e rumannan ta respetá nan. Ademas, nan ta demostrá den nan bida ku nan relashon ku Yehova i nan privilegio den kongregashon ta masha importante pa nan.—Tito 2:2, 6-8.

⁶ E rumannan akí a pasa e tèst “pa wak si nan ta apto.” Asta promé ku nan a haña e asignashon, nan a demostrá ku nan ta hòmber diligente, ku a pone interes di Reino na promé lugá den nan bida. Nan ta kla pa aseptá kualke privilegio ku nan haña. Di bèrdat nan ta bon ehèmpel pa otro hende den kongregashon imitá.—1 Tim. 3:10.

KI TRABOU NAN TA HASI DEN KONGREGASHON?

⁷ Sirbidó ministerial ta duna yudansa práktiko ku ta benefisiá nan rumannan. Nan ta kumpli ku un variedat di tarea, i asina e ansianonan ta sobra mas tempu pa kumpli ku nan responsabilidat di instruí i pastoriá e tou. I ora e kuerpo di ansiano ta duna nan asignashon, nan ta tene kuenta ku e abilidat i kapasidat di e sirbidónan ministerial i tambe ku e nesesidat di e kongregashon.

⁸ Laga nos wak algun di e asignashonnan ei. Por ehèmpel, un sirbidó ministerial ta haña e asignashon di atendé ku literatura di manera ku nos por tin literatura pa uso personal i pa sirbishi. Tin sirbidó ministerial ku ta haña e tarea di atendé ku kuenta di kongregashon òf atendé ku teritorio. Ademas, tin e tareanan di traha ku mikrofon, atendé ku ekipo di zonido, traha komo ùsher i hopi otro manera mas pa yuda e ansianonan. Tin hopi trabou di hasi den mantenshon i limpiesa di e Salòn di Reino, i hopi bes ta pidi e sirbidónan ministerial pa yuda ku e responsabilidatnan ei.

⁹ Den algun kongregashon ta posibel pa asigná un sirbidó ministerial pa kada un di e tareanan ei. Den otro kongregashon kisas un sirbidó ministerial ta kumpli ku vários asignashon. Asta por sosodé ku diferente sirbidó ministerial ta yuda ku un tarea spesífiko. Si no tin sufisiente sirbidó ministerial pa kumpli ku tur e responsabilidatnan ku tin, e kuerpo di ansiano por pidi ruman hòmber batisá ku ta ehemplar pa yuda ku e trabounan. Di e manera ei, nan por haña eksperensia ku lo yuda nan mas despues ora nan kualifiká pa bira sirbidó ministerial. Si no tin ruman hòmber disponibel, un ruman muhé ehemplar por haña e enkargo pa yuda ku algun tarea, aunke mas ku klaru, lo e no ser nombrá komo sirbidó ministerial. Un ruman ku ta ehemplar ta un persona ku ta deboto, kende su kondukta ta bale la pena imitá. Su asistensia na e reunionnan, partisipashon den sirbishi, bida di famia, rekreo ku e ta skohe, forma di bisti i tambe su aparensia ta un bon ehèmpel pa otro ruman.

¹⁰ Den kongregashon kaminda tin masha poko ansiano por laga un sirbidó ministerial kapas repasá e preguntanan di boutismo tokante doktrina ku e kandidatonan. E preguntanan akí ta den e Apèndiks “Parti 1—Kreensia Kristian.” E sekshon “Parti 2—Bida Kristian” ta trata asuntu personal delikado, i p’esei un ansiano mester trata e parti akí.

¹¹ Si tin bon motibu, e kuerpo di ansiano por kambia asignashon di e sirbidónan ministerial kada tantu tempu. Sinembargo, lo ta mas probechoso pa un ruman keda ku e mesun asignashon pa un tempu mas largu di manera ku e por haña mas eksperensia den e trabou ei.

¹² Di akuerdo ku sirkunstansia di e kongregashon, kisas tin otro responsabilidat ku por duna e sirbidónan ministerial, kende nan progreso ta bisto pa “tur hende.” (1 Tim. 4:15) Si no tin sufisiente ansiano, un sirbidó ministerial por fungi komo asistènt di e superintendente di grupo òf, den algun kaso, komo un sirbidó di grupo, trahando bou di estrecho supervishon di e ansianonan. Sirbidó ministerial por duna diskurso públiko i tambe parti den e reunion Nos Bida i Sirbishi Kristian, i si ta nesesario, dirigí Estudio di Beibel di Kongregashon. Ademas, nan por haña otro privilegio na momento ku tin un nesesidat partikular, i si nan ta kumpli ku e rekisitonan pa e asignashon. (1 Ped. 4:10) Sirbidó ministerial ku ta yuda e ansianonan ta hasi esei di buena gana.

¹³ Aunke e tarea di un sirbidó ministerial ta diferente for di esun di un ansiano, nan trabou tambe ta sirbishi sagrado na Dios i ta esensial pa e kongregashon por funshoná bon. Ku tempu, si un sirbidó ministerial ta kumpli debidamente ku su obligashonnan i ta kualifiká pa sirbi komo un bon maestro i wardadó, e por ser rekomendá pa bira ansiano.

¹⁴ Si bo ta un hóben òf a kaba di batisá, bo ta hasiendo esfuerso pa kualifiká pa bira sirbidó ministerial? (1 Tim. 3:1) Kada aña hopi hende ta drenta e bèrdat, i p’esei tin mester di mas ruman hòmber kualifiká pa asumí responsabilidat den kongregashon. Bo por hasi esfuerso pa kultivá e deseo di yuda otro hende. Si bo meditá riba e ehèmpel ekselente di Hesus, esei lo yuda bo kultivá e deseo ei. (Mat. 20:28; Huan 4:6, 7; 13:4, 5) Bo deseo lo sigui krese segun ku bo ta eksperensiá e goso ku ta bini di duna. (Echo. 20:35) Pues, ofresé bo mes pa duna yudansa práktiko na otro hende, pa yuda ku mantenshon di e Salòn di Reino òf pa duna un di e partinan pa studiante den e reunion di Nos Bida i Sirbishi Kristian ora tin mester. Ta importante tambe pa bo tin un bon programa di estudio personal ku ta yuda bo keda spiritualmente fuerte. (Sal. 1:1, 2; Gal. 5:22, 23) Ademas, si bo ta hasi esfuerso pa progresá, demostrá di ta un persona fiel i konfiabel ora bo haña asignashon den kongregashon.—1 Kor. 4:2.

¹⁵ Sirbidó ministerial ta ser nombrá pa medio di spiritu santu pa benefisio di e kongregashon. Henter e kongregashon por kooperá ku e sirbidónan ministerial ora nan ta kumpli ku nan asignashon, i asina mustra gratitut pa e trabou duru ku nan ta hasi. Di e manera akí, tur ruman por mustra apresio pa e provishon ei di Yehova pa mantené òrdu den kongregashon.—Gal. 6:10.