Ana Ta Pidi Yehova un Yu Hòmber

Un israelita ku yama Elkana tabatin dos esposa: Ana i Penina. Pero Elkana tabata stima Ana mas. Penina tabatin hopi yu, ma Ana no tabatin yu. P’esei, tur ora Penina tabata tèr Ana i trat’é malu. Tur aña Elkana tabata hiba su famia un stat ku yama Silo pa nan adorá Yehova na e tabernakel. Un biaha, ora nan tabata na Silo, Elkana a mira ku Ana tabata masha tristu, i el a bai papia ku Ana. El a bisa Ana: ‘Por fabor, no yora mas. Bo tin ami tòg? Mi ta stima bo.’

Despues, Ana a sali bai pa hasi orashon su so. E tabata yora masha hopi mes, i el a pidi Yehova yud’é. El a primintí Yehova: ‘Si bo duna mi un yu hòmber, lo mi hib’é serka bo na e tabernakel pa e traha pa bo henter su bida.’

Sumo Saserdote Elí a mira Ana ta yora, i el a pensa ku Ana tabata burachi. Pero Ana a bis’é: ‘Nò, mi señor, mi no ta burachi. Mi ta tristu pasobra mi tin un problema grandi, i mi ta papiando ku Yehova tokante esei.’ Anto Elí a ripará ku loke el a pensa no tabata bèrdat, i el a bisa Ana: ‘Ku Dios duna bo loke bo a pidié.’ Ana a sintié mihó, i el a bai bèk serka su famia. Den ménos ku un aña, Ana a haña un yu hòmber ku el a yama Sámuèl. Esta kontentu Ana a sintié!

Kiko bo ta pensa, Ana a lubidá loke el a primintí Yehova? Nò! Asina ku Sámuèl no mester a bebe lechi di pechu mas, Ana a hiba Sámuèl na e tabernakel pa e traha pa Yehova. Ana a bisa Elí: ‘Esaki ta e yu ku mi a pidi, i mi ta dun’é na Yehova pa e traha p’e henter su bida.’ Tur aña, Elkana ku Ana tabata bishitá Sámuèl i nan tabata hiba un mantel nobo sin manga p’e. Yehova a duna Ana tres yu hòmber i dos yu muhé mas.