PARTI 5

“Bolbe Serka e Wardadó i Superintendente di Boso Alma”

Abo pasando den un òf mas di e situashonnan difísil menshoná den e foyeto akí ku ta stroba bo di bolbe serka Yehova? Si ta asina, bo no ta bo so. Hopi sirbidó fiel di Dios—tantu den tempu bíbliko komo den nos tempu—a pasa den situashonnan similar. Anto meskos ku Yehova a yuda nan superá e opstákulonan ei, asina lo e por yuda bo tambe.

Yehova lo guia bo ora bo bolbe serka dje

BO POR tin sigur ku Yehova lo guia bo ora bo bolbe serka dje. Lo e yuda bo trata ku preokupashon i inkietut, superá bo sintimentunan di hùrt i haña e pas di mente i di kurason ku ta bini di un konsenshi limpi. Esei lo por motivá bo pa sirbi Yehova atrobe huntu ku bo rumannan den fe. Lo bo sinti bo meskos ku algun kristian di promé siglo, kende apòstel Pedro a bisa den un karta: “Boso tabata manera karné ku a dual; pero awor boso a bolbe serka e wardadó i superintendente di boso alma.”—1 Pedro 2:25.

No tin nada mas mihó ku rekuperá bo amistat ku Yehova. Dikon? Di promé, esei lo hasi Yehova masha felis. (Proverbionan 27:11) Manera bo sa, Yehova tin sintimentu, pues loke nos ta hasi tin efekto riba dje. Ma Yehova no ta obligá nos stim’é ni sirbié. (Deuteronomio 30:19, 20) Un komentarista bíbliko a ekspresá esei asin’akí: “No tin un man di porta parti pafó di kurason di hende; ta di paden mester habrié.” Ora nos ta sirbi Yehova ku un kurason yen di amor, ta komo si fuera nos a habri e porta di nos kurason p’e. I esei—nos deboshon inkebrantabel—ta un regalo masha balioso pa Yehova i ta hasié masha felis. Nada no por hasi nos mas felis ku duna Yehova e adorashon ku e meresé.—Echonan 20:35; Revelashon 4:11.

Un ruman muhé inaktivo ta risibí un kaluroso bon biní den e kongregashon

Di dos, unabes bo bolbe i reanudá bo sirbishi kristian, lo bo satisfasé bo nesesidat spiritual. (Mateo 5:3) Den ki manera? Wèl, hende rònt mundu ta puntra nan mes: ‘Pakiko nos ta aki?’ Pero nan no ta haña kontesta riba e pregunta ei ni riba otro preguntanan tokante e propósito di bida. Yehova a krea nos ku e nesesidat spiritual ei. El a krea nos di tal manera ku nos ta sinti un satisfakshon ora nos ta sirbié. P’esei, no tin nada ku por duna nos un satisfakshon mas grandi ku sirbi Yehova pasobra nos stim’é.—Salmo 63:1-5.

Yehova ke pa bo bolbe serka dje. E foyeto akí ku bo tin den bo man ta prueba di esei. A prepar’é ku hopi dedikashon i orashon. Kisas bo a hañ’é serka un ansiano òf un otro ruman, i bo a disidí di les’é. Loke bo a lesa kasi sigur ta konmové bo pa hasi kaso di su mensahe. Tur esaki ta demostrá ku Yehova no a lubidá bo. Al kontrario. E ta halando bo suavemente bèk serka dje.—Huan 6:44.

Un konsuelo ku nos tin ta ku Yehova hamas ta lubidá su karnénan pèrdí. Esei ta loke un ruman muhé ku yama Donna a realisá. El a splika: “Pokopoko m’a drif bai for di e bèrdat, pero hopi biaha mi tabata haña mi ta pensa riba Salmo 139:23 i 24, ku ta bisa: ‘Skrudiñá mi, o Dios, i konosé mi kurason; [“saminá mi,” NW] i konosé mi pensamentunan, i mira si tin kualke kaminda di maldat den mi, i guia mi riba e kaminda eterno.’ E mundu di Satanas no tabata pa mi—nunka mi no a ègt sinti mi na kas den dje—i mi tabata sa ku ta den e organisashon di Yehova mi mester ta. M’a kuminsá mira ku Yehova nunka no a bandoná mi; ta djis haña mi mester a haña e kaminda pa bolbe serka dje. I mi ta masha kontentu mes ku m’a bolbe!”

“M’a kuminsá mira ku Yehova nunka no a bandoná mi; ta djis haña mi mester a haña e kaminda pa bolbe serka dje”

Nos ta pidi Dios sinseramente pa bo tambe bolbe sinti ‘e goso di Yehova.’ (Nehemías 8:10) Hamas lo duel bo ku bo a bolbe serka Yehova.

Si Bo Ke Bolbe Serka Yehova, Kisas Bo Ke Sa . . .

UNDA MI MESTER KUMINSÁ?

Un persona ku tabata malu lo mester di tempu pa rekuperá su forsa i pa pokopoko reanudá su rutina normal. Wèl, kon abo por haña bo forsa spiritual bèk? No sinti ku bo tin ku hasi tur kos di gòlpi. Mas bien, purba di ‘kome’ un tiki kuminda spiritual tur dia. Podisé bo por tuma un par di minüt pa sea lesa òf skucha algun kapítulo di Beibel, studia un di nos publikashonnan òf eksplorá nos website jw.org. Tambe bo por wak un di e programanan di JW Broadcasting® ku ta disponibel riba jw.org. Ademas, purba di asistí na un reunion di kongregashon mas pronto posibel. I mas ku tur kos, hasi orashon i pidi Yehova yuda bo. Beibel ta bisa: “Tira tur [bo] inkietut riba dje, pasobra e ta interesá den [bo].”—1 Pedro 5:7.

“Despues ku m’a bai for di e bèrdat, mi tabatin asta bèrgwensa di hasi orashon. Despues ku por fin m’a tuma un kurashi i hasi orashon, un ansiano a bin bishitá mi. El a yuda mi mira ku pa Yehova mi no tabata un kaso pèrdí. E ansiano a rekomendá mi pa kuminsá lesa Beibel tur dia. Ora mi a hasi esei, m’a haña e fortalesa nesesario pa bolbe kuminsá bai reunion. Ku tempu, m’a kuminsá sali den sirbishi atrobe. Mi ta masha kontentu ku Yehova no a konsiderá mi un kaso pèrdí.”—Eeva.

KON E KONGREGASHON LO RISIBÍ MI?

Bo por tin sigur ku e rumannan den kongregashon lo risibí ku bo brasa habrí. Nan lo no bai kritiká bo ni husga bo. Nan lo mustra bo kuantu nan stima bo i lo hasi tur nan posibel pa animá bo.—Hebreonan 10:24, 25.

“Mi tabatin bèrgwensa di bai Salòn bèk. Mi tabata preokupá kon e rumannan lo a reakshoná ora nan mira mi. Pero un ruman muhé hende grandi, ku mi tabatin 30 aña sin mira, a bisa mi: ‘Bon biní na kas, mi yu!’ E palabranan ei a ègt konmové mi. Di bèrdat m’a sinti mi na kas.”—Javier.

“M’a bai Salòn i m’a sinta te patras pa niun hende no mira mi. Sinembargo, hopi ruman a rekonosé mi di tempu ku mi tabata bini reunion na chikí. Nan a yama mi bon biní i a brasa mi ku tantu kariño ku m’a sinti un pas enorme. Tabata komo si fuera m’a bini kas bèk.”—Marco.

KON E ANSIANONAN LO YUDA MI?

E ansianonan lo trata bo ku kariño. Nan lo duna bo un kòmplimènt pa bo esfuersonan pa rebibá “e amor ku bo tabatin na kuminsamentu.” (Revelashon 2:4) Nan lo tin kompashon ku bo, i “ku suavedat” nan lo yuda bo korigí kualke fayo ku bo a kometé. (Galationan 6:1; Proverbionan 28:13) E ansianonan lo por hasi areglo pa laga un hende studia Beibel ku bo, kisas den un publikashon manera Disfrutá di Bida pa Semper! òf Hala Serka Yehova. Bo por tin sigur ku e ansianonan lo duna bo konsuelo i sosten riba bo kaminda di regreso.—Isaías 32:1, 2.

“Durante e ocho añanan ku mi tabata inaktivo, e ansianonan a keda buska manera pa yuda mi. Un dia, un ansiano a bishitá mi i a mustra mi algun potrèt ku nos a yega di saka huntu. E potrètnan ei a trese asina tantu dushi rekuerdo ku mi a kuminsá anhelá e goso ku mi tabata sinti tempu mi tabata sirbi Yehova. Ku amor, e ansianonan a yuda mi restablesé un rutina spiritual.”—Victor.

“E Lo Hasi Bo Fuerte”

Den nos buki di kantika, Kanta ku Alegria pa Yehova, bo ta haña vários kantika konmovedor ku por konsolá bo i animá bo pa reanudá bo aktividatnan spiritual. Por ehèmpel, meditá riba e letra di kantika 38. Su título ta “E Lo Hasi Bo Fuerte,” i e ta basá riba 1 Pedro 5:10.

No ta pòrnada Dios a ’na bo su bèrdat,

trese bo den su lus fo’i skuridat.

E por a wak anhelo di bo kurason

pa konos’é i dun’é bo deboshon.

Na dje den orashon b’a dediká;

i ku su forsa b’a perseverá.
Su propio Yu t’e preis pa bo por ta salbá;

awor e n’ ke pèrdè bo nunka mas.

Si ni su Yu stimá e no a tene atras,

dikon l’e no yuda bo te final?

Bo fe i amor Dios no por lubidá;

pues nunka lo bo n’ ta desampará.

(REFREIN)

Yehova a kumpra bo ku sanger di su Yu.

E mes lo perkurá pa bo perseverá.

Dios mes lo hasi bo firme i fuerte pa soportá.

Lo bo perseverá; Dios mes lo perkurá.

Si bo ta deseá di skucha e vershon di koro i orkesta di e kantika akí i otro kantika di Reino na diferente idioma, skèn e kódigo akí òf bai na jw.org.