Yosías Tabata Stima Lei di Dios

Yosías a bira rei di Huda ora e tabatin ocho aña di edat. Den e tempu ei, e hendenan tabata praktiká magia i adorá imágen. Ora Yosías tabatin 16 aña, e tabata ke sa kon pa adorá Yehova na e manera korekto. Ora e tabatin 20 aña, el a kuminsá destruí e imágennan i e altarnan den henter e pais. I ora Yosías tabatin 26 aña, el a prepará tur kos pa drecha tèmpel di Yehova.

Sumo Saserdote Hilkías a haña e buki di Lei di Yehova den tèmpel. Kisas e buki akí tabata e buki ku Moises a skirbi. Sáfan, sekretario di rei, a trese e buki pa Yosías i Sáfan a kuminsá les’é na bos haltu. Segun ku Yosías tabata skuch’é, el a bira tristu pasobra el a ripará ku e pueblo tabatin hopi aña kaba ta desobedesé Yehova. Rei Yosías a bisa Hilkías: ‘Yehova ta masha rabiá ku nos. Bai i papia ku Yehova. Lo e bisa nos kiko nos tin ku hasi.’ Yehova a laga Profeta Hulda bisa nan: ‘E pueblo no a sigui sirbi mi. Lo mi kastigá nan, pero no durante e tempu ku Yosías ta rei, pasobra el a humiá su mes.’

Ora Rei Yosías a tende e mensahe, el a bai tèmpel i yama e hendenan di Huda pa bini huntu. Despues, el a lesa Lei di Yehova na bos haltu pa henter e pueblo tende. Yosías i e pueblo a primintí di obedesé Yehova ku henter nan kurason.

E pueblo di Huda no a selebrá Pasku Hudiu pa hopi aña. Pero, ora Yosías a lesa for di Lei ku nan mester selebrá Pasku Hudiu tur aña, el a bisa e pueblo: “Selebrá Pasku Hudiu na onor di Yehova.” Despues, Yosías a ofresé hopi sakrifisio, i el a sòru pa un koro kanta na e tèmpel. E ora ei, e pueblo a selebrá Pasku Hudiu i despues Fiesta di Pan sin Zürdeg ku a dura shete dia. For di tempu di Sámuèl, nan no a selebrá Pasku Hudiu di e manera ei. Yosías tabata stima Lei di Dios. Bo tambe ta gusta siña tokante Yehova?