Manteniendo Armonia

Entre Anciano i Sirbidor Ministerial

DJIS despues di Pentecoste 33 E.C., a surgi un situacion di emergencia den e congregacion cristian recien formá. Un areglo a ser establecé pa percurá p’e biudanan den necesidad. Pero despues di poco tempu “a lanta un murmuracion di parti dje hudiunan di abla griego contra e hudiunan di abla hebreo, pasobra nan biudanan a ser pasá por haltu den e distribucion diario.”​—⁠Echo 6:⁠1.

E kehonan aki a yega na orea dje apostelnan. “Pues e diesdosnan a yama e multitud dje disipelnan cerca nan i a bisa: ‘No ta agradabel pa nos bandoná e palabra di Dios pa distribuí cuminda n’e mesanan. Pues, rumannan, busca pa boso mes siete homber acreditá di den boso, yen di spiritu i sabiduria, pa nos por nombra nan riba e asuntu necesario aki.’ ”​—⁠Echo 6:​2, 3.

Esaki ta ilustrá un principio importante di organisacion den e congregacion cristian. Algun homber responsabel ta ser usá pa percurá pa asuntunan rutinario, miéntras otronan ta percurá pa asuntunan spiritual di mas peso. Den pasado tabatin algu similar. Den Israel di antigua, Aron i su desendientenan a ser nombrá pa sirbi como sacerdote pa haci sacrificio na Dios. Sin embargo, Jehova a manda p’e levitanan yuda nan dor di ‘percurá pa tur e hermentnan dje tent di reunion.’ (Número 3:​5-10) Di igual manera, superintendentenan awe ta ser yudá dor di sirbidornan ministerial.

E Papel di Anciano i Sirbidor Ministerial

E Scritura ta describí cualificacionnan haltu pa tantu anciano como sirbidor ministerial. (1 Timoteo 3:​1-10, 12, 13; Tito 1:​6-9) Nan no ta competidornan sino ta traha p’e mésun meta​—⁠e edificacion dje congregacion. (Compará cu Efesio 4:​11-13.) No obstante, tin algun diferencia den e trabou cu nan ta efectuá den e congregacion. Promé Pedro 5:2 ta bisa na superintendentenan: “Pastoreá e tou di Dios bou di boso cuido, no como obligá, sino cu bon gana; tampoco pa amor pa ganashi desonesto, sino cu empeño.” Nan ta rindi cuenta na Dios pa e manera cu nan ta cumpli cu e encargo sagrado aki.​—⁠Hebreo 13:⁠17.

Kico di sirbidornan ministerial? E Scritura no ta rekerí pa nan ta mes cualificá den nan abilidad di siña. Nan tareanan ta un tiki diferente for di esnan di ancianonan. Den e promé siglo E.C., sin duda tabatin hopi cos di un caracter material, rutinario of mecánico cu a rekerí atencion, talbes incluyendo e compra di material pa copiamentu dje Scritura of asta haci e copiamentu mes.

Awe, sirbidornan ministerial ta sigui cumpli cu un variedad di tarea importante den e congregacion, manera percurá pa cuenta di congregacion i teritorio, distribuí revista i buki i mantené e Salon di Reino. Algun sirbidor ministerial cu tin e abilidad asta por ser usá den siñamentu, tin biaha conduciendo Studio di Buki di Congregacion, duna parti den Reunion di Sirbishi i pronunciá discurso público.

Ora anciano i sirbidor ministerial ta traha huntu armoniosamente, e necesidadnan dje congregacion​—⁠tantu spiritual como organisacional​—⁠ta ser atendé den un manera balansá. Miembronan dje congregacion e ora ei ta gososo, fuerte i spiritualmente productivo. Corda loke Pablo a skirbi na esnan ungí den Efeso: “Dor di ser armoniosamente uní i trahá pa cooperá mediante tur djoint cu ta duna loke ta necesario, segun e funcionamentu di cada miembro respectivo n’e debido midí, ta contribuí n’e crecementu dje curpa p’e edificacion di su mes den amor.”​—⁠Efesio 4:⁠16.

Anciano i sirbidor ministerial mester forsa pa desaroyá un armonia similar, esta, acuerdo, combenio, cooperacion i unidad. Sin embargo, un armonia asina no ta ser realisá automáticamente. E mester ser cultivá i protehá cuidadosamente.

Loke Ancianonan Por Haci

Un paso importante ta pa reconocé cu e relacion di un anciano cu un sirbidor ministerial no ta di un doño cu un esclabo of un doño di trabou cu un empleado. Caminda tin berdadero armonia, ancianonan ta mira sirbidornan ministerial como co-ministernan di Dios. (Compará cu 1 Corintio 3:​6-9.) “Den mustra onor un na otro hiba delantera,” Romano 12:10 ta bisa. P’esei ancianonan ta evitá di trata sirbidornan ministerial den maneranan cu por parce di rebahá i humiyá nan. Nan ta animá, en bes di kibra, iniciativa sano. Tratando sirbidornan ministerial cu respet tin tendencia di saca e mihó cualidadnan den nan i ta yuda nan disfrutá di nan trabou den e congregacion.

Tambe ancianonan mester tene na mente cu nan comision di pastoreá e tou di Dios bou di nan cuido ta incluí e rumannan cu ta sirbi como sirbidor ministerial. Ta cierto cu tal hombernan responsabel lo mester ta cristiannan maduro. No obstante, mescos cu e resto dje tou, nan tin necesidad di atencion personal de bes en cuando. Ancianonan mester ta sinceramente interesá den nan desaroyo spiritual.

Por ehempel, ora apostel Pablo a topa e hóben Timoteo, el a capta mesora e potencial di Timoteo i a “expresá e deseo p’e homber aki bai cuné.” (Echo 16:⁠3) Timoteo a sirbi como Pablo su compañé di biahe, ricibiendo entrenamentu balioso como resultado. Sí, añanan despues Pablo por a skirbi e cristiannan na Corinto: “Mi ta manda Timoteo pa boso, pasobra e ta mi yu stimá i fiel den Señor; i lo e pone boso corda mi métodonan en relacion cu Cristo Jesus”!​—⁠1 Corintio 4:⁠17.

Ancianonan, boso a cuminsá haci uso dje pleno potencial dje sirbidornan ministerial den boso congregacion? Boso ta yuda nan progresá dor di duna nan entrenamentu personal den papiamentu público i investigacion di Bijbel? Boso a invitá esnan cu ta cualificá pa compañá boso na bishitanan di pastoreo? Boso ta traha cu nan den e ministerio di veld? Den Jesus su comparacion dje talentonan, e doño a bisa su fiel sirbidornan: “Bon hací, esclabo bon i fiel!” (Mateo 25:23) Boso ta generoso den e mésun manera dunando elogio i encomendacion na sirbidornan ministerial kendenan modestamente ta cumpli cu nan asignacionnan den un manera excelente? (Compará cu Proverbio 3:27.) Si no, nan lo sinti cu nan trabou no ta ser apreciá?

Comunicacion di igual manera ta vital pa un relacion di trabou armonioso. (Compará cu Proverbio 15:22.) Tareanan no mester ser asigná ni kita na un manera arbitrario of pa loco. E ancianonan mester considerá huntu cu oracion con un ruman su abilidadnan por ser usá mihó den e congregacion. (Compará cu Mateo 25:15.) Ora un asignacion ser duná, un ruman mester ser instruí cabalmente kico exactamente ta ser rekerí di dje. Proverbio 11:14 ta spierta, “Ora no tin direccion ábil, e pueblo ta cai.”

No ta bon pa djis bisa un ruman p’e tuma over e departamento di cuenta, revista of literatura for di un otro sirbidor. Tin biaha un sirbidor recien asigná ta heredá un cantidad di registro inexacto of incompleto. Ki un desanimacion! “Laga tur cos tuma lugá decentemente i mediante areglo,” 1 Corintio 14:40 ta manda. Ancianonan mester tuma e iniciativa pa entrená rumannan, familiarisando nan cu proceduranan di congregacion i nan mes poniendo un ehempel den siguimentu di tal proceduranan. Por ehempel, ancianonan mester haci areglo p’e cuenta dje congregacion ser controlá cada tres luna. Neglishando un areglo importante asina por hiba na problema i debilitá e respet cu sirbidornan ministerial tin pa instruccionnan organisacional.

Pero suponé un ruman ta parce negligente den atendé un asignacion particular? En bes di kit’é lihé for di su asignacion, ancianonan mester papia cuné tocante dje. Talbes e problema ta un falta di entrenamentu. Si e ruman ta sigui haña dificultad den atendé su asignacion, talbes lo bai’e bon den un otro asignacion.

Tambe ancianonan por promové armonia dor di manifestá humildad. Filipense 2:3 ta animá cristiannan pa ‘no haci nada debí na pleitamentu ni debí na halsamentu, sino considerando cu humildad di mente cu e otronan ta superior cu boso.’ Un anciano pues mester purba cooperá si un usher mand’e sinta riba un cierto asiento den e salon, sin razoná cu pasobra e ta un anciano, e no mester obedecé. Talbes e usher ta simplemente siguiendo e sugerencia pa laga rumannan sinta den diferente seccion dje salon, aunke e mester corda cu no tin un regla cu tur persona mester haci esei.a Un anciano lo evitá di anulá decisionnan innecesariamente riba asuntunan cu a ser asigná na un sirbidor ministerial.

Sirbidornan Ministerial Trahando pa Armonia

“Sirbidornan ministerial di igual manera mester ta serio,” segun apostel Pablo. (1 Timoteo 3:⁠8) Tumando nan asignacionnan na serio​—⁠como parti di nan sirbishi sagrado​—⁠ta contribuí hopi pa prevení tensionnan di desaroyá. Si bo ta un sirbidor ministerial, bo ta efectuá bo tareanan cu entusiasmo? (Romano 12:​7, 8) Bo a dedicá bo mes pa bira ábil den atendé na bo tareanan? Bo ta confiabel i fidedigno? Bo ta demostrá un spiritu boluntario ora ta toca asignacionnan? Un sirbidor ministerial na un pais africano ta atendé tres diferente asignacion den e congregacion. Su actitud? “Wel, esei simplemente ta nificá mas trabou duru,” e ta bisa, “i trabou duru no ta matá bo.” En berdad, esnan cu ta duna di nan mes ta disfrutá di mayor felicidad.​—⁠Echo 20:⁠35.

Tambe bo por contribuí hopi pa promové armonia dor di cooperá plenamente cu e ancianonan. “Sea obediente na esnan cu ta hiba delantera entre boso i sea sumiso,” Hebreo 13:17 ta bisa, “pasobra nan ta vigilando riba boso almanan como esnan cu lo rindi cuenta; pa nan por haci esaki cu goso i no cu suspiro, pasobra esaki lo ta dañoso pa boso.” Ta cierto cu e ancianonan ta imperfecto, i kisas ta fácil pa mira nan foutnan. Sin embargo, un actitud crítico ta fomentá desconfiansa. E por ruiná bo goso i afectá otronan den e congregacion negativamente. Pues apostel Pedro a duna e conseho aki: “Boso, hombernan mas hóben, sea sumiso n’e ancianonan. Pero boso tur faha boso mes cu humildad di mente un pa cu otro . . . P’esei, humiyá boso mes bou dje man poderoso di Dios, p’e por halsa boso n’e debido tempu.”​—⁠1 Pedro 5:​5, 6.

Un conseho asina ta particularmente apropiado si bo sinti cu bo ta ser pasá por haltu pa privilegionan di sirbishi. Talbes bo ta “extendiendo bo mes pa un puesto di superintendente,” pero ningun nombramentu a ser hací. (1 Timoteo 3:⁠1) Humildad di mente por yudá bo mantené “un actitud di spera.” (Lamentacion 3:24) En bes di sinti rencor pa cu e ancianonan​—⁠cua siguramente ta perhudicial pa boso bon relacion​—⁠puntra nan si tin áreanan den cua bo por mehorá. Bo boluntad genuino pa aceptá i aplicá conseho lo ser mirá indudablemente como evidencia di crecementu spiritual.

Humildad piadoso i modestia por yuda un sirbidor ministerial mantené su balansa si e tin abilidadnan excepcional of bentaha educacional i social. Lo ta ki un tentacion p’e purba briya mas cu surpasá e ancianonan of hala atencion na su mes abilidadnan! Proverbio 11:2 ta corda nos cu “sabiduria ta cu esnan modesto.” Un ruman modesto ta conciente di su limitacionnan. E ta dispuesto pa traha silenciosamente den fondo i pa usa su abilidadnan pa sostené e ancianonan. Modestia kisas tambe por yud’é realisá cu aunke e por tin hopi conocimentu den un sentido mundano, kisas ainda e ta falta den e áreanan importante di sabiduria spiritual i dicernimentu​—⁠cualidadnan den cua e ancianonan kisas ta sobresalí.​—⁠1 Corintio 1:​26–2:13; Filipense 1:⁠9.

Claramente, ancianonan i sirbidornan ministerial ta hunga papelnan vital. Huntu nan por contribuí hopi pa edificá tur den e congregacion. Pero pa haci esei, nan mester traha huntu armoniosamente, “cu pleno humildad di mente i suavedad, cu gran pacenshi, soportando otro den amor, haciendo esfuerso sincero pa observá e unidad di spiritu den e banchi unidor di pas.”​—⁠Efesio 4:​2, 3.

[Footnotes]

[Caption on page 27]

Anciano ta mira sirbidor ministerial, no como inferior, sino como co-ministernan di Dios