Plan pa Siguridad Internacional lo Goza Bon Éxito?

“TA PARCE cu, pe misericordia di Dios, e Gera Friu cu a domina mundo pa mas cu 40 aña a termina,” segun One World, un revista di WCC (Conseho Ecuménico di Religion). “Sosodimento significativo den Europa central i oriental . . . ta parce di duna bon indicacion pa paz i siguridad den Europa i e resto di mundo,” segun skirbidor anglicano John Pobee, dje Programa di educacion teológico di WCC.

Representante di WCC no ta e úniconan cu ta enlaza Dios cu plan di hende pa siguridad internacional. Den April di 1991, un poco tempo despues dje gera den e golfo Pérsico, papa Juan Pablo a manda un ­mensahe pa Javier Pérez de Cuéllar, secretario general di NU dje tempo ei, den locual el a bisa: “Obispo dje iglesia católico di Medio Oriente i dje Occidente ta confiá e trabao di Nacion Uní . . . Nan ta spera cu mediante Nacion Uní i organizacion specializá di dje, esnan cu ta den necesidad grave debí ne gera reciente, lo no keda sin haya comprension i solidaridad internacional.”

Además, e Vaticano tabata dje 35 nacion cu a formulá i a firmá tanto e Acuerdo di Helsinki di 1975 como e Documento di Estocolmo di 1986. Ora Nacion Uní a declara 1986 e “Aña Internacional di Paz,” e papa a responde cu un invitacion pa representante di religion principal di mundo pa participa den un celebracion di un “Dia di Oracion pa Paz Mundial.” Den October di 1986, representante dje religion budista, hindú, islámico, sinto, anglicano, luterano, católico griego, hudío, i otro religion a sinta hunto den Assisi, Italia, i tabatin turno pidiendo paz mundial.

Algun aña despues, den un sermón cu el a predica den Roma, e arzobispo anglicano di Canterbury a corda e ocasion ei. El a bisa, “Den Assisi nos a mira cu e obispo di Roma [papa] por a reuni religion cristian hunto. Nos por a reza hunto, papia hunto i actua hunto pe paz i bienestar di humanidad . . . Den tal iniciativa pidiendo paz mundial, mi a sintími den e presencia di Dios cu a bisa ‘Mira, mi ta haciendo algo nobo.’”

Otro religion, aunque nan no tabata representá den Assisi, també ta keda optimista tocante plan humano pa siguridad internacional. Un artículo di redactor di Die Kerkbode, e revista oficial dje Gereformeerde Kerk di Zuidáfrica, a bisa: “Nos ta experimenta e pasamento na un ordu nobo mundial. Loke a parce inimaginable un poco aña pasá ta sosode dilanti nos mes wowo. E reconciliacion cu ta ser efectuá na escala mundial grandi entre Union Soviética i e Occidente ta tene efecto grandi localmente. Den nos parti di mundo, grupo cu semper tabata na oposicion cu otro i enemigo abierto di otro ta papia cu otro, i e impulso den direccion di ‘paz’ ta presenta na tur parti . . . Desde e punto di bista cristian, tur esfuerzo pa establece paz den e pueblo mester ta recibí cu gusto. Nos por haci oracion pa paz den nos tempo.”

Dios ta bendiciona plan humano pa siguridad internacional?

Kico e Bijbel ta Bisa?

En cuanto confianza den esfuerzo humano, e Bijbel ta adverti francamente: “No pone boso confianza den aristocrat, ni den yiu di hende terrenal, na locual salbacion no ta pertenece. Su spiritu ta sali, e ta bolbe na su mes suela; den e mesun dia su pensamento en berdad ta perece.” (Salmo 146:3, 4) Progreso actual den direccion di paz por parce animador. Pero nos tin cu ser realista. Esfuerzo di hende ta limitá. Hopi bez cos ta sosode cu ta mas grandi cu hende. Rara bez nan por distingi tendencia of forza scondí cu ta frustrá e mihor plan cu nan ta traha.

Siete cien aña promé cu e tempo di Jesús, den e dianan di profeta Isaías, lider hudío a planea pa siguridad firmando pacto internacional cu país beciña, algo similar cu loke ta pasa awe. Den e tempo ei també, lider religioso a apoya loke homber político tabata haci. Pero Isaías a duna advertencia: “Planea un proyecto, i lo e ser desbaratá! Papia cualkier palabra, i lo e no permanece.” (Isaías 8:10) Nan proyecto tabata un fracaso desastroso. Mescos por sosode awe?

Claro cu sí, siendo cu Dios a usa e mesun profeta pa anuncia cu Dios tin su propio manera pa trece siguridad pe tera. Lo e no usa organizacion humano pa haci esei, sino lo usa un desendiente dje rey israelita David. (Isaías 9:6, 7) E Heredero di rey David ta Jesucristo, cu, ora Poncio Pilato a puntré, a admiti cu e tabata Rey, pero a bisa: “Mi reino no ta dje mundo aki.” (Juan 18:36; Lucas 1:32) Realmente, e Reino di Jesús ta celestial. I e Reino—i no e Nacion Uní ni ningun otro nacion político terrenal—lo trece siguridad duradero i confiabel ne tera.—Daniel 2:44.

Jesucristo a profetiza cu su Reino lo cuminza reina foi cielo na un tempo ora lo tin “gera i informe di gera,” cu ‘nacion lantando contra nacion i reino contra reino.’ E cumplimento dje profecía ta marca 1914 como e tempo ora esei a sosode i a identifica e añanan despues di esei como “e conclusion dje sistema di cosnan.”—Mateo 24:3, 6-8.

Kico esei kier men? Cu e tempo cu ta keda pe sistema mundial actual ta limitá, i cu lo e caba pronto. Esei ta un motibo pa preocupacion of tristeza? No, si nos ta corda e crueldad, inhusticia, opresion, gera, i tur e sufrimento cu ta caracterizá e sistema di cosnan aki. Lo ta berdaderamente un alivio pa biba bao di un gobernador di locual e Palabra di Dios, e Bijbel, ta bisa: “E spiritu di Jehova mester baha riba dje, e spiritu di sabiduría i di comprendimento, e spiritu di conseho i di poder, e spiritu di conocimento i di temor di Jehova.”—Isaías 11:2.

Berdadero Siguridad Riba Tera

Ta cierto cu lo no tin berdadero siguridad riba tera te cu, bao di Reino di Dios, e profecía di Isaías ta ser cumplí na escala mundial: “Lo mi crea cielo nobo i tera nobo; i e cosnan di antes lo no ser recordá, ni nan lo no subi den e curazón.” (Isaías 65:17) Maske cuanto oracion lider religioso ta ofrece pe mundo aki, plan humano pa siguridad internacional no por reemplaza e camina di Dios pa paz i siguridad.

E siguridad mundial i permanente cu e Reino di Dios lo introduci lo ser glorioso. Lo sigiente ta un solo detaye bíblico: “Nan lo tin cu bati nan spada na ploeg i nan lanza na chapi. Nan lo no hiza spada, nacion contra nacion, ni lo no siña di gera mas. I nan realmente lo sinta, cada un bao di su ramada i bao di su mata di figu, i lo no tin ningun cu ta hácinan tembla; pasobra e boca mes di Jehova di ehército a bisé.”—Miqueas 4:3, 4.

Solamente e siguridad cu Dios mes ta garantizá por ta permanente i confiabel. P’sei, en bez di pone bo confianza den aristocrat, pakico no pone bo confianza den Jehova Dios? Anto bo por haya cu e sigiente palabra dje salmista ta cierto: “Feliz ta hende cu tin e Dios di Jacob como su yudanza, kende su speranza ta den Jehova su Dios, e Creador di cielo i tera, di lamá, i di tur loke tin den nan, Esun cu ta keda pegá ne berdad te na tempo indefinitivo.”—Salmo 146:5, 6.

[Kuadro na página 7]

E Iglesia Católico i Política Internacional

“Aunque Cristo a bisa cu su reino ‘no ta dje mundo aki,’ homber religioso di rango halto i e papa como un institucion a participa intensamente den lucha político internacional i nacional desde e tempo di Constantino.” —E Iglesia Católico den Política Mundial, (na inglés) di profesor Eric Hanson, Universidad di Santa Clara, jesuíta.