Plan di Hende pa Siguridad Internacional

“Ora tur esaki ta caba, nos deseo ta di ser sanador. Nos kier haci loke nos por pa facilita loke cu optimismo mi por yama un ordu nobo mundial.”—George Bush, presidente americano, na Januari di 1991, un poco despues di comienzo dje gera contra Iraq.

“E concepto cu presidente Bush tin di un Ordu Nobo Mundial ta enfatizá e importancia di gobernacion di ley, i e creencia di cu e nacionan tin un responsabilidad colectiva en cuanto libertad i husticia. E fin dje Gera Friu a trece un era nobo.”—Embahador americano pa Australia, na Augustus di 1991.

“Awenochi, ora mi ta mira e drama di democrácia desaroya rond di mundo, kizás—kizás nos ta mas cerca tal mundo nobo cu nunca na antes.”—George Bush, presidente americano, na September di 1991.

HOPI lider di mundo, mescos cu presidente Bush, ta papia cu optimismo tocante e futuro. Nan optimismo tin fundeshi? Loke a sosode desde Gera Mundial II ta sostene tal optimismo? Bo ta kere cu homber político por establece siguridad internacional?

Plan Grandi di Hende

“Durante e último dos aña dje segundo gera mundial,” segun e documentario di television Goodbye War (Ayó gera), “mas cu un miyón hende tabata matá tur luna.” Ne tempo ei, e nacionan a sinti un necesidad urgente pa un plan cu por preveni sosodimento di otro gera asina. Mientras cu e gera a sigi ainda, representante di 50 nacion a produci e plan pa siguridad internacional cu hende hamás a ideá, esta, e Carta di Nacion Uní. E introduccion dje Carta a expresa e determinacion pa “salba generacion di futuro for dje afliccion di gera.” Miembro prospectivo di Nacion Uní tin cu “uni [nan] forza pa mantene paz i siguridad internacional.”

Cuarentiun dia despues, un avion a basha un bomba atómica riba Hiroshima, Hapón. El a explota riba e centro dje stad i a mata mas cu 70.000 hende. Tal explosion, i esun cu a sigi tres dia despues riba Nagasaki, efectivamente a pone fin ne gera cu Hapón. Siendo cu Alemania, aliado di Hapón, a entrega dia 7 di Mei di 1945, Gera Mundial II a termina asina. Sin embargo, esei tabata e fin di tur gera?

No. Desde Gera Mundial II, humanidad a mira mas cu 150 gera mas chikito cu a mata mas cu 19 miyón hende. Claramente, e plan grandi di NU no a trece siguridad internacional ainda. Kico a bai malu?

E Gera Friu

Planificador di NU no a anticipa e rivalidad cu a desaroya lihé entre esnan cu tabata aliado den Gera Mundial II. Hopi nacion a duna apoyo na un banda of e otro den e lucha pa poder, locual a yega di ser yamá e Gera Friu i tabata, en parti, un lucha entre comunismo i capitalismo. En bez di uni nan forza pa pone fin na gera, e dos bloki di nacion a apoya e dos opositor den conflicto regional i asina a bringa otro den Asia, Africa, i den Centro i Suramérica.

Cerca 1970, e Gera Friu a cuminza floha. E flohamento a culmina na 1975 ora 35 nacion a firma loke ta yamá e Acuerdo di Helsinki. Inclui den tal participante tabatin Union Soviética i Estados Unidos, hunto cu nan aliado europeo respectivo. Tur a priminti pa traha pa “paz i siguridad” i “abstene . . . di amenazá of usa forza contra integridad territorial of independencia político di otro nacion, of di usa forza di cualkier manera contrario cu e propósito di Nacion Uní.”

Pero, tal idea no a produci fruta. Pronto despues di 1980, e lucha entre e dos superpoder a cayentá di nobo. E situacion a empeora asina tanto cu na 1982 Dr. Javier Pérez de Cuéllar, secretario general recién eligí di Nacion Uní, a reconoce e fracaso di su organizacion i a duna advertencia di un “anarquía internacional nobo.”

No obstante, awe e secretario general di NU i otro lider ta expresa optimismo. Informe di prensa ta menciona e “era despues dje Gera Friu.” Di ki manera tal cambio a sosode?

“Era Despues dje Gera Friu”

Un factor notable tabata un reunion dje Conferencia riba Siguridad i Cooperacion den Europa di 35 nacion. Den September di 1986 nan a firma loke ta yamá Documento di Estocolmo, i den dje nan a reafirma nan compromiso pa cumpli cu e Acuerdo di Helsinki di 1975.a E Documento di Estocolmo ta contene hopi regla gobernando control di actividad militar. “E resultado dje último tres aña ta animador i e alcance di implementacion ta cuminza surpasa obligacion skirbí den e Documento di Estocolmo,” segun SIPRI (Instituto di Estocolmo pa Investigacion di Paz Internacional) den su Anuario di 1990.

Anto, na 1987, nacion superpotente a alcanza un acuerdo notable exigiendo e destruccion di tur proyectil lanzá for di tera cu alcance di 500 te 5.500 kilometer. “E destruccion fisical di tal proyectil i lanzador ta sigi e orario i e dos banda ta cumpli debidamente cu stipulacion dje acuerdo,” segun SIPRI.

Nan a tuma otro medida pa reduci e peliger di gera nuclear. Por ehempel, na 1988 e dos superpoder a firma un acuerdo tocante “raket intercontinental i raket lanzá for di submarino.” Promé cu e lanzamento di tal arma, cada banda mester avisa e otro “no menos cu binticuater ora di antemano, dje fecha stipulá, dje sitio dje lanzamento, i dje sitio dje impacto.” Segun SIPRI, tal acuerdo “casi ta elimina e posibilidad di incidente local resultando den un gera nuclear mundial.”

Entretanto, plan pa mehora siguridad internacional a acelera. Den Mei di 1990, durante un reunion cumbre di superpoder den Washington, D.C., e presidente soviético dje tempo ei, Mikhail Gorbachev, a propone pe dos bloki di nacion europeo firma un pacto di paz. Den juli e 16 nacion occidental di OTAN (Organizacion di Tratado di ­Atlántico di Nort) a reuni den Londres. Nan contesta ne proposicion di Mikhail Gorbachev tabata pa e dos banda firma un “declaracion en conhunto den locual nos ta declara solemnemente cu nos no ta enemigo mas i confirma nos intencion di abstene dje amenaza di forza i di uso di dje.” E título dje promé bladji di un curant africano a yama esei “Un paso gigantesco den e direccion di paz mundial.”

Anto, na bispo di un reunion cumbre di superpoder den Helsinki, Finlandia, un portaboz dje gobierno americano a bisa cu “e prospecto di gera [den Medio Oriente] ta resultando den un plan nobo colectivo pa paz mundial.” Paz a recibi un trastorno ora Iraq a invadi Kuwait i Medio Oriente a parce di ser den peliger di caba na candela. Pero, bao di autoridad di Nacion Uní, un ehército internacional encabezá pa América a haci invasor bolbe na nan mes país. E unidad internacional di propósito manifestá den e gera a produci algun speranza di cu un era nobo di cooperacion a nace.

Desde e tempo ei, suceso mundial a desaroya mas. Specialmente, e naturaleza mes di loke na antes tabata e Union Soviética a cambia dramáticamente. Nan a permiti nacion báltico declara nan independencia, i otro república dje Union Soviética a sigi nan ehempel. Rivalidad violento nacionalista a presenta den país cu a parce di ser uní bao di control comunista centralizá. Ne fin di 1991, existencia dje Union Soviética a caba oficialmente.

Tal cambio radical di aspecto di político di mundo a habri porta di oportunidad pe organizacion di Nacion Uní. The New York Times a bisa tocante esei: “E flohamento di tension mundial i e spiritu nobo di cooperacion entre América i Union Soviética por nifica un papel nobo mas fuerte den asunto internacional pe organizacion mundial.”

E ora finalmente a yega pe organizacion di 48 aña di edad manifesta su potencia? Nos realmente ta drenta den loke América ta yama “un siglo nobo, i un milenio nobo, di paz, libertad i prosperidad”?

[Nota]